Hebrews 5

Kalenjin Bible Revised (BUKUIT NE TILIIL Sireet ne Dutero Kanon)

← Chapter 4 Jump to: Chapter 6 →

1Amu tisiindet age tugul ne oo, ne ki kilewen eng' piik, kindoi agobo piik amu tuguuk che tokyingei Kamuktaindet, si kobiit kogoito kagoochinoik ak tiseiywek agobo tengekwogik:

2ineendet ne imuuchi koriiree kimanainik ak che mastoi, amu ineendet agine komi eng' nyalulet;

3ak amu nooto anyun, ko uu ye nyoljin kogoito che ki tisiisye agobo tengekwogigap piik, ko uu nooto konyaaljin kogoito agobo kei agine.

4Ama mi chii ne igoochingei ineegei teegisi, kobatee ye kaguur `Kamuktaindet ineendet, ko uu Aron.

5Ko uu nooto anyun, ki ma itoroorgei Kristo agine koek tisiindet ne oo, ago ineendet ne ki ng'alaalji, koleenji, Ii Weeriinnyu, Kasichin rani:

6Ko uu ye mwaei agine eng' komosta age kole, Ii tisiindet koigeny Ko uu kiit ne ki uu Melkisedek.

7Ne ki eng' peetuusyek che kimi eng' poorto, ko kagogoito saautik ak soomutik eng' riirek che eecheen ak peegap kong', koriirchin ineendet ne ki imuuchi kosar eng' meet, ak kingo kagegasyi amu kaiyweisyennyi ne kiywei Kamuktaindet.

8Agot nganda ki Weeriit ineendet, ko ki ineetkei kasetap iit eng' tuguuk che ki nyoorunee nyalilda;

9ak kingo kageyai koek ne ititaat, koek ineendet ne kitaunegei yetunet ne po koigeny eng' icheek tugul che kase iit ineendet;

10ne kiguure Kamuktaindet tisiindet ne oo ko uu kiit ne ki uu Melkisedek.

11Ki tinyei ng'aleek che chaang' che kimwae agobo ineendet, ago uui ole kiboorundoi, amu kigouit eng' okweek ogas.

12Amu eng' ye kita nyolu oegu kaneetik, konyaaljinok kogeny koneetak chii kaneetisyosyek che po tai che po ng'aleegap Kamuktaindet; ak ki oegu che machei cheego, ama amitwogik che uueen.

13Amu age tugul ne luei cheego kotom konai koboisyee komyee ng'olyootap imanda; amu manyurut ineendet.

14Ago po piik che eecheen amitwogik che uueen, icheeget che ki koboisyee ng'omnatosyekwak komuuchi koobeesyo che myach ak che yaach.

← Chapter 4 Jump to: Chapter 6 →