Jonah 2

Krio (Krio Fɔs Oli Baybul)

← Chapter 1 Jump to: Chapter 3 →

1So Jona pre to PAPA GƆD we i de insay di fish in bɛlɛ,

2i se, “Wɛn a bin de pan siriɔs trɔbul, a pre to PAPA GƆD, ɛn i ansa mi. Di tɛm we a de usay dayman de, a pre ɛn i yɛri mi.

3I sɛn mi go rayt dɔŋ, rayt insay di wata, we na soso wata a de si, ɛn di wevs dɛn jɛs de baŋ mi.

4A bin min se i dɔn fɔgɛt bɔt mi ɔltogɛda ɛn a nɔ go ebul go nain oli os igen

5Di wata kɔba mi, a bin de dip dip insay di wata; ɛn di plant dɛnsɛf we kin de insay wata ɔl rap na mi ed.

6I bin tan lɛk we pɔsin de bɔtɔm mawnten, we i nɔ gɛt fɔ si pantap am igen; bɔt PAPA GƆD, yu we na mi GƆD, pul mi kɔmɔt de ma.

7Di tɛm we mi at ɔl dɔn pwɛl, a mɛmba PAPA GƆD, dɔn a pre to am, ɛn i yɛri mi insay in os we oli.

8Dɛn wan we fasin fɔ wɔship dɛn ɔda gɔd dɛn de pwɛl rod fɔ dɛnsɛf.

9Bɔt a go tɛl yu tɛnki ɔltɛm; a go mek sakrifays ɛn du wetin a bin se a go du. Na PAPA GƆD nɔmɔ de pul pɔsin pan trɔbul.”

10So PAPA GƆD tɛl di fish we bin swɛla Jona fɔ vɔmit am na di shɔ, ɛn i vɔmit am.

← Chapter 1 Jump to: Chapter 3 →