Jude 1

Kalenjin Bible (BUKUIT NE TILIL)

Jump to:

1Juda, otwogindetab Jesu Kristo, ak ko tupchetab Jakobo, asirjini che kigeguur, che chamotin eng’ Jehovah Kwanda, ak ko ribotin agobo Jesu Kristo:

2Ingotesak rirenet eng’ okwek ak kalyet ak chamnyet.

3Chamanichu, ye kiagiilige mising’ asirwak agobo yetunet ne kiyamdoi, ageer ale nyoljina asirwak ateeiywok ale ogiiljige mising’ kayanet ne kigigochi che tililen konyil agenge kityo.

4Amu mi bik alak che kichut orit eng’ ung’ot, ichek che kigichopchi kiruogoni koboch keny, bik che maiywei Jehovah, che walei mieindab Jehovah nenyo koek maget ne ya, ak koesioi Laitoriandennyo, ne inegei, ak ko Kiptaiyandennyo Jesu Kristo.

5Amache anyun abwatwok, agot nganda kionai komie tuguchu tugul, ale kingosor Kiptaiyat bik komong’ eng’ emetab Misri, eng’ let kobar ichek che kima iyan.

6Ak kiinde malaikaisiek che kima rib bounatenywa, ago kibagakta meng’otet ne ki nenywa, kiinde kotebe ratisiosiek che bo koigeny eng’ mesundeito kot koit kiruogetab betut ne o.

7Ko u noto, agot Sodom ak Gomora, ak nganasok che kiga yiem, kingo kagogochigei sokset, ko u chuto, koba kosub borwek che ma kergei ak chechuak, ko kiginde koek kaborunet, konyalilso eng’ kiruogetab mat ne bo koigeny.

8Imuruoni agichek chuto ko u noto borwek eng’ karuotitaosiekwak, ak kosasei kiptainatet, ak kochubei che tororen.

9Ago ye kingobaregei Mikael, malaikaiyat ne o, ak oindet, kotiitos agobo mustab Musa, ko ma kany koipchi inendet kiruogetab chubet, ago kile, Ingogerin kong’ Kiptaiyat.

10Ago chubei bichu tuguk alak tugul agot che maingen: ak tuguk che kiguitos ichegei ko u biteenywa, ko u tiong’ik che matinyei ng’omnatet, king’emei eng’ tuguchuto.

11Bwa ichek! Amu kiisub oretab Kaen, ak kogochigei mastaetab Balaam komach melekto, ak kilusyo eng’ ngelelnatetab Kora.

12Bichuto ko ruandosiek che ung’otin eng’ igorwekwok che bo chamnyet ye oamisiei tugul, mestowek che amisiei ichegei ama iyweisiei; bolik che matinyei beek, che iboti usonaik; ketik che matinyei logoek, che kigobek konyil aeng’, che kigitut ak tigitik;

13mildaetab ge ne korom ne bo nyanjet; che igutu kalilanenywa; kecheik che ombenioti, che kigigonorji tuuindab mesundeito ne bo koigeny.

14Ak kimaoten Enok agine, chito ne bo tisab koboch Adam, koamdochi bichu kole, Ogeero, kinyo Kiptaiyat koboto bikyik che tililen elfusiek ng’isiat,

15konyo koyachi kiruoget tugul, ak koruokyi tugul che maiywei Jehovah eng’ boisionikwak tugul che yaachen che kigoyai ko maiywei Jehovah, ak ng’alekwak tugul che uuen che kimwa kiptengeginik che maiywei Jehovah, agobo inendet.

16Chuto ko che ing’unyng’ung’dos, kiptiyotinik, che isubi magutikwak che yaachen (ak komwaei kutuswekwak ng’alek che koromen che bo menotet), che tiytii bik si konyor kelunet.

17Ago okwek, chamanichu, obwat ng’alek che kigomwa eng’ tai che kiyoktoi che bo Kiptaiyandennyo Jesu Kristo;

18ko u ye kimwawok, kole, Tun biitu chombilik eng’ betusiekab let, che isubi magutikwak che yaachen che ma bo kaiyweetab Jehovah.

19Chuto che ibu kabesiosiek, che isubi borwek, che matinyei Tamirmiriet.

20Ago okwek, chamanichu, ogimitge eng’ kayaneng’wong’ ne tilil mising’, ak osae eng’ Tamirmiriet ne Tilil,

21oripge eng’ chamnyetab Jehovah, ogeni rirenetab ge ne bo Kiptaiyandennyo Jesu Kristo kot koit sobondab koigeny.

22Ak orire alak che tinyei saget;

23ak osoru alak, ong’usu komong’ eng’ mat; ak orire alak eng’ kaiyweisiet; ye oweche agot ngoriet ne kagomuruonit eng’ borto.

24Ingobunji anyun nguno inendet ne imuchi koribok si mobutye, ak kondeak taitab torornatennyi eng’ boiboiyet ne o ko motinye tisia,

25kobunji Jehovah ne inegei, ne Yetindennyo, eng’ Jesu Kristo Kiptaiyandennyo, torornatet, etunatet, bounatet ak kimnatet, koboch keny, ak nguno, ak agoi koigeny. Amen.

Jump to: