2 Peter 1

Kurukh (पुना गच्छरना NT (BSI))

Jump to: Chapter 2 →

1ऎन येसु मसीसी जॊंख़न अरा तइरकन सिमॊन पतरस नम्है धर्मेस अरा नाड़ुस येसु मसीसी सोग्गे अरा नेंवई ती एम्है पत्त'अना ही लेक्खा कोड़हे मूली ही पत्त'अनन ख़क्खका निमा ओर्मर गे ई चिठिन लिखदन।

2धर्मेसिन अरा नम्है उर्बा येसुसिन अख़ना लूर ती निमा गे मया अरा कोड़े बग्गे ती बग्गे मन्नुम कालन नेकअन।

3भगती उज्जना उज्जा गे चाड़ र'अना उर्मिन आसी धर्मे मन्ना सवंग नमा गे चिच्की र'ई। आसी पत्त नू नमा गे र'अना लूर ती इबड़ा नमा गे चीरकी र'ई। आस दिम नमन तंग्है महबा अरा दौ गुन्न ती मीख़का र'अदस।

4आसी महबा अरा दौ गुन्न ती दिम आसी कोड़हे अरा नगदे मईन ही गच्छरना गुट्ठी नमा गे चीरकी र'ई। ई गच्छरना गुट्ठी ती आ धर्मे सुबहा नू नीम हूँ मेस्र'आ ओंग्दर, अरा मलदौ चिबाख़ारना ती ख़ॆख़ेल नू मन्ना खुपाब'अना ती हूँ बछर'आ ओंग्दर।

5ई चड्डेम नीम उर्मी रकम ही चिहुट ती निम्है पत्त'अना गने दौ गुन्न आबोन जोड़'आ, अरा दौ गुन्न गने लूरन जोड़'आ।

6अरा लूर गने जियन सम्ड़'अना, अरा जियन सम्ड़'अना गने खतिर नन्ना, अरा खतिर गने भगती।

7अरा भगती गने भई बहिन चोन्हा, अरा भई बहिन चोन्हा गने चोन्हन जोड़'आ।

8एन्देरगेका इबड़ा उर्मी गुन्न गुट्ठी नू नीम बड़ियर मन्नुम परदनुम क'ओर होले, नम्है उर्बस येसु मसीसिन अख़ना लूर नू नीम परदा गे अरा ख़ंजपा ओन्द्र'आ गे इबड़ा सहाड़ा ननो।

9लिकिन नॆख'आ नू इबड़ा गुन्न गुट्ठी मलकी आस अन्धहा लेक्खा र'अदस, अरा गेच्छा ऎरा पुल्लू लेक्खा र'अदस। आस मुन्द ता तंग्है पाप गुट्ठी ती तान नॊड़र'अरकी सुध मन्तारकाचस अदिन मॊध्रकादस।

10औंगे अना भईरो, धर्मेसी निम्है मॆख़्रकन अरा चजरकन बड़ियर नना गे कोड़हे चिहुंक नना। नीम इबड़न ननोर होले, इकला हूँ मल खत्र'ओर।

11अरा नम्है उर्बस अरा नाड़ुस येसु मसीसी मुंजा मलका राजी नू कोड़हे परिघ'अना ती कोर'ओर।

12औंगे इबड़ा कत्था गुट्ठिन सगरो सुरता नन्ताते र'ओन। नीम इबड़न मुन्द तिम अक्कादर, अरा अक्कुन इबड़ा कत्था गुट्ठी नू मानिम नू बन्चका र'अदर। अन्नु हूँ अउरिम सुरता नन्त'आ बेद्ददन।

13नम्है उर्बस येसु मसीस एंगन दहदर नंजका ती ऎन अख़दन का एंगा चाँड़हेम कुम्‍बा लेक्खा ई मॆदन अम्बना मनो। औंगे एका गूटी ऎन उज्जा लगदन आ गूटी निमन एन्ने सुरता नन्त'ओन। एंग्है अख़ना नू ईद बॆस र'ई।

15औंगे एंगा खे'अना ही ख़ॊख़ा हूँ नीम इबड़ा कत्था गुट्ठिन सुरता नू उइय्या गे ऎन एन्द्रा एन्द्रा नना ओंग्दन, अदन अक्कुन ननोन।

16लूरगर ती कमचका ख़ीरी गुट्ठी नू ऎम मल ऎकरकी, लिकिन आसी महबन एम्है ख़न्न ती ईरुर रहचका ती दिम, ऎम नम्है उर्बस येसु मसीसी सवंग अरा आसी बरना ही पत्त नू निमा गे तिंकम।

17“ईद एंग्है चोन्हा ख़द्दस, ईस ती ऎन खुसमारदन” एन्ने मसीस गे धर्मेसी कोहाँ बिल्चना महबा ती ओन्टा ब'अना मेन्द्रा ख़ने, आस धर्मे बंगस ती मईन अरा महबन ख़क्खियस।

18एकाबारी ऎम आसी गने आ नेम्हा परता नू रहचकम ख़ने, मेर्ख़ा ती मेन्द्रका आ ब'अनन ऎम हूँ मेंजकम।

19ई अनुभव ही चड्डे ऎम धर्मेसी कत्था तिंगुर ती तिंका कत्था गुट्ठी नू अउर हूँ कोड़हे असरा उइय्दम। नीम ईर ही कत्था गुट्ठी नू कोड़हे चिहुट नन्ना र'ई। एन्देरगेका आर ही कत्था गुट्ठी, पहपहरना गूटी अरा मसीस बिज-बीनको निम्है जिया नू बिल्चना गूटी ऊख़ा नू बिल्चना बिल्ली लेक्खा र'ई।

20उर्मी ती मुन्द नीम इदन अख़ना र'ई का, नेम्हा पुथी ता धर्मेसी कत्था तिंगुर ती बाचका ख़ॊख़ा मन्ना एकअम कत्था हूँ आर ही तम्है सोच ही कत्था मल्ली।

21एन्देरगेका धर्मेसी कत्था तिंगुर ती बाचका ख़ॊख़ा मन्ना कत्था इकला हूँ आलर ही मने ती मल्ला मंजका। लिकिन आलर नेम्हा बॊलतासी कड़हाब'अना ती धर्मेसी कत्थन तिंगियर।

Jump to: Chapter 2 →