Revelation 22

Kurukh NT 2025

← Chapter 21 Jump to:

1আদিঘী খোঃখা মের্খাদুতাস এংগান জীয়া আম্মেঘী খাড় এদচাস। আঃ খাড় স্ফটিক লেখা ঝাকঝাকারকা পারিস্কার রাঃচা আউর আদ ধার্মেসঘী আউর মেড়হো খাদ্দাসঘী বেলকান্ডোন্তী উর্খারকি বাহারা লাগি।

2খাড়টা শাহারঘী ডাহারে মাঝিন্তীক বাহারাকি চালরা লাগিয়া। আঃ খাড়ঘী দু’নো ধাসড়েনু জীয়া মান্নে রাঃচা। বারো মাহিনানু আইয়া বারো রাকাম খান্‌জপা খান্‌জি, আদিঘী আতক্ষানু হুর্মি জাতিয়ার কড়ে মান্নার।

3শাহারনু শাও ক্ষাক্ষনা এন্দরাহু আরু মাল রাও, ধার্মেসঘী আউর মেড়হো খাদ্দাসঘী বেলকান্ডো আঃ শাহারনু রাও আউর তাংহা লাউড়ীর আসঘী সেওয়া নানোর।

4আর আসঘী বাই এরা অংগোর আউর আসঘী নামে আরঘী কাপড়েনু লিখিচ্কা রাও।

5আসান মাঃখা আরু মাল রাও আউর লেমফোঘী বিল্লি কা বিইড়ীঘী বিল্লিন আরিন আরু দারকার মাল লাগ্গো, কারনে উর্বা ধার্মেস তানিম আরঘী বিল্লি মানোস। আর সাদাউ সাদাউ উল্লা ধারারকি রাঃজী নানোর।

6খোঃখা আঃ মের্খাদুতাস এংগান বাঃচাস, “ই হুর্মি কাত্থা সাচ আউর বিশুয়াস নানরি। উর্বা ধার্মেস, নে নাবীরগে বাচান চিচ্চিকা রাঃচাস, আস তাংহা মের্খাদুতাসিন তাইয়াস চিচ্চাস, যেনু অংগুর খোঃখা এগদা ঘাটআ কালা লাগি, আদিন আস তাংহা লাউড়ীরিন এদা অংগোদাস।”

7যীশুস বাঃআ লাগদাস, “মেনা, এন চাড়েম বারা লাগদান। ধান্যা আঃ আলার, নে ই পুথিন্তা হুল্লু বাচানান মানারকি চালেরনার।”

8এংহা নামে যোহান, এন ইবড়া হুর্মিদিম মেন্‌জেকান আউর ইরকান। হুর্মিদিম মেন্না আউর এরনা খোঃখা, একা মের্খাদুতাস এংগান ইবড়ান এদচাস, আসিন সেওয়া নান্না খাতরী আসঘী ক্ষেড্ডে গুসান মুক লিদিরকান।

9মুন্দা আস এংগান বাঃচাস, “ইজআ, এন্নে নালাখ নানা আম্বা। এন নিংগা লেখা অরোত লাউড়ী, নিংহা ভাইয়া নাবীরঘী আউর নে নে ই পুথিন্তা হুর্মি কাত্থান মানআরকি চালেরনার। নিন অরোত অন্টিম ধার্মেসঘীদিম সেওয়া নানা।”

10ইদিঘী খোঃখা আস এংগান বাঃচাস, “নিন ই পুথিঘী হুল্লু বাচান গুটঠি নুডারকি উইয়া আম্বকে, কারনে আবড়া পুরা মান্নাঘী সামাই আর্সিয়া কেরা।

11নে ধারাম বিড়দো নালাখ নান্দাস, আস আরু ধারাম বিড়দো নালাখ নানতেম রাউুক; আউর নে নেমহা মালকা, আস নেমহা মালকাম লেখাম রাউুক। মুন্দা নে ধার্মেপাত্তু, আস আরু উজগু লেখা নালাখ নানতেম রাউুক; আউর নে নেমহা, আস নেমহাদিম রাউুক।”

12যীশুস বাঃআ লাগদাস, “মেনা, এন চাড়েম বারা লাগদান! হোর্মারিন চিইনা খাতরী খান্‌জপা হোওয়ারকি এন বারা লাগদান, নে একান্নে নালাখ নান্‌জার, আঃ লেখাম খান্‌জপা ক্ষাক্ষর।

13এনিম আলফা আউর ওমেগা, পাহিলা আউর শেষা, আরাম্ভ আউর মুন্‌জুরকা।

14“আর ধান্যা, নে তামহা দিগহা ঝুলান নোড়নার। আর জীয়া মান্নেঘী খান্‌জপা মোখনাঘী আধিকার ক্ষাক্ষর আউর হুর্মি বালিন্তী শাহারনু কোরআ অংগোর।

15আউর আর শাহারঘী বাহিরি তারা রাচ্কা আল্লা লেখা মালদাও আলার, যাদুটোনা নানুর, লাজ্জে নালাখনানুর, আল পিটুর, ঠাকরান সেওয়ানানুর, আউর নে নে ঝুট কাত্থা বাঃআগে দুলার নান্নার আউর ঝুট ডাহারেনু চালেরনার।

16“এন যীশু, এংহা মের্খাদুতাসিন তাইকান, যেনু আস নিমহা গুসান মান্ডলী গুটঠি খাতরী ইবড়া বারেনু গাওয়াহী চিইয়া অংগোনার। এন দাউদেসঘী মুলি আউর গুষ্ঠিঘী আল, এনিম ভিনসারান্তা বিল্চিকা বিনকো।”

17নেমহা বোলতা আউর কানিয়া বাঃআ লাগি, “বারা।” নে ই কাত্থান মেন্‌জার, আসহু বাউুক, “বারা।” নেকান আম্মে অনা তুক্কিয়া, আস বারুক আউর নে আম্মে অনা বেদ্দাস, আসহু বেগার ডিবাম জীয়া আম্মেন অনুক।

18ই পুথিন্তা হুর্মি হুল্লু বাচান গুটঠিন নে নে মেনোর, এন আরিন বাড়িয়ারসে গাওয়াহী চিইয়ারকি বাঃআ লাগদান, ই পুথিনু একাবড়া লিখনা মান্‌জা, নেকিম যদি আদিঘী সাংগে এন্দেরাদিম অন নান্নার, হলে ই পুথিনু লিখিচ্কা একা দান্ডে গুটঠি রাঃয়ী, ধার্মেস আঃ আলাসঘী জীয়ানু আবড়ান অন নানোস চিওস।

19আউর ই পুথিনু একাবড়া লিখনা মান্‌জা, নেকিম যদি আদিন্তী এন্দরাদিম বাদ চিইনার, হলে ই পুথিনু লিখিচ্কা একা জীয়া মান্নেঘী আউর নেমহা শাহারঘী আধিকার ক্ষাক্ষানাঘী কাত্থা লিখিচ্কা রাঃয়ী, ধার্মেস আঃ আলাসঘী জীয়ান্তী আবড়ান বাদ নানোস চিওস।

20নে ইবড়াঘী বারেনু গাওয়াহী চিইয়া লাগদাস, আস বাঃআ লাগদাস, “মানিম, এন চাড়েম বারা লাগদান।” আমেন। উর্বা যীশু, বারা!

21নামহা উর্বা যীশুসঘী অনুগ্রহ তাংহা হোর্মা আলারঘী সাংগে রাউুক। আমেন।

← Chapter 21 Jump to: