1 Peter 5

Kalenjin Bible (BUKUIT NE TILIL)

← Chapter 4 Jump to:

1Ateechini mising’ boisiek che mi kwenung’wong’, anendet ne a boiyot ko u ichek, ak a baoriatab nyalilwogikab Kristo, ne kiyamdoi torornatet ne tun king’anyei:

2oyage akwetab Jehovah ne mitei kwenung’wong’, otononji, ama eng’ birjinet, ago oyage eng’ chamet, eng’ Jehovah; ama eng’ magetab keljinet ne muruon, ago oyage eng’ chamet ne o;

3amoegu kiptainik eng’ che otononjini, ago oegu kaborunoik eng’ akwet.

4Ak ye tun took Mestowot ne o, onyoru kutwet ne bo lilindo ne mabetei.

5Ko u noto ak okwek che o mengechen, ogas it boisiek. Ee, ogermenge okwek tugul eng’ kaming’inetab ge si kobiit oboisiechige okwege eng’ okwege: amu kirindoi Jehovah menotik, ak kogochin mieindo che iming’inegei.

6Oming’inityige anyun eut ne kim ne bo Jehovah, si kotororok ye kait betut;

7otuuchi inendet kaiimutikwok tugul, amu ibwatok mising’.

8Oripge, oripse: amu wendoti bunyondeng’wong’ oindet, ko u ng’etundo ne boriseni, kocheng’ei ne amei:

9ogirinde inendet ko o lumdootin eng’ kayaneng’wong’, ongen ole yaoksei nyalilwogik che u choto eng’ tupchosiekwok che mi ng’ony.

10Ak ingochobok, ak kolumdok, ak kogimitok Jehovah ne bo mieindo tugul, ne kiguurjok lilindanyi ne bo koigeny eng’ Kristo, ko kaonyalilse eng’ betusiek che matia.

11Nenyi kimnatet koigeny ak koigeny. Amen.

12Kasirwak eng’ ng’alek tutigin, eng’ eutab Silbano, tupchennyo ne kiyani, ko u ye abwati, amwawok inne, ak abaoriani ale mieindab iman ni ne bo Jehovah: otononse olumdege.

13Igatok inendet ne mitei Babulon, ne kigilewenok tugul; ak kogatok agine Mariko werinnyu.

14Ogatge eng’ ng’ututet ne bo chamnyet. Ingoteb kalyet eng’ okwek tugul che omite eng’ Kristo.

← Chapter 4 Jump to: