2 Corinthians 6

Kalenjin Bible Revised (BUKUIT NE TILIIL Sireet ne Dutero Kanon)

← Chapter 5 Jump to: Chapter 7 →

1Kisoome acheek che keboisyei ak Kamuktaindet keele amotaach myeeindap Kamuktaindet puch

2(amu mwaei keele, Ki agasin eng' peetuut ne po chamjinet, Ak ki atoretiin eng' peetuut ne po saruunet: Ogeero, nguno ko peetuut ne po chamjinet; ogeero, nguno ko peetuut ne po yetunet):

3ama ki yai kiy age tugul ne po kanagut, si ma kimwaitae poisyennyo yaityo;

4ago eng' tuguuk tugul kiboortoige, ko uu kiboitinigap Kamuktaindet, eng' muitaet ne oo, eng' pichiinwek, eng' kagiigosyek, eng' tiritinwek,

5eng' pirutik, eng' ratisyosyek, eng' polatosyek, eng' poisyonik che uueen, eng' riipsosyek, eng' rugutosyek;

6eng' tiliilindo, eng' naet, eng' mutyonet, eng' talasyet, eng' Kabuuset ne Tiliil, eng' chamyet ne ma tinyei keniisyet,

7eng' ng'olyootap imanit, eng' kamuktaetap Kamuktaindet; eng' kariigap imanda eng' eutap tai ak eng' murot kaataam,

8eng' toroornatet ak teweernateet, eng' ng'aleek che yaach che kimwaitaenech, ak eng' ng'aleek che myachen; ko uu kaberberik, ago ki po iman;

9ko uu che ma naotin, ago kingenech komyee; ko uu che machei kobek, ak ogeero, kisoptosi; ko uu che kitigoni, ago ma ki parech;

10ko uu che aragendos, ago che poiboi kotugul; ko uu che ponondos, ago imogornoni che chaang'; ko uu che ma tinyei kiy, ago tinyei tuguuk tugul.

11Kagiyatwok kutusweekyok, ee Korintoechu, kabaraitu mugulelwekyok.

12Ma ogiigotin eng' acheek, ago ogiigotin eng' chamyeng'wong'.

13Ak eng' kageeret ne tee ne ki kigoonok (ang'alaali ko uu ye ang'alaaljini lagokyuk), ingobartaitu mugulelwekwok.

14Amat oratkei ak che ma iyanotin: tinyei imanda yamdao nee ak tengekto? Anan tinyei yamdao nee lapkeiyet ak mesundeito?

15Anan kasyindos eng' nee Kristo ak Belial? Anan ting'egei nee ne iyanaat ak ne ma iyanaat?

16Ak ting'egei nee Hekaluut ne po Kamuktaindet ak kanamonik? Amu ki Hekaluut ne po Kamuktaindet ne sabei; ago ko uu ye ki mwa Kamuktaindet kole, Amenye icheek, ak awendotee icheek; Ak aegu Kamuktaindet nenywa, Ak koek icheek piikyuk.

17Nooto anyun omong'u eng' kwenunnywa, Ak otabaange, mwaei Kiptaiyat, Amotwaa kiy ne po simdo; Si ataachak,

18Ak aegu Kwanda eng' okweek, Ak oegu weeriik ak tiibiik eng' anee, Mwaei Kiptaiyat Ne po Kamuktaet.

← Chapter 5 Jump to: Chapter 7 →