Colossians 3

Kalenjin Bible Revised (BUKUIT NE TILIIL Sireet ne Dutero Kanon)

← Chapter 2 Jump to: Chapter 4 →

1Ko uu ye king'eetyee anyun kobooto Kristo, ocheeng' tuguuk che mi parak, ole mi Kristo kotebyei eng' eutap tai ne po Kamuktaindet.

2Obwaat tuguuk che mi parak, ma tuguuk che miitei ng'wony.

3Amu ki obegu, ak ki kiuny saboonwekwok kobooto Kristo eng' Kamuktaindet.

4Ye tuun took Kristo, ne ineendet saboondanyo, otaagu anyun ak okweek kobooto ineendet eng' toroornatet.

5Obar anyun kebeberwekwok che miitei ng'wony; sokseet, simdo, maguutik che samisen, mageet ne ya, ak kasetap myat, nooto saaetap kanamonik;

6nyoonjin nereeknatetap Kamuktaindet weeriitap ngelelnateet amu tuguuchooto;

7eng' tuguuchooto che ki obendote ak okweek eng' tai, ye kita omenye eng' tuguuchuuto.

8Ago nguno olakte ak okweek tuguuchuuto tugul; nereegek, nyitatet, yaityet, chubisyet, ak ng'alaalet ne po teweernateet eng' kutusweekwok:

9amomwachigei lembech, amu ki oregu chiito ne po keny kobooto poisyonikyik,

10ak koolaach chiito ne leel, ne kiwalei koleelit agoi naet kogergeit ak itoondap ineendet ne ki yai ineendet:

11ole ma ting'e poroindo Yunanindet ak Yahudyot, ne imuratanat ak ne ma imuratanat, punootyo, Sitiaindet, ne otwogin, ne ityagat: ago Kristo ko tugul ak eng' tugul.

12Nooto anyun, amu oo lewenaigap Kamuktaindet che tiliileen ak ko oo chamanik, olaach muguleldo ne po rireenetapkei, talasyet, kaming'inetapkei, mutyonet, ak muitaet;

13omuitochinigei, ak onyochinigei kaat okweegei, ngo tinyei chii age tugul ng'olyoo eng' age: agot ko uu ye kinyoiywok kaat Kiptaiyat, oyai ko uu nooto ak okweek:

14ak otes eng' tuguuchuuto tugul chamyet, nooto ratuutyet ne po kagesunetapkei.

15Ak ingoboi kaalyeetap Kristo mugulelwekwok, nooto ne ki kiguurchok eng' poorto agenge; ak oegu che tinyei kongoi.

16Ingomenyok ng'olyootap Kristo eng' mogornateet, eng' utaatyet tugul oneetige ak oteechinigei eng' tyenwogigap kalasunet ak tyenwogik che ki kisir ak tyenwogigap saboon otyenjini Kamuktaindet eng' myeeindo eng' mugulelwekwok.

17Ak kiit age tugul ne oyae, eng' ng'olyoot anan eng' poisyet, oyai tugul eng' kainetap Kiptaiyat Jeso, omwachini Kamuktaindet Kwanda kongoi eng' ineendet.

18Osotichu, ogas iit manong'otaikwok, ko uu ye nyolu eng' Kiptaiyat.

19Manong'otaichu, ocham osotikwok, amogoochi ng'wanindo.

20Lagochu, ogas iit sigiikwok eng' tuguuk tugul, amu iboiboi niito miising' Kiptaiyat.

21Kwanisyechu, amotachatachi lagokwok, si ma iluuk mugulelwekwak.

22Otwogichu, ogas iit eng' tuguuk tugul icheek che kiptainikwok eng' poorwek; ama eng' otwoknateet ne kigeerei, ko uu che iboiboi piik, ago eng' muguleldo tugul, oiywei Kiptaiyat:

23kiit age tugul ne oyae, oyai kobunu muguleldo, ko uu eng' Kiptaiyat, ama ko uu eng' piik;

24ongen ole otaache eng' Kiptaiyat melekto ne po poroteet; oote Kiptaiyat Kristo.

25Amu ineendet ne yaei ne ya, ko tuun taachei agine ne po yaityonooto ki yai: ama mi tiytiyet.

← Chapter 2 Jump to: Chapter 4 →