Genesis 37

Krio (Krio Fɔs Oli Baybul)

← Chapter 36 Jump to: Chapter 38 →

1Jekɔb bin tap na Kenan, usay in papa bin de,

2ɛn dis na di stori bɔt Jekɔb ɛn in fambul dɛn. We Josɛf ol sɛvintin ia, i bin de mɛn ship ɛn got wit in brɔda dɛn dat na: dɛn wan we in papa bɔn wit Bila ɛn Zilpa, in ɔda wɛf dɛn. Josɛf bin de tɛl in papa bɔt di bad tin dɛn we in brɔda dɛn bin de du.

3Jekɔb bin lɛk Josɛf pas ɔl in ɔda bɔypikin dɛn, bikɔs i bɔn am we i dɔn ol. I mek wan fayn lɔŋsliv gawn fɔ am.

4We di brɔda dɛn si se dɛn papa lɛk Josɛf pas dɛn, dɛn et am ɛn dɛn nɔ bin de tɔk fayn to am.

5Wan nɛt Josɛf drim, ɛn i tɛl in brɔda dɛn di drim, dat mek dɛn et am mɔ ɛn mɔ.

6I tɛl dɛn fɔ lisin to di drim we i drim.

7I se dɛn ɔl bin de na fam de kɔt wit, nain in yon bɔndul grap tinap tret wan, dɔn dɛn yon bɔndul dɛn gɛda rawnd in yon ɛn baw to in yon.

8In brɔda dɛn aks am se if i tink se i go bi kiŋ ɛn rul dɛn. So dat mek dɛn et am mɔ ɛn mɔ.

9Afta dat Josɛf bin drim ɔda drim bak we i tɛl in brɔda dɛn. I se, i gɛt ɔda drim, ɛn insay dis drim i si di san, di mun, ɛn ilɛvin sta dɛn baw to am.

10We i tɛl in papa dis drim, in papa tɔk pan am ɛn aks am uskayn drim dat. I se if Josɛf tink se in, in mami, ɛn in brɔda dɛn go kam baw to am

11Josɛf in brɔda dɛn bin de jɛlɔs am bɔt in papa in bin de tink bɔt di drim ɛn de wɔnda wetin i min.

12Wande we Josɛf in brɔda dɛn bin dɔn go na Shɛkɛm fɔ go mɛn dɛn papa in ship ɛn got dɛn,

13nain Jekɔb tɛl Josɛf se in wan mek i go na Shɛkɛm usay in brɔda dɛn de mɛn di ship ɛn got dɛn. Josɛf ansa se in rɛdi

14In papa tɛl am se lɛ i go luk if ɔltin ɔlrayt wit in brɔda dɛn ɛn di ship ɛn got dɛn, ɛn kam bak kam tɛl am. So Josɛf lɛf in papa na Ɛbrɔn vali ɛn go na Shɛkɛm.

15I bin de wirɔn de we wan man si am ɛn aks am se, “Bɔbɔ wetin yu de luk fɔ?”

16Josɛf ansa se, “A de luk fɔ mi brɔda dɛn, sa. Yu kin tɛl mi usay dɛn de wit di ship ɛn got dɛn?”

17Di man ansa se, “Dɛn dɔn kɔmɔt ya. A yɛri dɛn se dɛn de go na wan ples we nem Dotan.” So Josɛf go mit in brɔda dɛn na Dotan.

18We dɛn si am fawe de kam, dɛn bigin fɔ tay bagin wantɛm fɔ kil am.

19Dɛn tɛl dɛn kɔmpin se, “Luk Josɛf di drima.

20Una lɛ wi kil am ɛn trowe in bɔdi insay wan pan dɛn dray wɛl ya so. Wi go se na wan wayl bush animal kil am. Dɔn wi go si wetin go apin to in drim dɛn.”

21We Rubɛn yɛri dis i tray fɔ sev Josɛf. I tɛl dɛn se, lɛ dɛn nɔ kil am.

22Bifo dat lɛ dɛn trowe am insay di ol, bɔt lɛ dɛn nɔ kil am. I bin se so, bikɔs i bin mekɔp fɔ kam pul am ɛn sɛn am bak to in papa.

23We Josɛf rich to in brɔda dɛn, dɛn pul in fayn lɔŋsliv gawn pan am.

24Dɔn, dɛn tek am ɛn trowe am insay di ol. Di ol bin ɛmti ɛn i nɔ gɛt wata.

25Wɛn dɛn sidɔm fɔ it, na de dɛn si sɔm Ishmɛlayt dɛn de kɔmɔt Giliad de go na Ijipt. Dɛn bin lod dɛn kamɛl dɛn wit spays, gɔm, ɛn ɔda tin dɛn.

26Juda aks in brɔda dɛn se us bɛnifit dɛn go gɛt if dɛn kil dɛn brɔda ɛn tray fɔ kɔba wetin dɛn dɔn du.

27I se lɛ dɛn sɛl am gi dɛn Ishmɛlayt dɛn. Mek dɛn nɔ du ɛnitin bad wit am, afta ɔl na dɛn brɔda, dɛn yon flɛsh ɛn blɔd. In ɔda brɔda dɛn bin gri wit am. We di Ishmɛlayt treda dɛn rich dɛn,

28dɛn pul Josɛf kɔmɔt insay di wɛl ɛn sɛl am fɔ twɛnti silva kɔpɔ to di Ishmɛlayt dɛn we kɛr am go na Ijipt.

29We Rubɛn kam bak na di ol ɛn si se Josɛf nɔ de de, i so fil am dat i chɛr chɛr in klos.

30So i go bak to in brɔda dɛn ɛn se di bɔbɔ nɔ de na di wɛl. So wetin in go du naw.

31Afta dat dɛn bin kil wan got ɛn dɛn dɔk Josɛf in fayn fayn gawn insay di blɔd.

32Dɔn dɛn tek di gawn ɛn kɛr am go to dɛn papa ɛn tɛl am se, “Luk wetin wi fɛn. Na yu pikin gɛt am?”

33Wɛn Jekɔb si di klos i sabi am wantɛm. I se, “Yɛs na Josɛf in yon! Bad bif dɔn kil am. I dɔn chɛr mi pikin Josɛf in bɔdi pispis.”

34Jekɔb chɛr in yon klos we i bin wɛr, dɔn i wɛr munin. I munin fɔ in pikin fɔ lɔŋ.

35In pikin dɛn tray fɔ kɔrej am bɔt i nɔ tek. I se, in wan day go mit in pikin na Shiol wit di munin. I bin stil de kray fɔ am.

36We di Ishmɛlayt dɛn rich Ijipt dɛn sɛl Josɛf to Pɔtifa, we na bin wan pan di kiŋ in ɔfisa dɛn. In na bin di kapten fɔ di gyad dɛn na di kiŋ in os.

← Chapter 36 Jump to: Chapter 38 →

Recommended Reading

Commentary Genesis Commentaries → Devotional Genesis Devotional Guide → Get This Bible Krio (Krio Fɔs Oli Baybul) Study Bible →