Haggai 2

Kalenjin Bible (BUKUIT NE TILIL)

← Chapter 1 Jump to:

1Kinyo ng’olyotab Jehovah eng’ maotiot Hagai, eng’ arawetab tisab, eng’ betutab tiptem ak agenge ne bo arawanato, kole,

2Ng’alalji Serubabel weritab Sealtiel, bounindetab Juda, ak Josua weritab Jeosadak tisiindet ne o, koboto bik che king’et, ilenji,

3Ng’o eng’ okwek ne king’et ne kigeer goi kotinyei torornatennyi ne bo tai? Ak ogeertoi ano nguno? Tos ma u buch eng’ konyekwok?

4Nyiganitu, ee Serubabel, mwaei Jehovah; ak inyiganitu, ee Josua weritab Jeosadak, tisiindet ne o; onyiganitu okwek bik tugul che bo emet, mwaei Jehovah, ak oboisie: amu ami kobotok, mwaei Jehovah ne bo lugosiek,

5ko u ng’olyot ne kigiyomisyige ye kiobwane eng’ Misri, ak kitebe kwenung’wong’ Tamirmiriennyu: amoiyweisie.

6Amu mwaei Jehovah ne bo lugosiek ko u ni kole: Ta atumdumi kogeny konyil agenge, kipsengwet ak ng’ony ak nyanjet, ak emet, eng’ ne matia.

7Ak atumdum bororiosiek tugul, ak kobwa tuguk che chamei bororiosiek tugul, ak anyiit goi torornatet, mwaei Jehovah ne bo lugosiek.

8Chechuk fedaisiek, ak chechuget tahabusiek agichek, mwaei Jehovah ne bo lugosiek.

9Eetu torornatet ne bo let ne bo goi kosiir ne bo tai, mwaei Jehovah ne bo lugosiek: ak agonu kalyet eng’ yuto, mwaei Jehovah ne bo lugosiek.

10Kinyo ng’olyotab Jehovah, eng’ maotiot Hagai, eng’ betutab tiptem ak ang’wan ne bo arawetab sogol, eng’ kenyit ne bo aeng’ ne bo Darius, kole,

11Mwaei Jehovah ne bo lugosiek ko u ni kole: Oteebe tisiik agobo ng’atutik, olenji,

12Ngot koibe chito ngoriennyi banyek che itabanotin, ak kotiiny ngorionoto makatiat, anan sogoriek, anan divaik, anan mwanik, anan amit age tugul, ko tos tililitu? Ak kiwol tisiik kole, Achicha.

13Yeityo komwa Hagai kole, Ngot kotiiny chi age tugul ne ng’wan ne kitwa musto, age eng’ tuguchuto, ko tos ng’wanitu? Ak kiwol tisiik kole, Ng’wanitu.

14Kowol anyun Hagai kole, U noto bichu ak u noto bororioni eng’ tainnyu, mwaei Jehovah, ak u noto boisiet age tugul ne bo eunekwak; ng’wan kit ne igoitoi eng’ oloto.

15Ak asomok anyun nguno, ale obwat koboch betunito ak kwo tai, koboch betut ne kiginde koita agenge baragutab koita age eng’ hekalutab Jehovah:

16eng’ betusiechoto tugul, ye kingwo chi kocheng’ karurugutietab kerutik tiptem, konyoru ne bo kerutik taman kityo; ak kingwo ole kitaage divaik kole koib terenik konom, ko kimi tiptemu ichegei.

17Kiabirenok chelalitiet ak uchatet ak koikab ropta eng’ boisionik tugul che bo eunekwok; ago ma oweekyage, mwaei Jehovah.

18Asomok ale, obwat, koboch betuni ak kwo tai, koboch betutab tiptem ak ang’wan ne bo arawetab sogol, koboch betut ne kigiluume lumeiywotab hekalutab Jehovah, obwat anyun.

19Tos ta komi bek choge? Ee, ma iiyo ketikab sabibuk, anan mogoonik, anan ketikab logoek alak, anan emitik; aberurok anyun koboch betuni.

20Ak kinyonji ng’olyotab Jehovah Hagai, ne bo aeng’, eng’ betutab tiptem ak ang’wan ne bo arawet, kole,

21Ng’alalji Serubabel, bounindetab Juda, ilenji, Atumdumi kipsengwetisiek ak ng’ony:

22ak agabui ng’echeretab laitornatet ne bo bounatosiek, ak ang’eme kimnatetab bounatosiekab bororiosiek; ak agabui karisiek che bo luget, koboto che lanyei; ak kobutyo mbartanyisiek koboto che lanyei, kibarei age tugul eng’ rotwetab chok ne bo tupchennyi.

23Mwaei Jehovah ne bo lugosiek, kole, Anamin eng’ betunoto, ee Serubabel, otwogindennyu, weritab Sealtiel, mwaei Jehovah, ak ayain iige ng’okset, mwaei Jehovah: amu kialewenin, mwaei Jehovah ne bo lugosiek.

← Chapter 1 Jump to: