1 Thessalonians 3

Kurukh (पुना गच्छरना NT (BSI))

← Chapter 2 Jump to: Chapter 4 →

1औंगे ऎम अउरिम कयास नना पोलकम ख़ने, ऎम अथॆने नगरे नू दिम र'आ गे तिगच‍कम।

2अरा ऎम तीमोथियुसिन निम्‍है हेद्दे तइय्कम। आस एम्‍है भईस अरा मसीसी दौ कत्‍था तेंगना नू धर्मेसी जॊंख़स हिकदस। अरा आस निम्‍है पत्त'अना नू निमन बड़ियर ननोस अरा रिझ्रत'ओस, इदगे ऎम आसिन तइय्कम।

3औंगे नॆ हूँ इबड़ा खिलपत चड्डे अम्‍बोर नुक्र'आ। लिकिन नीम गा अख़दर दिम ऎम ई खिलपत गेम उइरकादम।

4अन्‍ति निम्‍है गुसन रहचकम ख़ने, निमन घड़ी घड़ी ब'आ लिक्‍कम, का नमा गे खिलपत मन्ना दिम र'ई। अरा एन्ने मंजकी र'ई अदिन नीम अख़दर।

5औंगे एंग्‍है नू कयास मल मंजा ख़ने, निम्‍है पत्त'अना ही पत्त नू अख़'आ गे तीमोथियुसिन तइय्कन। इदगेका बिढ़'उस इन्द्रिइम कत्‍था नू बिढ़'ओस अइय्या खत्र'ओर होले, एम्‍है अर्ज'अना अनभनियाँ मनो ई चड्डे ऎन इल्‍चिकन।

6लिकिन अक्‍कु तीमोथियुस निम्‍है गुसते एम्‍है गुसन बरचकादस, अरा निम्‍है पत्त'अना अरा चोन्‍हा ही पत्त ता दौ कत्‍थन ओन्‍द्रकादस। अरा आस बाचस का नीम सगरो चोन्‍हा गने एमन सुरत'अदर, अरा एकासे ऎम निमन ऎरा गे खसतारदम अन्ने नीम हूँ एमन खसतारदर।

7औंगे भईरो, ऎम एमा गे मंजका उर्मी खिलपत अरा कलपारना नू हूँ निम्‍है पत्त'अना ती निम्‍है पत्त नू कोड़े ख़क्‍खकम ती रिझ्रकम।

8नीम धर्मेस नू पत्त'अना नू बड़ियर मन्नुम कादर, ईद एमा गे पुना उज्‍जनन चि'ई।

9निम्‍है चड्डे ऎम धर्मेसी मुन्‍दहारे ख़कख्रका उर्मी रिझ गे ऎ बग्‍गे धन्‍यवाद धर्मेसिन चि'ओम अन्नु हूँ जुक्‍की मनो।

10ऎम फेन निम्‍है गने भेंट मनोम ती निम्‍है पत्त'अना नू र'ई आ पयहा आबोन बड़ियर नना गे उल्‍ला दरा माख़ा नगदे गोहरारदम।

11अक्‍कु नम्‍है धर्मेस‍ बंगस अरा उर्बा येसुस दिम निम्‍है गुसन बर'आ गे एमन डहरे ऎद्ददस नेक‍अन।

12एम्‍है चोन्‍हा एकासे निम्है नू परदिया निन्‍दिया अन्नेम निम्‍है चोन्‍हा ओर्त ओर्त नू नन्‍नर नू परदा ती नीदा गे उर्बस निमन सहाड़ा नन्‍दस नेक‍अन।

13इकला नम्‍है उर्बा येसुस तंग्‍है उर्मी नेम्‍हा आलर गने बर'ओस, आस नम्‍है धर्मेस अरा बंगस ही मुन्‍दहारे नीम बिगर बदी ही आलर अरा नेम्‍हा आलर र'आ गे निम्‍है जियन बड़ियर नन्‍दस नेक‍अन।

← Chapter 2 Jump to: Chapter 4 →