Nahum 3

Kalenjin Bible (BUKUIT NE TILIL)

← Chapter 2 Jump to:

1Bwa nganasetab korotik! Nyiitat lembechek ak rebisiet; maigesugei che kibarei.

2Cheetab kipcharitit, ak kirgirenetab karisiek; ak cheetab mbartanyisiek che torombendos, ak cheetab karisiekab luget che torombendos;

3bik che lanyei mbartanyisiek, kalyeletab rotwetab chok, ak ng’otit ne lilei bich; ak chang’indab che kagebar, karurugutiet ne o ne bo muswek: maigesugei muswek; riichei muswekwak ichek:

4amu chang’indab kugoinatosiek che bo chepkugoniot ne kararan, kwondo ne bou bonisiosiek, ne aldoi bororiosiek eng’ kugoinatosiekyik, ak koaldoi bikab or ne bo chi eng’ bonisiosiekyik.

5Keero, aborienen, mwaei Jehovah ne bo lugosiek, ak ang’anye ngoroiguk kot koit metit; ak aborjin bororiosiek imi ach ngor, ak kaborji bounatosiek tewernateng’ung’.

6Ak awirenen tuguk che samis che kiwechei, ak ayain iyaitu, ak andein iegu kit ne kitang’ang’jin.

7Ak tun mweenen tugul che keerin, ak kole, Kageng’em Ninebe: ng’o ne rirjin? Anyorjini ano che igoigoin?

8Tos i kaigai isiir No-amon, ne kimi kwenutab ainosiek, ne kitinyei beek che kiyiem; ne ki irimennyi nyanjet, ne ki inatunnyi nyanjet?

9Ki kimnatennyi Etiopia ak Misri, ak kima kotinyei ole boch; ki toretiguk Put ak Lubik.

10Ago kigimut, kigiluul: kigitonaton kogeny lagokyik eng’ tabanwekab ortinwek tugul; ak kiser barbarek agobo bikyik che konyitotin, ak kerate sirimwek bikyik tugul che eechen.

11Ibogiti aginye, kiunyin; icheng’e aginye irimet amu bunyot.

12Igeitu irimoiguk tugul mogoonik che tinyei logoekwak che tongoanik: ngitumdum kobutyin kutitab amindet.

13Keero, kwonyik biguk che mi kwenung’ung’; kagiyatyi buniguk ormarichokab emeng’ung’: kagobeel mat temeleiyweguk.

14Ram beek che bo betusiek che kiyiemenen, igimit irimoiguk: ui ole mi menet, ak itiech ng’atatiat, ak igimit ole kibeele matabaruk.

15Igesun mat eng’ oloto; barin rotwetab chok, igesun ko u tinapchet: chang’itu ko u tinapchet, chang’itu ko u chereng’endet.

16Kiites chemung’arainiguk kosiir kecheikab kipsengwet: ng’emisioti tinapchet, yeityo kotiriren kwo.

17Te chereng’enyinik biguk che kigilaakyi nariet, ak u talamik che chang’ kiptainiguk che bo luget, che menyei ng’otonok eng’ betutab kaititiet, ak komwei ye kachor asista, ama kinai ole kaba.

18Inuuktos mestoweguk, ee laitoriatab Asuria: imuunyi biguk che bo teegisto: kiyestochi biguk tulonok, ama mi chi ne iyumi.

19Mami kiy ne isoobi moeng’ung’; ng’wan ng’otobeng’ung’: iraprabi eunek agobo inye tugul che kasei ng’alek agobo inye; amu ng’o ne ma ibutyi yaitieng’ung’ kotugul?

← Chapter 2 Jump to: