1 Timothy 2

Kurukh NT 2025

← Chapter 1 Jump to: Chapter 3 →

1পাহিলা এংহা ই গোহরারনা, যেনু হোর্মা আলার খাতরী ধার্মেস হেদ্দে বিন্তী নান্না, গোহরারনা, দোশরার খাতরী বিন্তী আউর ধানিয়াবাদ চিইনা মানি।

2নামহা বেল আউর নেখায় ক্ষেমতা রাঃয়ী, আরঘী খাতরীহু বিন্তী নানা লাগ্গো, যেনু নাম পুরাসে ধার্মেসিন ভাক্তি এদারকি সাম্মাননু, শালসান্তনু আউর ছাছেম রাঃআরকি জীয়া কাড়তা অংগোদাত।

3ইদ দাও, আউর নামহা বাছাবাঃউু ধার্মেসঘী হেদ্দে ইন্‌জিরনা লেখা,

4আস চাহাদাস, যেনু হোর্মা আলার বাছরা অংগোনার আউর সাচ্চান পুরাসে আঃখা অংগোনার।

5কারনে ধার্মেস অর্তোসদিম রাঃদাস, আউর অর্তোস রাঃদাস নে আল আউর ধার্মেসঘী মাঝিনু শালসান্ত নান্না খাতরী আগুয়া মান্দাস, আসিম যীশু খ্রীস্তাস, নে তানিম অরোত আল রাঃচাস।

6যীশুস হোর্মা আলারিন বাছাবাঃনাঘী দামে লেখা তাংহা জীয়ান চিচ্চিকা রাঃচাস, এগদা ঠিকা সামাইনু অন্টা গাওয়াহী রাঃচা।

7ই গাওয়াহী চিইনা খাতরী ধার্মেস এংগান দাও বাচান আখতু লেখা, তাইকা আউর অযিহুদীরঘী হেদ্দে বিশুয়াস আউর সাচঘী শিরষা চিইনা খাতরী এংগান গুরু লেখা চাজ্জিয়াস হোচ্চাস। এন সাচ কাত্থা বাঃআ লাগদান ঝুট কাত্থা মাল বাঃআ লাগদান।

8এন চাহাদান যেনু হুর্মি আড্ডানু মেতার ঝাগড়া আউর মাল রাঘারারকি নেমহা কুহিনু ক্ষেক্ষা চোওদারকি বিন্তী নান্নার।

9ঠিকা আন্নেম এন ইদিন চাহাদান, হোর্মা যানানার ঠিকাসে তাংগা তিংগান চালাবাঃআরকি যোগ্গে কিচরী আত্তেনার। আর তামহা চুটটিন ঢের রাকাম মাল হেএনার, সোনা, মুতিন আউর বাগ্গু বাগ্গু দামঘী কিচরী তারু তাংগা তিংগান মাল সাপড়ারনার।

10আদিঘী বাদলা যানানার যেনু দাওলে দাওলে নালাখ তারু তাংগা তিংগান সাপড়ারনার, নে নে ধার্মে সেওয়ানানু, আরঘী খাতরী ইদিম যোগ্গে।

11অরোত যানানা যেনু ছাছেমসে আউর পুরাসে হুর্মি কাত্থান মানারকি শিরষা ইন্‌জরুক।

12এন যানানান মেতারঘী মাইয়া আধিকার আউর শিরষা চিইয়াগে সায় মাল চিইদান, মুন্দা ছাছেম রাঃগে বাঃআ লাগদান।

13কারনে আদমেসিন পাহিলা আউর হবান খোঃখানু কামনা মান্‌জা।

14আদমেস ছলনু মাল ঠাকরাস, মুন্দা যানানা পুরাসে ছলনু ঠাকরাকি ধার্মেসঘী কাত্থা মাল মেনারকি গুনহানু খাত্তারা।

15মুন্দা আদ খাদ্দে জানামঘী মাঝিন্তী বাছরা অংগো। ইদ মানো যদি আর বিশুয়াসনু, দুলারনু আউর নেমহানু তাংগা তিংগান ঠিকা ডাহারেনু চালাবাঃনার।

← Chapter 1 Jump to: Chapter 3 →