Jude 1

Kalenjin Bible Revised (BUKUIT NE TILIIL Sireet ne Dutero Kanon)

Jump to:

1Judah, otwogindetap Jeso Kristo, ak ko tupchetap Jakobo, asirchini che ki keguur, che chamaatiin eng' Kamuktaindet Kwanda, ak ko riibootin agobo Jeso Kristo:

2Ingotesak rireenet eng' okweek ak kaalyeet ak chamyet.

3Chamanichu, ye ki agiiligei miising' asirwak agobo yetunet ne kiyamdoi, ageer ale nyoljino asirwak ateiywok ale ogiiljige miising' kayaneet ne ki kigoochi che tiliileen konyil agenge kityo.

4Amu mi piik alak che ki chut oriit eng' ung'oot, icheek che ki kichopchi kirwoogoni kobooch keny, piik che ma iywei Kamuktaindet, che walei myeeindap Kamuktaindet nenyo koek mageet ne ya, ak koesyoi Laitoryandennyo, ne ineegei, ak ko Kiptaiyandennyo Jeso Kristo.

5Amache anyun abwaatwok, agot nganda ki onai komyee tuguuchu tugul, ale kingo sar `Kiptaiyat piik komong' eng' emetap Misiri, eng' let kobar icheek che ki ma iyan.

6Ak ki inde malaikaisyek che ki ma riip pounatennywa, ago ki pagaakta meng'ooteet ne ki nenywa, ki inde kotebee ratisyosyek che po koigeny eng' mesundeito kot koit kirwooget eng' Peetuut ne oo.

7Ko uu nooto, agot Sodom ak Gomorah, ak nganasook che kiga yiem, kingo kagogoochigei sokseet, ko uu chuuto, koba koosup poorwek che ma kergei ak chechwaak, ko ki kinde koek kaboorunetap chooto nyalili konyooru kergong'yetap maat ne po koigeny.

8Imurwoni ak icheek chuuto ko uu nooto poorwek eng' karwotitaosyekwak, ak kosasei kiptainateet, ak kochubei che torooreen.

9Ago ye kingo paregei Mikael, malaikaiyat ne oo, ak chesawilyet, kotiitos agobo muustap Musa, koma kany koipchi ineendet kirwoogetap chubeet, ago ki le, Ingogerin kong' Kiptaiyat.

10Ago chubei pichu tuguuk alak tugul agot che ma ingen; ak tuguuk che kiguitos icheegei ko uu piteennywa, ko uu tyong'ik che ma tinyei ng'omnateet, king'emei eng' tuguuchuuto.

11Pwo eng' icheek! Amu ki isup ooreetap Kain, ak kogoochigei mastaetap Balaam komach melekto, ak kilusyo eng' ngelelnatetap Kora.

12Pichuuto ko rwandosyek che ung'ootiin eng' igoorwekwok che po chamyet ye oamisyei tugul, mestoweek che amisyei icheegei ama iyweisyei. Icheek ko poolik che ma tinyei peek, che ibooti usoonaik; keetiik che ma tinyei logoek, che ki kobek konyil aeng', che ki kitut ak tigitik;

13mildaetapkei ne koroom ne po nyanjet; che igutu kalilanennywa; kecheik che ombenioti, che ki kigonorchi tuindap mesundeito ne po koigeny.

14Ki maoten Enok agine, chiito ne po tisap kobooch Adam, koamdochi pichu kole, Ogeero, ki nyo Kiptaiyat kobooto piikyik che tiliileen eliphuusyek ng'iisyat,

15konyo koyachi kirwooget tugul, ak korwookyi tugul che ma iywei Kamuktaindet eng' poisyonikwak tugul che yaacheen che ki koyai koma iywei Kamuktaindet, ak ng'aleekwak tugul che uueen che ki mwa kiptengeginik che ma iywei Kamuktaindet agobo ineendet.

16Chuuto ko che ing'unyng'ung'dos, kiptiyotinik, che isubi maguutikwak che yaacheen (ak komwaei kutusweekwak ng'aleek che koroomen che po menoteet), che tiytiy piik si konyoor kelunet.

17Ago okweek, chamanichu, obwaat ng'aleek che ki komwa eng' tai che kiyooktoi che po Kiptaiyandennyo Jeso Kristo;

18ko uu ye kimwaiwok kole, “Tuun piitu chombilik eng' peetuusyegap let, che isubi maguutikwak che yaacheen che ma po kayweetap Kamuktaindet.”

19Chuuto che ibu kabesyosyek, che isubi poorwek, che ma tinyei Kabuuset ne Tiliil.

20Ago okweek, chamanichu, ogimiitkei eng' kayaneng'wong' ne tiliil miising', ak osaae eng' Kabuuset ne Tiliil.

21Oriipkei eng' chamyetap Kamuktaindet, ogeni rireenetapkei ne po Kiptaiyandennyo Jeso Kristo kot koit saboondap koigeny.

22Oriree alak che tinyei saget;

23osaru alak ye ong'usu komong' eng' maat; ak oriree alak eng' kaiyweisyet; ye oweche agot ngoryeet ne kagomurwoniit eng' poorto.

24Ingobunji anyun nguno ineendet ne imuuchi koriibok si mobutye, ak kondeak taitap toroornatennyi eng' poiboiyet ne oo ko motinye tisya,

25kobunji Kamuktaindet ne ineegei ne Yetindennyo, eng' Jeso Kristo Kiptaiyandennyo, toroornatet, etunateet, pounateet ak kimnateet, kobooch keny, nguno ak agoi koigeny. Amen.

Jump to: