1 John 1

Krio (Krio Fɔs Oli Baybul)

Jump to: Chapter 2 →

1Wi de rayt to una bɔt di Wɔd we gɛt layf, we bin dɔn de frɔm we Gɔd mek di wɔl. Wi dɔn yɛri am, wi dɔn si am wit wi yon yay, ɛn wi dɔn tɔch am wit wi an.

2Dis layf ya kam na wɔl ɛn wi si am; na dat mek wi de tɔk bɔt am ɛn wi de tɛl una se dis layf ya we go de sote go bin de wit di Papa ɛn na di Papa sɛn am to wi.

3Wi de tɛl una bɔt wetin wi dɔn si ɛn yɛri, so dat wi ɔl go jɔyn an togɛda. We wi jɔyn an togɛda na wit di Papa ɛn in Pikin, Jizɔs Krays.

4Wi de rayt ɔl dis to una fɔ mek wi ɔl gladi gud gud wan.

5Dis na di mɛsej we Gɔd in Pikin tɛl wi ɛn nain wi de tɛl una: Gɔd na layt; daknɛs nɔ de pan am atɔl.

6If wi se wi jɔyn an wit am, ɛn wi de waka na dak, dat min se wi de lay. Wi nɔ de tɔk tru ɛn wi nɔ de du wetin rayt.

7Bɔt if wi de waka na di layt lɛkɛ we in na di layt, wi jɔyn an wit wi kɔmpin dɛn; Gɔd in Pikin, dat na Jizɔs, in blɔd go pul ɔl wi sin kɔmɔt pan wi ɛn mek wi klin.

8If wi se sin nɔ de na wi layf, wi de mek wisɛf ful, ɛn wi nɔ de tɔk tru.

9Bɔt if wi tɛl Gɔd bɔt wi sin dɛn, in we de du di rayt tin ɔltɛm ɛn ɔl wetin i prɔmis, wi kin abop se i go padin wi sin dɛn ɛn i go pul ɔltin we bad kɔmɔt na wi layf ɛn mek wi layf klin.

10If wi se wi nɔ sin wande, wi de se Gɔd de lay, ɛn in wɔd nɔ gɛt ples na wi layf.

Jump to: Chapter 2 →