Habakkuk 3

Kalenjin Bible (BUKUIT NE TILIL)

← Chapter 2 Jump to:

1Saet ne kisa maotiot Habakuk, tiendo ne kiguure Shigionoth ne kitien agobo che kimasta.

2Ee Jehovah, kiagas ng’aleguk, aiyweisiei: Ee Jehovah, ing’eet boisieng’ung’ eng’ kwenutab kenyisiek; Yai kotook eng’ kwenutab kenyisiek; Ibwat rirenet nginerechi.

3Kinyo Kamuktaindet eng’ Teman, Kinyo Inendet ne Tilil eng’ tulwetab Paran. Kituch torornatennyi kipsengwetisiek, Ak kinyi ng’ony kalosunennyi.

4Ki u kakweng’ennyi lapkeiyet; Kimong’une eunnyi lapkeiyet ne u ne bo kelyekab asista: Ak kimi yoto ole kiung’e kamuktaennyi.

5Kiindoe inendet koroito, Ak kimong’une kelyekyik kalyelet ne u mat.

6Kitonon ak kokwa ng’ony; Kigeer, ak kotumdum bororiosiek: Ak kiiseerak tulonok che bo koigeny; Kiing’urukso tulonok che bo koigeny; Ki u banwekyik betusiek che bo keny.

7Kiageer emaisiekab Kusan komi nyalilda: Kibotanso tuguk che kioiye emet che bo Midian.

8Tos kinerekyi Jehovah ainosiek? Tos kinyo nereknateng’ung’ agobo ainosiek, Anan agobo nyanjet, Kot ilany mbartanyisieguk, Ak ilany karisieguk che bo luget che bo yetunet?

9Kigitiach kwangeng’ung’; Ki bo iman ng’olyotab kayosiosiek ne kigiyosiechi bororiosiek. Kiibete emet ainosiek.

10Kiiyweis tulonok ye kigeerin; Kisiirto usonetab nyanjet; Kitul riret, Ak konamji barak eunekyik.

11Kitononso asista ak arawet eng’ meng’otenywa, Eng’ lapkeiyetab kipchaboniguk kobendi, Eng’ kaluunetab ng’oting’ung’ ne ilyeli.

12Kiibun emet ineregoti, Kiibor bororiosiek ko u bek eng’ neregek.

13Kiimong’u agobo yetunetab biguk, Agobo yetunetab neng’ung’ ne iilat; Kiiguoten kandoindetab gotab kiptengeginik, Ing’anye lumeiywot agoi kaatit.

14Kiitoore kiplitokyik kandoindetab bikyik che bo luget: Kibwa ko u kipchurjuriet kole koseera: Ki u boiboindanywa che amei kibananok eng’ ung’ot.

15Kiitiege inye nyanjet mbartanyisieguk, beek che irurugotin che kimen.

16Kiagas, ak kitilgei moennyu, Kibotan kutinnyu eng’ cheonoto; Kinunio kowekyuk ak kiabotan eng’ ole kiami: Si kobiit amuuny eng’ betutab nyalilda, Ye togosyi noto bik, che ibokyin inendet eng’ kweanaik.

17Amu ngot ko ma yie mogoiywet, Anan ko ma rurio ketikab sabibuk; Koek buch boisietab emdit, Ama biitu amitwogik eng’ mbarenik; Ak kebar akwotisiekab kechirek eng’ biusiek, Ama komi akwotisiekab tuga eng’ biusiek:

18Aboiboitu kora eng’ Jehovah, Aboiboitu eng’ Kamuktaindetab yetunennyu.

19Kimnatennyu Jehovah Kiptaiyat, Ak yaei kelyekyuk koigei che bo cheptirgichet, Ak komutata eng’ oldinwekyuk che tororen. Bo Ne O eng’ Butik, eng’ kibugandinikyuk che bo inoik.

← Chapter 2 Jump to: