2 Timothy 1

Krio (Krio Fɔs Oli Baybul)

Jump to: Chapter 2 →

1Na mi Pɔl, we dɔn bi Krays Jizɔs in apɔsul bikɔs Gɔd want mi fɔ bi so, na mi Gɔd sɛn fɔ kam tɔk bɔt di layf we i prɔmis fɔ gi wi, ɛn we wi gɛt bikɔs wi gɛt wanwɔd wit Krays Jizɔs.

2Na mi de rayt to mi pikin, Timoti, we a lɛk. Mek Gɔd we na wi Masta Jizɔs Krays in Papa sho yu aw i gud, mek i sɔri fɔ yu ɛn mek i gi yu kol at.

3A tɛl Gɔd tɛnki ɛn a de du in wok lɛkɛ aw i want mi fɔ du am, lɛkɛ aw mi grampapa papa dɛn bin de du. Wɛn a de pre fɔ yu de ɛn nɛt a kin tɛl am tɛnki.

4A mɛmba we yu bin de kray di tɛm we a bin lɛf yu, ɛn a want si yu bad, so dat mi at go gladi.

5A mɛmba aw yu biliv Gɔd wit ɔl yu at lɛkɛ yu grani Lɔis ɛn yu mami Yunaysi. A shɔ se yusɛf biliv Gɔd lɛkɛ dɛn.

6Na dat mek a de mɛmba yu fɔ bigin yus di spɛshal pawa bak we Gɔd bin gi yu da tɛm we a bin put mi an na yu ed ɛn pre fɔ yu.

7Di Spirit we Gɔd dɔn gi wi nɔto spirit we de mek wi fred, i de mek wi gɛt maynd, i de put lɛk na wi at ɛn i de mek wi ebul kɔntrol wisɛf.

8So yu nɔ fɔ fred fɔ tɔk bɔt wi Masta in wok; ɛn yu nɔ fɔ shem fɔ mi we de na jel fɔseka di Masta. Bɔt, yu fɔ gɛt yu yon pan di sɔfa we dɛn Kristiɛn de sɔfa fɔseka di Gud Nyuz, wit di pawa we Gɔd gi yu fɔ mek yu ebul bia.

9Gɔd nɔ sev wi ɛn kɔl wi fɔ bi in yon pipul fɔseka ɛnitin we wi dɔn du, bɔt na fɔseka wetin in bin dɔn mekɔp fɔ du bifo di wɔl bigin ɛn bikɔs i gud. Na tru Jizɔs Krays i mek wi no di gud we i du.

10Gɔd dɔn sho wi di gud we i du plen wan naw, we wi Seviɔ, Jizɔs Krays dɔn kam. I dɔn pwɛl di pawa we day bin gɛt pan mɔtalman, ɛn i dɔn mek pipul no bɔt da layf we go de sote go, bay di Gud Nyuz we wi de tɛl dɛn.

11Gɔd dɔn pik mi fɔ sɛn mi go lɛkɛ apɔsul fɔ tɛl pipul di Gud Nyuz ɛn fɔ lan dɛn bɔt am,

12ɛn na di rizin dis we mek a de sɔfa ɔl dɛn tin ya. Bɔt a nɔ de dawt at ɔl, bikɔs a no di wan we a abop pan; a no fɔ tru se i ebul kip ɔl wetin i dɔn gi mi fɔ du sote di de we Krays go kam bak.

13Dɛn tru wɔd we a tɛl yu, yu fɔ put ɔl yu at pan dɛn; na dɛn yu fɔ de fala pan ɛnitin we yu de du, yu nɔ fɔ lɛf fɔ biliv Gɔd lɛkɛ aw yu biliv am naw, ɛn yu nɔ fɔ tap fɔ lɛk yu kɔmpin. Na bikɔs wi gɛt wanwɔd wit Jizɔs Krays mek wi ebul biliv Gɔd ɛn lɛk wi kɔmpin so.

14Kip dɛn gud tin ya we Gɔd dɔn gi yu bay in Spirit, we de insay wi, in pawa.

15Yu no se ɔlman na wan pat na Eshya bin lɛf mi go. Fijɛlɔs insɛf wit Amojinis dɔn lɛf mi go.

16Mek di Masta blɛs Onɛsifɔrɔs wit in wɛf ɛn pikin dɛn bikɔs i kɔrej mi plɛnti tɛm. I nɔ shem bikɔs a de jel,

17bɔt jɛs i rich Rom so, i bigin luk fɔ mi wantɛm te i si mi.

18Lɛ Masta Jizɔs Krays mek Gɔd di Masta sɔri fɔ am di de we Jizɔs go kam bak! Yusɛf no di wok we i du na Ɛfisɔs.

Jump to: Chapter 2 →