Joel 3

Kalenjin Bible Revised (BUKUIT NE TILIIL Sireet ne Dutero Kanon)

← Chapter 2 Jump to:

1Amu, ogeero, tuun ayumi pororyosyek tugul eng' peetuusyechooto, ak eng' peetuunooto, ye tuun aweech kogeny che kiga keluul che po Judah ak Jerusalem,

2ak amut icheek koba atebweetap Jehoshaphat; ak arwookyi icheek eng' olooto amu piikyuk ak amu porotennyu Israel, che ki koseerchi pororyosyek, ak kopchei emennyu.

3Ak kigoseer parbareek agobo piikyuk: ak ki kogoito ng'etet agobo chepkugoniot, ak ki alda chepto agobo divaik, si kobiit koe.

4Ee Tyro, ak Sidon, ak komoswek tugul che po Philistia, otile nee eng' anee? Tos ogeerwo kiy ne po kageeret? Ak ngot ogeerwo, aweekwok kioto konyo meting'wong' eng' yooto, eng' chokyinet.

5Amu ko uu ye ki oip fedhaisyekyuk ak thahabusyekyuk, ak oip tuguukyuk che korooron miising' koba hekalusyekwok;

6ki oalde kogeny lagogap Judah ak lagogap Jerusalem oaldochi weeriitap Yunanik, si kobiit omut kolooegitu eng' kiwotennywa:

7ogeero, ang'eeti icheek komong' eng' ole ki oaldochi, ak aweekwok konyo meting'wong' kioto ogeerunena;

8ak aalde weeriikwok ak tiibiikwok koba eutap lagogap Judah, ak koaldochi icheek piigap Sabe, pororyet ne loo: amu kagomwa Kamuktaindet ne Toroor ng'olyoondoniito.

9Omwaite ng'olyoondoni eng' pororyosyek; ochop lugeet: oong'et piik che nyigoonen; ingorik murenik tugul che po lugeet, ingotogos.

10Otany mogomboikwok che po tuuga koek rotoogap chok, ak otany chepkesokwok koek ng'otwek: ingomwa ne nyalulat, kole, aa kiim.

11Ochogu, obwa, okweek pororyosyek tugul che omi komoswek tugul ak oyumgei: ee Kamuktaindet ne Toroor, igoochi cheguuk che nyigoonen kochoorgei kobwa yu.

12Ingong'eetkei pororyosyek, ak kobwa atebweetap Jehoshaphat: amu atebye eng' olooto ak arwookyi pororyosyek tugul che mi komoswek tugul.

13Ogese chepkeswet, amu kagoruryo: obwa, otyech; amu kagonyi ole kitue divaik, ing'irtogei eng' ole itendenjin, amu oo yaityennywa.

14Piik che chaang', piik che chaang' che mi atebweet ne kitilee ng'aleek! Amu kagoriikyi peetuutap Kamuktaindet ne Toroor eng' atebweet ne kitile ng'aleek.

15Imenitu asiista ak arawet, ama kooluu kecheik,

16ak pooriseni Kamuktaindet ne Toroor eng' Zion, ak kotwek eng' Jerusalem; ak potandos kipsengwet ak ng'wony: ago egu Kamuktaindet ne Toroor ole mwechin piikyik, ak koek irimeet eng' piigap Israel.

17Onai anyun ole aa Kamuktaindet ne Toroor Kamuktaindeng'wong', amenye Zion tulweennyu ne tiliil: tiliiliitu anyun Jerusalem, ama kobunei toek kogeny.

18Ak saune peetuunooto divaik che anyiny tuloonook, ak rootune cheego tuloonook che mengeechen, ak koroot peek che chaang' eng' kereruusyek tugul che po Judah; ak komong' kondametutap peek eng' kootap Kamuktaindet ne Toroor, ak koobis atebweetap Shitim.

19Kuberi Misiri, ak koek Edom surkwen ne kigoguber, amu koroomnateet ne ki kiyachi lagogap Judah, amu ki kotumda korotiik che ma tinyei tengek eng' emennywa.

20Ago tebyei Judah koigeny, ak kotebyei Jerusalem eng' ibinwek tugul.

21Ak aanyiny korotiikwak che tomo aanyiny: amu menyei Kamuktaindet ne Toroor Zion.

← Chapter 2 Jump to: