Amos 9

Kalenjin Bible Revised (BUKUIT NE TILIIL Sireet ne Dutero Kanon)

← Chapter 8 Jump to:

1Ki ageer Kiptaiyat kotonone ole neegitee kaptisisyet, ak ki le, kwer walisyegap tolochik kot kotumdumgei tugatugik, yeityo itonaton walisyechooto eng' metowegap piik tugul. Ak che ng'etu abare rotwetap chok, mamweei agot agenge eng' icheek, ama chilili agot agenge.

2Agot ngo pal agoi ye mi che ki kobek, konemu eunnyu eng' olooto; agot ngo togosta kipsengwet, achooru eng' olooto.

3Agot ngo ung'egei tulweetap Karmel parak, acheeng'e ak anemu eng' olooto; agot ngo ung'enagei eng' nyanjet oriit, ang'ate eng' olooto ereneet si kosus icheek.

4Agot ngo luul puunikwak, ang'ate rotwetap chok eng' olooto, si kobar icheek; ak atokyigei icheek aipchi yaityet, ma ipchini kiit ne myee.

5Amu Kiptaiyat Kamuktaindet ne Toroor ne po lugoosyek, ko ineendet ne twaei emet si kochoot, ak koriiryo tugul che menyei olooto; ak ng'eetei emet komugul ko uu aineet; ak koteeny kogeny ko uu aineet ne po Misiri.

6Ineendet ne teechei kooriikyik eng' kipsengwet, ne teechei yiemutyennyi eng' paragutap ng'wony; ineendet ne kuurei nyanjet ak koroong'ji ng'wony; Kamuktaindet ne Toroor kainennyi.

7Tos mou lagogap Ethiopik eng' anee, ee piigap Israel? Mwaei Kamuktaindet ne Toroor. Tos ma amutu Israel kotogos eng' emetap Misiri, ak amutu Philistiik eng' Kaptor, ak amutu piigap Syria eng' Kir?

8Keerei konyegap Kiptaiyat Kamuktaindet ne Toroor pounateet ne tinyei tengekto, ak ang'em aiste eng' ng'wony; kobatee ma ng'eme ageesu kootap Jakobo, mwaei Kamuktaindet ne Toroor.

9Amu, ogeero, ang'ate, ak aseisei kootap Israel eng' pororyosyek tugul, ko uu ye kiseisei peek eng' kiit ne kiseiseisye, ago ma ibutyin ng'wony paiywat agot ne ming'in.

10Pegu eng' rotwetap chok kiptengeginik tugul che po piikyuk, che leen, “Ma ityinech yaityet anan konyoorwech.”

11Ang'eeti eng' peetuunooto emaitap Daudi ne ki kobut, ak agerate ole kibutok; ak atuuru karatwekyik, ak ateech koigei ne ki po peetuusyek che po keny.

12Si kobiit konam `icheek piik che ki ng'et che po Edom, kobooto pororyosyek tugul che kimwaitoe kainennyu, mwaei Kamuktaindet ne Toroor ne yaei ng'olyoondoniito.

13Ogeero, pwoonei peetuusyek, mwaei Kamuktaindet ne Toroor, che nyo kosiirtoe chiito ne ibatisyei kesiindet, ak kosiir chiito ne tyechei sabibuk kolindet; ak kosaune tuloonook divaik che anyiny, ak kochootyo tuloonook tugul che mengeechen.

14Ak amutu kogeny piikyuk Israel che kiga keluul, ak koteech nganasook che kiga koek karatwek ak komeny olooto; ak komiin mbareenigap sabibuk ak koeei divaigap mbareenichooto; ak kobatis ak koam logoegap mbareenichooto.

15Ak amin icheek eng' emennywa, ama kitutu kogeny eng' emennywa ne ki agoochi, mwaei Kamuktaindet ne Toroor Kamuktaindeng'ung'.

← Chapter 8 Jump to: