Philippians 1

Kalenjin Bible (BUKUIT NE TILIL)

Jump to: Chapter 2 →

1Paulo ak Timoteo, otwogikab Kristo Jesu, kisirjini tugul che tililen eng’ Kristo Jesu che mitei Pilipi koboto ribikab kaniset ak kiboitinik:

2Ingoteb mieindo kobotok ak kalyet che bunu Jehovah Kwandanyo ak Kiptaiyat Jesu Kristo.

3Amwachini Jehovah nenyu kongoi agobo kabwatennyu tugul ne abwatok,

4eng’ somennyu age tugul agobo okwek tugul, asome eng’ somennyu eng’ boiboiyet kotugul,

5amu yamdaeng’wong’, eng’ logoiywek che miach koboch betut ne bo tai agoi betuni;

6angen komie ng’olyondonito, ale inendet ne kitoi boisiet ne mie eng’ okwek koyaei kosulda agoi betutab Jesu Kristo:

7ko u ye mie eng’ ane abwat ko u nito agobo okwek tugul, amu omi muguleldanyu, amu eng’ monjorornatennyu, ak eng’ ripset ak kagimitetab logoiywek che miach, okwek tugul ko o yamdoik kobota eng’ mieindo.

8Amu Jehovah baoriandennyu, ko u ye ating’enok okwek tugul emosto eng’ rirenosiekab Kristo Jesu.

9Ak ni ko saennyu ale kotesak chamnyeng’wong’ mising’ inne eng’ naet ak kaguiyet tugul;

10si kobiit onai komie tuguk che bo telunatet; si kobiit oegu che matinyei kenisiet, che matinyei kanagut agoi betutab Kristo;

11ko o nyiitotin eng’ logoekab imanda, che bunu Jesu Kristo, agoi torornatet ak kalosunetab Jehovah.

12Ago amache, che kitupche, ale, onai ole tuguk che kibwanja, ko kigotoret logoiywek che miach koba tai;

13kot kotook monjorornatennyu agobo Kristo eng’ askarik tugul che bo gab laitoriat, ak eng’ bik alak tugul;

14ak tinyei che chang’ eng’ che kitupche eng’ Kiptaiyat nyiganatet ne o kosiir, komwaita ng’olyotab Jehovah ama eng’ kaiyweisiet, amu tinyei kamang’unet agobo monjorornatennyu.

15Amdoi alage Kristo eng’ ng’etkonda, ak suriet; koamdoi alage agichek eng’ kabwatutik che miach;

16amdoi alage eng’ chamnyet, kongen kole kigindea arib logoiywek che miach:

17ago amdoi alage Kristo eng’ toiyet, ma eng’ mugulelwek che leelach, kolen teswa nyalilda eng’ monjorornatennyu.

18Nee anyun? Kobate kityo eng’ oret age tugul, ngo eng’ kenisiet anan ngo eng’ imanit, keamdoi Kristo; ak abaibai eng’ noto, ee, ak ta abaibaitu.

19Amu angen ale walaksei nito koegu yetunennyu, eng’ someng’wong’, ak ne konu Tamirmirietab Jesu Kristo.

20Ko u eng’ kagenisiennyu ne ageni mising’ ak kamang’unennyu, ale magigona alilan eng’ kiy age tugul ago eng’ nyiganatet tugul, ko u kotugul, ko u noto agine nguno kitorori Kristo eng’ bortanyu, ngo eng’ sobondo, anan eng’ meet.

21Amu eng’ ane ngasobe ko Kristo, ak ngamee ko borotet.

22Ago ngasobe eng’ borto, - ngo nito logoekab boisiennyu, ko mangen anyun ne aleweni.

23Amu kagigikya kwenutab tuguk aeng’, atinye maget awa ketebi ak Kristo; amu mie noto mising’ kosiir:

24ago ngatebi eng’ borto konyolu kosiir agobo okwek.

25Ak atinye kamang’unoni, ak angen ale atebye, ee, ak ta atebye kobotok okwek tugul, agobo teseng’wong’ bo tai ak boiboiyet eng’ kayanet;

26si kobiit kotesak kalosuneng’wong’ eng’ Kristo Jesu eng’ ane, amu ami kobotok kogeny.

27Ago ingoek atebeng’wong’ ne nyoljin logoiywek che miach che bo Kristo: si ngot anyo ageerok anan ngo mami ane, amuchi agas agobo atebeng’wong’, kele otonondosi komie eng’ tamirmiriet agenge, eng’ muguleldo agenge ogiilige agobo kayanetab logoiywek che miach;

28amat komuok bunik eng’ kiy age tugul: noto kaborunet ne toogunot ne bo luset eng’ ichek, ago bo yetuneng’wong’, ak bunu noto Jehovah;

29amu kigigonok agobo Kristo, ma oyan inendet kityo, ago onyalilye agobo inendet:

30otinye lugonoto kiogeerena, ak ogase nguno kele mi eng’ ane.

Jump to: Chapter 2 →