Hosea 12

Krio (Krio Fɔs Oli Baybul)

← Chapter 11 Jump to: Chapter 13 →

1Ifrem in jɛs de wes in tɛm ol de. Na soso lay ɛn fɔls layf i de pan. Dɛn dɔn mek bagin wit Asiria ɛn dɛn de tredin wit Ijipt.

2PAPA GƆD dɔn pas jɔjmɛnt pan Juda, ɛn i go pɔnish Jekɔb in pipul fɔ wetin dɛn du ɛn na so dɛn go gɛt dɛn pe.

3Wɛn Jekɔb bin de nain mama in bɛlɛ, nain brɔda i bin de fɛt, dɔn we i big, i fɛt wit PAPA GƆD.

4I rasul wit enjɛl ɛn win am. I kray ɛn beg di enjɛl fɔ blɛs am. I mit PAPA GƆD na Bɛthɛl ɛn dɛn tu tɔk.

5PAPA GƆD we na Ɔlmayti Gɔd, we in pawa pas ɔl, nain nem PAPA GƆD.

6Naw, i want dɛn fɔ kam bak to PAPA GƆD. Lɛ dɛn tek in wɔd fɔ lɛk dɛnsɛf, trit dɛn kɔmpin fayn ɛn jɛs de du wetin PAPA GƆD want.

7PAPA GƆD se, biznɛsman we de rog de ɛnjɔy we i de pas am pan pipul.

8Ifrem in de blɔf se dat dɔn mek i jɛntri bɔt ɔl wetin i dɔn gɛda fɔ insɛf nɔ du fɔ pe fɔ di bad nem we i dɔn gɛt.

9I se in na PAPA GƆD dɛn Gɔd frɔm di tɛm we dɛn de na Ejipt. So in kin stil mek lɛ dɛn tap na dɛn bafa dɛn, tɛm dɛn we dɛn gɛt gladi-gladi.

10I mɛmba dɛn se nain bin de tɔk to di prɔfɛt dɛn; i bin lɛ dɛn de gɛt bɔku vishɔn ɛn kin gi dɛn parebul fɔ di pipul.

11I se if di pipul na Giliad de pan sin, dɛn go pe dia wan fɔ dat; if dɛn de mek sakrifays to ɔda gɔd dɛn na Giliad, i se, i go nyamanyama dɛn ɔlta dɛn we de na dɛn fil dɛn we dɛn dɔn mek fayn.

12Ozie se Jekɔb we na bin dɛn fɔstɛm-papa bin rɔnawe go na Aram usay i mɛn ship bifo dɛn gi am wɛf.

13Na wan prɔfɛt PAPA GƆD yuz fɔ pul Izrɛl kɔmɔt Ijipt ɛn na prɔfɛt bak i yuz fɔ mek shɔ se dɛn de du wetin PAPA GƆD want.

14Di pipul naw dɔn provok PAPA GƆD te i dɔn vɛks, so PAPA GƆD go jɛs lɛf dɛn to dɛnsɛf ɛn pɔnish dɛn fɔ ɔl wetin dɛn dɔn du.

← Chapter 11 Jump to: Chapter 13 →