Joshua 7

Kalenjin Bible (BUKUIT NE TILIL)

← Chapter 6 Jump to: Chapter 8 →

1Ago kiyai lagokab Israel chalwokto eng’ kit ne itabanat: amu kiib Akan weritab Karmi, weritab Sabdi, weritab Sera, ne bo bororietab Juda, tuguk alak eng’ che itabanotin, ak kilalyo neregekab Jehovah agobo lagokab Israel.

2Ak kiiyokto Josua bik eng’ Jeriko koba Ai, ne negite Bet-aben, eng’ komostab kong’asis eng’ Be-tel, ak komwachi kolenji, Oba osegei emonoto. Kiba anyun bik kosegei Ai.

3Ak kiweektagei koba ole mi Josua ak kolenji, Amat koba bik tugul; ago ingoba bik olo bo elfusiek aeng’ anan ko somok koba kobar Ai; amat ingong’etyot bik tugul koba olindo; amu ng’ering’ bichoto.

4Koba anyun bik olo bo elfusiek somok: ak kimweune bikab Ai.

5Ak kibar bikab Ai olo bo bik sosom ak lo eng’ ichek: ak kion ichek eng’ ormarichet, kot koit Sebarik, ak kibarat ichek korektoi: ak kimeiyo mugulelwekab bik, kot koigei beek.

6Kigerer anyun Josua ngorikyik, ak kong’uruk kot koit ng’ony togennyi eng’ taitab moingetab Jehovah agoi koskoleny, inendet ak boisiekab Israel; ak kiinde metowekwak temburiek.

7Ak kile Josua, Bwa wee Kiptaiyat Jehovah, amu nee si imutu bichu kolong’une Jordan, si igochech eunekab Amorik, kelusye? Kita kaigai kemeny Jordan bitonin!

8Ee Kiptaiyat, amwae nee anyun, ye kagomweune Israel bunikwak!

9Amu tun kasei Kanamik ak tugul che menyei emet, agobo kiito, ak koyiemech komuutech, ak kotil kainennyo kobet eng’ ng’ony: si iite nee kaineng’ung’ ne o?

10Ak kilenji Jehovah Josua, Ng’eet; amu nee si ibutyi ng’ony ing’uruge ko u ni?

11Kogoyai Israel tengekto; ee, kogobistoe kayomisennyu ne kiga ang’at: ee, kogoib tuguk eng’ che itabanotin; ak kogochorso, ak koberberis, ak kogonde ole mi tugukwak.

12Noto anyun, maimuchi lagokab Israel kotononso eng’ taitab bunikwak, komweune bunikwak, amu kagoek che chubotin: ma ami kobotok kogeny, ngot ko mong’em eng’ kwenung’wong’ kioto itabanat.

13Ng’eet ianyiny bik, ilenji, Oanyinge agobo mutai: amu kamwa ko u ni Jehovah, Kamuktaindetab Israel, kole, Mi kiy ne itabanat kwenung’ung’, ee Israel: memuchi itonone taitab buniguk, agoi oiste kioto itabanat eng’ kwenung’wong’.

14Kimutwok karon origu kobee bororiosiekwok: ak korik bororiet ne namei Jehovah kobee ortinwekwak: ak korik oret ne namei Jehovah kobee gorikwak: ak got ne kanam Jehovah korigu chito agenge agenge.

15Ak inendet ne kinamjin kit ne itabanat kebeelei eng’ mat, chichoto ak tugul che tinyei: amu kobistoe kayomisetab Jehovah, amu koyai abusnatet eng’ Israel.

16Kong’eet anyun Josua karon inne, ak komut Israel korik kobee bororiosiekwak; ak kiginam bororietab Juda:

17ak kiimut inendet oretab Juda korik; ak kinam oretab Seraik: ak kiimut oretab Seraik korik konyonune chito agenge agenge; ak kiginam Sabdi:

18ak kiimut gonnyi konyonune chito agenge agenge; ak kiginam Akan, weritab Karmi, weritab Sabdi, weritab Sera, ne bo bororietab Juda.

19Ak kolenji Josua Akan, Werinnyu, asain ale, igochi torornatet Jehovah, Kamuktaindetab Israel, ng’ang’ji inendet; ak imwawa nguno kit ne koiyai; mat iung’ena.

20Ak kiwolji Akan Josua kolenji, Eng’ iman, ko koayachi tengek Jehovah Kamuktaindetab Israel, ak koayai ko u ni ak ko u ni:

21kingageer eng’ tuguk che kigiluul ngoriet ne kararan ne bo Babulon, ak sekelisiek bogol aeng’ che bo feda, ak tahabu ne u chamaniet ne nyigisindanyi ko sekelisiek konom, agase miat anyun, ak aib; ak ogeero, ung’otin tukchoto eng’ ng’ony, eng’ kwenutab emainnyu, ak tabanu ng’ony feda eng’ tukchoto.

22Koyokto anyun Josua bik, ak kiruai koba emait; ak ogeero, ki ung’otin eng’ emainnyi, ak kitabanu feda ng’ony.

23Ak kiinem eng’ kwenutab emait, ak koipchi Josua, ak lagokab Israel tugul; ak kiinde ng’ony eng’ taitab Jehovah.

24Ak kinam Josua ak Israel tugul, Akan weritab Sera, ak feda, ak ngoriet, ak tahabu ne u chamaniet, ak werikyik, ak tibikyik, ak tukyik, ak sigirokyik, ak kechirekyik, ak emainnyi, ak tugul che kitinyei: ak kiimut koba atebwetab Akor.

25Ak kilenji Josua, Amu nee si inyalilech? Inyalilin Jehovah rani. Ak kilach Israel tugul inendet eng’ koik; ak kobeel eng’ mat, ak kolach ichek eng’ koik.

26Ak kiiruruch koik eng’ baragunnyi, ak mi koichato agoi ra; ak kimeto Jehovah koromnatetab neregekyik. Noto anyun kigiguure kainetab yoto, Atebwetab Akor, agoi ra.

← Chapter 6 Jump to: Chapter 8 →