1 Timothy 6

Kurukh (पुना गच्छरना NT (BSI))

← Chapter 5 Jump to:

1उर्मी बिट्ठी ननू जॊंख़र गे तम्‍है तम्‍है उर्बर ही कोड़हे म‍ईन मरजात नन्ना र'ई। होले नेक‍ईम धर्मेसी नामे अरा नम्‍है सिखाब'अना ही बिड़दो नू मल ब'ओर।

2अरा पत्त'ऊ उर्बर ही किइय्या ता बिट्ठी ननू जॊंख़र तम्‍है उर्बर पत्त'ऊ र'अना चड्डे आरिन जुक्‍किम म‍ईन अम्‍बोर नना। आर गे अउर हूँ बग्‍गे म‍ईन मरजात नन्ना र'ई। एन्‍देरगेका आर पत्त'ऊ आलारिन संगरा अरा चोन्‍हा नन्नर। इबड़ा कत्‍थन नीन कलीसियन सिखाब'आ अरा बुझाब'आ।

3एक‍अम आलस नन्ना रकम ही सिखाब'अना आबोन सिखाब'अदस अरा येसु मसीसी मानिम सिखाब'अना अरा धर्मेसिन सुसर नना गे मानिम डहरेन ईद‍'ऊ सिख़ाब'अना ही बिड़दो र'अदस होले,

4आस इतरारस केरस अरा एन्‍दरन हों बलदस। आस गे लौचनखरना अरा कत्‍थन आनानखरना ही रोगे र'ई। एकत्रु कैर कुचर, लौचनखरना, निंदा बदी कत्‍था, मलदौ दोखना, सटना तुन्ना,

5अरा रेन्‍द नग्गानखरना नन्‍तेम र'अना मनी। एन्ने आर ही बुधी बगड़ारकी किरकी र'ई। अरा आर मानी ती खत्रका केरका र'अनर। आर घोकनर का महबा अर्ज'अना ही डहरे।

6लिकिन नम्‍है गुसन ऎ बग्‍गे र'ई आरुनुम जिया बुधर'ई, होले महबा नमन उरुब ननी।

7नाम ख़ॆख़ेल नू एन्‍द्रा हों मल्‍ला ओन्‍द्रका अरा एन्‍द्रन हों हो'आ ती काला पोलदत।

8औंगे नम्‍है गुसन ओन्‍ना-मॊख़ना अरा अत्तना-कुन्‍द्रना र'ई होले, इबड़ा तिम नाम जिया बोधाब'ओत।

9लिकिन नॆ उरुब मना बेद्दनर आर एन्ने बिढ़्रना अरा फंदा अनभनियाँ अरा बगड़ारना चिबाख़ारना नू बझरनर। एकदा आलारिन बगड़'ई चि'ई अरा बुडरना ही समुदर नू मूलख़'ई चि'ई।

10एन्‍देरगेका ढिबा ही चिबाख़ारना तिम उर्मी मदहे ही मलदौ गुट्ठी उरखी। जोक्‍क आलर बग्‍गे ढिबा ख़क्‍खना ही तिहा-तोरा नन्नुम आर पत्त'अना डहरे ती एबस्रनर ती कैनो मदहे ही दुक्‍खे गुट्ठी ती ताम तमानिम दुक्‍खे सारत'अनर।

11लिकिन अना तिमोथियु, धर्मेसी आलायो, नीन इबड़ा उर्मी कत्‍था ती तरकूटी र'आ, अरा मानिम डहरे नू उजगो ऎका, अरा महबा, पत्त'अना, चोन्‍हा, सहेलहे अरा लुदऊ जिया नन्ना नू र'आ।

12एकासे बॆस सैनस तंग्‍है लड़ाइन लड़दस अन्ने नीन पत्त'अना ही दौ अरबानखर'आ अरा जनमजुग ही उज्‍जनन धर'आ। इदगेम नीन मॆख़रकादय, अरा बग्‍गे गोवाह आलर ही मुन्‍दहारे निंग्‍है पत्त'अनन बॆस ऎदकादय।

13ओर्मर गे उज्‍जना चि'ऊ धर्मेसी अरा पोन्‍तियु पिलातुसी मुन्‍दहारे तंग्‍है बॆस गोवाह चिच्का मसी येसुसी मुन्‍दहारे ऎन निंगा गे जिमा चि'अदन।

14नीन नम्‍है उर्बस येसु मसीसी अउर दहदर मन्ना गूटी ई आनन‍न निमन अरा बिगर बदी ही उइय्या।

15धर्मेस दिम ठौका बेड़ा नू येसुसिन दहदर ननोस। धर्मेस दिम ओहमा ही जॊगे ओन्‍टे राजी ननू र'अदस। अरा आस बॆलर ही बॆलस अरा उर्बर ही उर्बस हिकदस।

16मल खि'ऊ आसिम हिकदस। आसदिम सगरो उज्‍जू र'अदस। आस अकय कोड़हे बिल्‍ली नू र'अदस। आसिन नॆ हूँ मल्‍ला ईरका अरा इकल‍अम हूँ ऎरा पोलनर। आस गेम ओहमा अरा पया हुल्‍लो ती हुल्‍लो गूटी र'अन नेक‍अन। आमेन।

17ई ख़ॆख़ेल ता उरुब आलारिन पॆस'आ का आर अम्‍बोर इतरार'आ, अरा नठारना खुर्जी म‍इय्याँ असरा अम्‍बोर नना। लिकिन आर गे नम्‍है सुक्‍ख गे उर्मीन बग्‍गे ती बग्‍गे चि'ऊ धर्मेस म‍इय्याँ असरा नन्ना मनो।

18अरा आरिन तेंगा का आर गे तंग्‍है खुर्जिन दौ नलख नू ब‍उर'अना र'ई, अरा दौ नलख गुट्ठी नू उरुब मन्ना र'ई। अरा चाड़ र'ऊ आलर गे मुट्ठी बिछर'अरकी चि'आ गे अरा सौंसे जिया ती तम्‍है खुर्जिन ख़ट्टा गे सपड़ारका र'अना र'ई।

19एन्ने नन्ना ती आर तम्‍है खुर्जिन मेर्ख़ा नू बछाब'अनर ती उइय्यनर अरा तम्‍है बरना उल्‍ला गे बड़ियर नेव उइय्यनर । इत्रु आर मानिम उज्‍जनन तम्‍है आकुस नू नन्नर।

20अना तीमोथियुस धर्मेस निंगा सोंपचकादस अदन ख़ापा। अरा महबा मलका ब'अनन अरा एकाद लूर मल्‍ला अदिन लूर ब'अरकी मलदौ कछनख्रना ती तरकूटी र'आ।

21जोक्‍क आलर इदन पत्त'अरकी मानिम ही पत्त'अना ती बेहड़ारका केरकानर। निंगा गे मया मनन नेक‍अन।

← Chapter 5 Jump to: