Joshua 16

Kalenjin Bible Revised (BUKUIT NE TILIIL Sireet ne Dutero Kanon)

← Chapter 15 Jump to: Chapter 17 →

1Kebeberta ne ki ibutyi eng' parbaryat lagogap Joseph kotaune Jordan eng' Jeriko eng' kong'asiis agoi surkwen, ak kotogosta eng' Jeriko kobun emetap tuloonook kwo Bethel.

2Ki wo komanda eng' Bethel kwo komong'ji Luz ak kosiirto kot koit kooretap Arikik eng' Ataroth.

3Ak kwo kochoortagei kotokyigei cherongo agoi kooretap Japhletik, kot koit kooretap ole rektoot ne po Beth-horon ak kotokyigei Gezer ak komong'ji nyanjetap Mediterenian.

4Ki nam anyun lagogap Joseph, chooto Manasseh ak Ephraim porotennywa.

5Kooretap lagogap Ephraim ko uu ortinwekwak ko uu ni; kiwotetap koorennywa kong'etee kong'asiis ne po Ataroth-addar kot koit Beth-horon parak,

6ak kwo kiwoteet kot koit araraitap Mediterenian. Eng' murot kaataam kowendi kiwoteet kong'etee Mikmethath agoi kong'asiis ne po Taanath-shiloh kosiirto kotogosta agoi kong'asiis ne po Janoah.

7Kong'eete Janoah kochoortagei kwo Ataroth ak Naarah koit Jeriko ak kwo kot komong'ji Jordan.

8Eng' cherongo, kogiwo kiwoteet kong'etee Tappuah kot koit aineetap Kanah ak komong'ji nyanjetap Mediterenian. Niito anyun ko poroteetap pororyetap lagogap Ephraim ko uu ortinwekwak,

9kobooto nganasook tugul ak kokwotinwekwak che ki kitabaanji Ephraim ak lagokyik eng' kwenutap poroteetap lagogap Manasseh.

10Ago ma imuuch `icheek ko oon Kanaanik che ki menyei Gezer. Ki meny anyun Kanaanik kwenutap Ephraim agoi rani ak ki ek otwogik che yaei poisyonigap otwoknateet.

← Chapter 15 Jump to: Chapter 17 →