Haggai 2

Kalenjin Bible Revised (BUKUIT NE TILIIL Sireet ne Dutero Kanon)

← Chapter 1 Jump to:

1eng' peetuutap tiptem ak agenge ne po arawetap tisap, ko ki nyo ng'olyootap Kamuktaindet ne Toroor eng' maotyot Haggai, kole:

2“Ng'alaalji Zerubabel weeriitap Shealtiel, pounindetap Judah, ak Joshua weeriitap Jehosadak tisiindet ne oo, kobooto piik che ki ng'et, ileenji:

3‘Ng'oo eng' okweek ne ki ng'et ne ki keer kooi kotinyei toroornatennyi ne po tai? Ak ogeertoi ano nguno? Tos ma uu puch eng' konyekwok?

4Nyiganitu, ee Zerubabel,’ mwaei Kamuktaindet ne Toroor. ‘Nyiganitu, ee Joshua weeriitap Jehosadak tisiindet ne oo. Onyiganitu okweek piik tugul che po emet,’ mwaei Kamuktaindet ne Toroor, ‘ak oboisye; amu ami kobootok,’ mwaei Kamuktaindet ne Toroor ne po lugoosyek.

5Niito ng'olyoot ne ki kiyomisyige ye ki obwane eng' Misiri, ak tebee kwenung'wong' Kabuusennyu ne Tiliil; amoiyweisye.

6Mwaei Kamuktaindet ne Toroor ne po lugoosyek kole: ‘Eng' ne matya kota atumdumi kogeny konyil agenge kipsengwet ak ng'wony, nyanjet ak emet.

7Atumdumi pororyosyek tugul, ak kobwa tuguuk che chamei pororyosyek tugul, ak anyiit kooi toroornatet,’ mwaei Kamuktaindet ne Toroor ne po lugoosyek.

8‘Chechuuk fedhaisyek, ak chechuuget thahabusyek ak icheek.

9Eetu toroornatet ne po let ne po kooi kosiir ne po tai, ak agoonu kaalyeet eng' yuto,’ ” mwaei Kamuktaindet ne Toroor ne po lugoosyek.

10Eng' peetuutap tiptem ak ang'wan ne po arawetap sogool, eng' kenyiit ne po aeng' ne po Darius ko ki nyo ng'olyootap Kamuktaindet ne Toroor eng' maotyot Haggai kole:

11“Mwaei Kamuktaindet ne Toroor ne po lugoosyek kole: oteebe tisiik agobo ng'atuutik, oleenji:

12Ngot koibe chiito ngoryennyi panyeek che itabaanatiin, ak kotiiny ngoryonooto magatyat, anan sogoryek, anan divaik, anan mwanik, anan amit age tugul, ko tos tiliiliitu?” Ak ki wol tisiik kole, “Achicha.”

13Yeityo komwa Haggai kole, “Ngot kotiiny chii age tugul ne ng'waan ne kitwa muusto, age eng' tuguuchuuto, ko tos ng'wanitu?” Ak ki wol tisiik kole, “Ng'wanitu.”

14Kowol anyun Haggai kole, “Uu nooto pichu ak uu nooto pororyoni eng' tainnyu,” mwaei Kamuktaindet ne Toroor, “Ak uu nooto poisyet age tugul ne po eunekwak; ng'waan kiit ne igoitoi eng' olooto.”

15Ak asoomok anyun nguno, ale obwaat kobooch peetuuniito ak kwo tai, kobooch peetuut ne ki kinde koita agenge paragutap koita age eng' hekaluutap Kamuktaindet ne Toroor.

16Ye kingwo chii kocheeng' karurugutyetap keruutik tiptem, konyooru ne po keruutik taman kityo. Kingwo ole kitaage divaik kole koip tereenik konom, ko ki mi tiptemu icheegei.

17Ki abirenok chelalityet ak uchatet ak koigap ropta eng' poisyonik tugul che po eunekwok; ago ma oweekyagei, mwaei Kamuktaindet ne Toroor.

18Asoomok ale, obwaat, kobooch peetuuni ak kwo tai, kobooch peetuutap tiptem ak ang'wan ne po arawetap sogool, kobooch peetuut ne ki kilumee lumeiywotap Hekaluutap Kamuktaindet ne Toroor, obwaat anyun.

19Tos ta komi peek choge? Ee, ma iiyo keetiigap sabibuk, anan mogoonik, anan keetiigap logoek alak, anan mseituni. Aberuurok anyun kobooch peetuuni.

20Ki nyoonji `ng'olyootap Kamuktaindet ne Toroor Haggai ne po aeng', eng' peetuutap tiptem ak ang'wan ne po arawetap sogool, kole:

21“Ng'alaalji Zerubabel, pounindetap Judah, ileenji atumdumi kipsengwet ak ng'wony.

22Agabui ng'echereetap laitornatet ne po pounatosyek, ak ang'eme kimnateetap pounatosyegap pororyosyek. Agabui kariisyek che po lugeet kobooto che laanyei; ak kobutyo paraisisyek kobooto che laanyei, ki parei age tugul eng' rotwetap chok ne po tupchennyi.

23‘Eng' peetuunooto, anamin ee Zerubabel otwogindennyu, weeriitap Shealtiel, ak ayain iige ng'ookset, amu ki alewenin,’ ” mwaei Kamuktaindet ne Toroor ne po lugoosyek.

← Chapter 1 Jump to: