2 Peter 3

Kalenjin Bible (BUKUIT NE TILIL)

← Chapter 2 Jump to:

1Chamanichu, baruani asirwok nguno ko ne bo aeng’, ak eng’ tuwai ang’eeti kabwatutikwok che matinyei kenisiet ye agonok obwat;

2si obwat ng’alek che kimwa maotik che tililen eng’ tai, ak ng’atutietab Kiptaiyat ak ko Yetindet eng’ bikwok che kiyoktoi:

3korok, ongen ole tun bwanei chombilik ak chombilisiet eng’ betusiek che bo let, che isubi magutikwak,

4ak komwaei kolen, Mi ano arorutietab nyonunennyi? Amu, koboch ye kingoruiyo kwanisiekyok, komi tuguk tugul ko u kit ne ki u koboch taunetab yaetab ng’ony.

5Amu kwetyin ichegei koutie kole kimi kipsengwetisiek koboch keny, ak ng’ony ne kigiyai eng’ beek ak komi kwenutab beek, eng’ ng’olyotab Jehovah;

6kimarane beechoto ng’onyut ne ki bo betusiechoto, ak kilus:

7ago kipsengwetisiek ak ng’onyut che bo nguno, ko kigigonorji mat eng’ ng’olyondonoto, kogonor agoi betutab kiruoget ak ng’emisietab bik che maiywei Jehovah.

8Ago amoutie ng’olyondoni, chamanichu, ole betut agenge eng’ Kiptaiyat ko kergei ak kenyisiek elfut, ak ko kergei kenyisiek elfut ak betut agenge.

9Maigaegei Kiptaiyat eng’ arorutiennyi, ko u ye iiti alak kagaetab ge; ago muitoi agobo okwek, mamachei kolus chi age tugul, ago machei kobwanji tugul sigunet.

10Ago tun nyonei betutab Kiptaiyat ko u chorin; ne siirtoe kipsengwetisiek eng’ cheet ne o, ak kochootyo tuguk tugul che kigiyae ng’ony ak barak eng’ mat ne korom, ak kolal ng’onyut ak boisionik che mi.

11Amu tun chootos tuguchuto tugul ko u nito, ko nyolu oegu bik che u nee eng’ atebet ne tilil ak kaiyweetab Jehovah,

12ogeni nyonunetab betutab Jehovah, ak ogiili, amu noto anyun chootos kipsengwetisiek eng’ mat, ak kochootyo tuguk tugul che kigiyae ng’ony ak barak eng’ mat ne korom?

13Ago, kigeni kipsengwet ne leel ak ng’onyut ne leel ko u arorutiennyi, ole menyei imanda.

14Noto anyun, chamanichu, amu ogeni tuguchoto, ogiilge si tun kenyoruok omi eng’ kalyet ko motinye tisia amotinye lelut eng’ tainnyi.

15Ak oiit ole muitaetab Kiptaiyandennyo ko yetunet; ko u ye kisirwak agine Paulo, tupchennyo ne kechame, ko u ng’omnatet ne kigigochi;

16ko u eng’ baronokyik tugul agichek, kong’alal agobo tuguchuto eng’ baronochoto; ole mi tuguk alak che uuen kiguiyo, che igunuri che maingen kiy, ak che ma tononiotin, ko u ye itoi sirutik chun alak, kot koit ng’emisienywa.

17Ko okwek anyun, chamanichu, amu kaosib onai tuguchuto, oripge, si maichuutok kachiliiletab bistoik, ak obutye eng’ tononeng’wong’.

18Ago onerie eng’ mieindo ak naet ne bo Kiptaiyandennyo ak ko Yetindennyo Jesu Kristo. Nenyi torornatet nguno agoi koigeny. Amen.

← Chapter 2 Jump to: