2 John 1

Krio (Krio Fɔs Oli Baybul)

Jump to:

1Mi, Jɔn we na una bigman na di chɔch, de rayt to di uman we Gɔd dɔn pik ɛn in pikin dɛn we a lɛk fɔ tru. Nɔto mi wangren, bɔt ɔlman we no wetin tru, lɛk una,

2bikɔs wetin tru de na wi at ɛn i go de wit wi sote go.

3Mek Gɔd wi Papa, ɛn in Pikin, Jizɔs Krays, blɛs wi, sɔri fɔ wi, ɛn gi wi kol at; mek ɔl dɛn tin ya bi to wi we no ɛn biliv wetin tru ɛn lɛk wi kɔmpin mɔtalman.

4A bin gladi bad we a yɛri se sɔm pan yu pikin dɛn de fala wetin tru, lɛkɛ aw wi Papa tɛl wi fɔ du.

5So, uman we a lɛk fɔ tru, a de beg yu: lɛ wi lɛk wi kɔmpin. Dis tin we a de rayt tɛl yu fɔ du, nɔto nyu tin; na tin we wi bin dɔn no frɔm we yu bi Kristiɛn.

6Di kayn lɛk we a min nain dis: Wi fɔ lɛk wi kɔmpin lɛkɛ aw Gɔd tɛl wi fɔ du. Wetin una bin dɔn yɛri frɔm we una bi Kristiɛn nain dis: Una ɔl fɔ lɛk una kɔmpin.

7Plɛnti pipul we de mek dɛn kɔmpin ful de ɔlɔbɔt na wɔl, dɛn nɔ de tɔk se Jizɔs Krays kam na wɔl lɛkɛ mɔtalman; dɛn de lay ɛn dɛn nɔ lɛk Krays.

8Una tek tɛm, mek una nɔ lɔs wetin una dɔn wok fɔ, so una go gɛt ɔl wetin Gɔd dɔn prɔmis una.

9Ɛnibɔdi we nɔ jɛs de lan pipul wetin Krays lan am nɔmɔ, bɔt i de lan dɛn ɔda tin miks, da pɔsin de nɔ gɛt Gɔd nain at. Ɛnibɔdi we de lan pipul wetin Krays lan am, di Papa ɛn in Pikin de nain at.

10If ɛnibɔdi we nɔ biliv wetin Krays dɔn lan wi, kam to una fɔ lan una ɛnitin, una nɔ fɔ kip am na una os; una nɔ fɔ tɛl am adu sɛf.

11Bikɔs ɛnibɔdi we tɛl am adu dɔn jɔyn an wit am fɔ du di bad wok we i de pan.

12A gɛt plɛnti tin fɔ tɛl una, bɔt a nɔ want rayt ɔltin wit pɛn ɛn pepa; misɛf abop fɔ kam luk una ɛn tɔk to una fes to fes, so dat wi go gladi gud gud.

13Yu sista, we Gɔd dɔn pik, in pikin dɛn de tɛl yu adu.

Jump to: