Ephesians 5

Kurukh NT 2025

← Chapter 4 Jump to: Chapter 6 →

1ধার্মেসঘী চোনহালু খাদ্দার লেখা নিম ধার্মেসঘী লেখা চালরা।

2আউর দুলারনু চালরা, একান্নে খ্রীস্তাস নামান দুলার নান্‌জাস আউর নামহায় খাতরী ধার্মেসঘী হেদ্দে মাহাকারনা দান লেখা তাংগান দাড়ে আর্গাচাস।

3মুন্দা নিমহা মাঝিনু যেনু একাম লাজ্জে নালাখ মাল রাঃয়ী। নিমহা মাঝিনু একাম নাপাক বা লালিচহু মাল রাঃয়ী। কারনে ধার্মেসঘী নেমহা আলারঘী মাঝিনু ইবড়া রাঃনা ঠিকা মালা।

4আউর একাম লাজ্জে কাত্থা আম্বকে বাঃআ, ভোদলার লেখা কাত্থা আম্বকে বাঃআ, একাম মাইলা কাত্থা আম্বকে বাঃআ। কারনে ইবড়া কাত্থা নিমহায় বাইনু মাল মানারি। মুন্দা নিম ধার্মেসিন ধানিয়াবাদ চিইয়া।

5নিম মানিম আখদার যে, নে নে লাজ্জে নালাখ নান্নার, নে নে নাপাক আউর লালিচনু জীয়া কাড়তানার, আরঘী তো খ্রীস্তাসঘী আউর ধার্মেসঘী রাঃজীনু একাম উত্তরাধিকার মাল রোও। কারনে নে লালচি, আস তো ঠাকরান সেওয়ানানু।

6মানে মালকা কাত্থা বাঃআরকি যেনু নেহু নিমান মালদাও ডাহারেনু মাল হোওনার কাঃনার, কারনে নে নে কাত্থা মাল মেনারকি আবড়া নালাখ গুটঠিন নান্নার, আরঘী মাইয়া ধার্মেসঘী দান্ডে এত্তারকি বারি।

7খানে এন্নে আলারঘী সাংগে সাম্মান্ধ আম্বকে উইয়া।

8কারনে নিম অন সামাই উখানু রাচ্কার, মুন্দা আক্কুন উর্বাসনু বিল্লিনু বারেচ্কার। আক্কুন বিল্লিন্তা আলার লেখা চালরা।

9কারনে এগদা দাওলে, ধার্মেপাত্তু আউর সাচ, ইবড়া মান্‌জা বিল্লিঘী খান্‌জপা।

10উর্বাস একাইয়া খুশমারদাস, আদিন নিমান শিখিরনা দারকার।

11আউর উখাঘী খান্‌জপা মালকা নালাখঘী সাংগে নিমান জোড়আ আম্বকে; মুন্দা নিম আবড়াঘী দোশান এদা চিইয়া।

12কারনে আলার নুখরারকি খোঃখা তারতিক একা নালাখ গুটঠিন নান্নার, আবড়ান বাঃনাহু লাজ্জেঘী বারে।

13মুন্দা বিল্লি তারু একাম নালাখঘী দোশান এদনা চিইনা মানি, আবাকী হুর্মিদিম এথরী।

14কারনে বিল্লিদিম হুর্মিন ইদি। ইদিঘী খাতরী বাঃনা মান্‌জা, এ খান্দেরকা আলারো, এজরা, কেচ্চেকা আলারঘী মাঝিন্তী উজ্জা চোওয়া, এন্নেনু নিংহায় মাইয়া খ্রীস্তাস বিল্লি চিওস।

15খানে নিম একাসে জীয়া কাড়তা লাগদার, আঃ বারেনু হুশিয়ার রাঃকে, ভোদলারঘী লেখা আম্বকে চালরা, মুন্দা লুর রাচ্কা আলারঘী লেখা চালরা।

16সামাইয়ান দাও নালাখনু লাগাবাঃআ, কারনে ই সামাই মালদাও।

17নিম ভোদলা মানা আম্বকে, মুন্দা উর্বাসঘী চাহানা এন্দরা, আদিন বুঝরা।

18দ্রাক্ষারাশি অনারকি উংখা আম্বকে, আইয়ানু জীয়া নাশ মানি; মুন্দা আদিঘী বাদলা নেমহা বোলতানু পুরা মানা।

19গীতসংহিতা ডান্ডী, অহমা ডান্ডী আউর নেমহা বোলতাঘী ডান্ডী পাড়হারকি অরোত দোশরারিন উতসাহিত নানা আউর নিমহা কুহি তারু উর্বাসঘী মাতলাবনু ডান্ডী পাড়া।

20হুর্মি সামাই হুর্মি খাতরী নামহায় উর্বা যীশু খ্রীস্তাসঘী নামেনু ধার্মে বাঙ্গাসিন ধানিয়াবাদ চিইয়া।

21খ্রীস্তাসঘী মাইয়া নিমহা ভাক্তিঘী খাতরী নিম অরোত দোশরারঘী আধিনতান মানারকি হোওয়া।

22যানানারো, নিম একান্নে উর্বাসঘী, আন্নেম নিম তাংগা তিংগা মেতাসঘী আধিনতান মানারকি হোওয়া।

23কারনে খ্রীস্তাস মান্ডলীঘী কক্কু, আন্নেম মেতাসহু যানানাঘী কক্কু। খ্রীস্তাস দেহাঘীহু বাছাবাঃউু।

24মান্ডলী একান্নে খ্রীস্তাসঘী হেদ্দে কুক্কু গাডারকি রাঃয়ী, আন্নেম যানানারহু হুর্মি বারেনু তাংগা তিংগা মেতাসঘী আধিনতান মানারকি হোওকে।

25মেতারো, নিম তাংগা তিংগা যানানান আন্নেম দুলার নানকে, একান্নে খ্রীস্তাস মান্ডলীন দুলার নান্‌জাস আউর জীয়া চিচ্চাস।

26যেনু আস মান্ডলীন নেমহা আউর পাক নান্না খাতরী বাচান আউর আম্মেনু নোড়িয়াস।

27আস ইদিন নান্‌জাকা রাঃচাস, যেনু আস মান্ডলীন পুনা কানিয়া লেখা সাপড়ারকি তাংহা মুন্দভারে হাজির নানা অংগোদাস। আদিঘী কলংক, খুত বা আন্নে একাম এন্দরাহু মাল রাও, মুন্দা আদ নেমহা আউর দোশ মালকা মানো।

28মেতাস একান্নে তাংগান দুলার নান্দাস, ঠিকা আন্নেম তাংহা যানানানহু দুলার নান্না দারকার। নে তাংহা যানানান দুলার নান্দাস, আস তাংগানুম দুলার নান্দাস।

29নেহু তো তাংগা তিংগা দেহান একাবাকিহু ঘিন্না মাল নান্দাস, মুন্দা আস তো তাংগা তিংগা দেহান অন্তাদাস মোখতাদাস আউর যাতনাদাস। ঠিকা আন্নেম খ্রীস্তাসহু তাংহা মান্ডলীন যাতনাদাস।

30কারনে নাম আসঘী দেহাঘী অংশ।

31নেমহা পুথিনু লিখিচ্কা রাঃয়ী, “ইদিঘী খাতরীম আলার তাংগিয়ো তাম্বারিন আম্বারকি তাং যানানা সাংগে অন মান্নার আউর আর দু’ঝান অন্টাম দেহা মানোর। ”

32ইদ অন্টা মাহান নুড্ডুকা সাচ, মুন্দা এন খ্রীস্তাসঘী মাতলাবনু আউর মান্ডলীঘী মাতলাবনু ইদিন বাচ্কান।

33মুন্দা নিম হোর্মার তাংগা তিংগা যানানান তাংগা তিংগা লেখাম দুলার নানকে, আউর যানানাঘীহু দারকার, যেনু আদ তাংহা মেতাসিন সাম্মান নানি।

← Chapter 4 Jump to: Chapter 6 →