Jonah 3

Kalenjin Bible (BUKUIT NE TILIL)

← Chapter 2 Jump to: Chapter 4 →

1Ak kinyonji ng’olyotab Jehovah Jona ne bo aeng’, kolenji,

2Ng’eet, ui Ninebe, nganasanato o, ak iamdachi ng’alek che amwaun.

3Kong’eet anyun Jona kwo Ninebe, ko u ng’olyotab Jehovah. Ki nganaset ne o mising’ Ninebe, kibunei chito eng’ betusiek somok.

4Ak kitoi Jona kochut nganaset eng’ bandab betut agenge, ak kiititen kole, Tomo betusiek artamu si keng’em Ninebe.

5Ak kiiyan bikab Ninebe Kamuktaindet; ak kimwaita karugutetab ge, ak kiilaach kuniok, koboch ne o agoi ne ming’in.

6Ak kiit ng’alek oldab laitoriatab Ninebe, ak king’eet eng’ ng’echerennyi ne bo laitornatet ak koreek ngoriennyi, ak kotugegei kuniok, ak kotebe orek.

7Ak kimwaita ak kobarta eng’ Ninebe komugul eng’ ng’atutietab laitoriat ak bikyik che toogunotin, kole, Amat kochamjam kiy chi anan tiony, anan akwetab tuga, anan ko ne bo kechirek: amat koamis, anan koee beek:

8ago ingetuge ichek tugul kuniok, chi ak tiony, ak ingorirji Kamuktaindet eng’ kimnatet: ee, ingoweek chi tugul kometo orennyi ne ya, ak kometo koromnatet ne mi eunekwak.

9Ng’o ne ingen ngo tos ma week Kamuktaindet ak kowal kabwatutikyik, ak kometo neregekyik che koromen, si ma kibegu?

10Ak kigeer Kamuktaindet boisionikwak, kole kaweek kometo orenywa ne ya; ak kiwal Kamuktaindet kabwatutikyik agobo yaitiet, ne kiga mwa kole yachin ichek; ak mata koyai.

← Chapter 2 Jump to: Chapter 4 →