James 4

Kalenjin Bible Revised (BUKUIT NE TILIIL Sireet ne Dutero Kanon)

← Chapter 3 Jump to: Chapter 5 →

1Punu ano lugoosyek ak pooryosyek eng' kwenung'wong'? Ma punu maguutikwok che poortos eng' kebeberwekwok?

2Ogase myat, amotinye kiy, obarisyei; amook ng'etkong', amomuuchi onyooru; obortosi ak oyae lugeet; amotinye kiy, amu mosoome.

3Osoome, amosiche, amu ya soomeng'wong', si oyae maguutikwok.

4Okweek che oibegei, mongen ole chorwanditap ng'wony ko puunyoondit eng' Kamuktaindet? Chiito age tugul anyun ne machei koek chorweetap ng'wony koyaegei koek puunyootap Kamuktaindet.

5Anan obwaati ole ng'alaali puch siruutik, kole, “Kabuuset ne Tiliil ne menyei eng' acheek kotinyei ng'etkonda”?

6Ago koonu myeeindo ne tesat. Leen anyun, “Kirindoi Kamuktaindet che meniotin, ak kogoochin myeeindo che iming'inegei.”

7Nooto anyun, oming'inityige Kamuktaindet; ago ogirinde chesawilyet, si komweenok.

8Oriikyi Kamuktaindet, si koriikyok. Oun eunekwok, okweek kiptengeginik; ak otiliil mugulelwekwok, okweek che oo po kabwaatutik aeng'.

9Onginyaliilak, ak oaragense, ak oteeiye: ingowalak roryondeng'wong' koek arageneet, ak koek poiboiyeng'wong' nyigiisindo.

10Oming'inge eng' taitap Kiptaiyat, si koeetok.

11Amomwaitaegei ng'aleek che yaach okweegei, che kitupche. Ineendet ne mwaitae ng'olyoot ne ya ne tupcho, anan korwookyi tupchennyi, komwaitae ng'olyoot ne ya Ng'atuutyet, ak korwookyin Ng'atuutyet: ago ngot irwookyi Ng'atuutyet, koma ii chiito ne yaei Ng'atuutyet, ago ii ne irwookyin.

12Ne koonu Ng'atuutyet ak korwoochi ko agenge, ineendet ne imuuchi kosar ak komuuchi kong'em: ago ii ng'oo inyee si irwookyi chiitap kokweng'ung'?

13Ogas anyun, okweek che omwae ole, Kibendi rani anan ko mutai nganasani, ak ketar kenyiit agenge eng' olooto, kealisyei, ak kealdoisyei, ak kesich kelunet:

14ago mongen kiit ne piitu karon. Nee sabeeng'wong'? Amu okweek ko oo kibungweret, ne taagu ne matya, yeityo kobet.

15Amu kata nyoljinok ole, Ngo cham Kiptaiyat, kesaptosi, keyai ni anan ko nin.

16Ago nguno otoroorige eng' kachaunosyekwok pogei: katorooretapkei age tugul ne uu nooto ko ya.

17Eng' ineendet anyun, ne ingen koyai ne myee, ama yaei, ko tengekto eng' ineendet.

← Chapter 3 Jump to: Chapter 5 →