Colossians 4

Kurukh (पुना गच्छरना NT (BSI))

← Chapter 3 Jump to:

1अना उर्बारो, निमा गे हूँ मेर्ख़ा नू ओन्टा उर्बस र'अदस एन्ने अख़'अरकी नीम निम्है बिट्ठी ननू जॊंख़र गे एन्देर एन्देर ठौका अरा बॆस र'ई अदिन चि'आ हो'आ।

2गोहरारतेम र'आ, अरा धर्मेस गे धन्‍यवाद नना ती गोहरारना नू एज्रका र'आ।

3अरा इदही गने एमा गे हूँ गोहरार'आ का धर्मेस एमा गे दौ कत्‍था तेंगा गे बलिन तिसगदस नेकअन। होले ऎम मसीसी पत्त ता गम ही कत्‍थन तेंगा ओंगोम। ई नलख ही चड्डेम ऎन जेहेल नू हॆंरकादन।

4अरा एकासे एंगा तेंगना चाड़ र'ई, अन्नेम ई कत्थन फरीफरी तेंगा गे एंगा गे गोहरार'आ।

5नॆ पत्त'ऊ मलनर आर गने लुरगर गने ओक्‍का इज'आ, अरा उर्मी मोका आबोन दौ गने बउर'आ।

6अरा निम्‍है कछनख्रना सगर घड़ी मया गने अरा सोभना र'अन नेकअन। औंगेम एकासे निम्है गने मिनुर गे अदही आनाकिर्त'अना र'ई अदिन अख़'आ ओंगोर।

7दुलारु भई अरा पत्त'अना जॊगे सुसर'उस अरा उर्बासी नलख नू एंग्है गने सुसर ननू तुख़िखोस, एंग्‍है पत्त ता उर्मी हलन निमन तेंगोस।

8नीम एम्है दसा गुट्ठिन अख़'आ गे अरा आस निम्‍है जिया गे सान्‍ति चि'आ गेम, आसिन ऎन निम्‍है गुसन तइय्कादन।

9अरा आसी गने ऎन पत्त'अना जॊगे अरा दुलारु भई ओनॆसिमोसिन हूँ तइय्कादन। आस निम्‍है आलस दिम हिकदस। आर निमन इसता उर्मी कत्‍थन तेंगोर।

10अरिस्‍तरख़ोस नॆ एंग्‍है गने जेहेल नू हॆंरकादस, आस निमा गे मोंजरा नन्दस। अरा मरकुस नॆ बरनबासी अंड़सका भई मन्दस, आस निमा गे मोंजरा नन्दस। मरकुसी पत्त नू नीम मुन्द दिम पॆसका ख़क्‍खका रहचकर, आस निम्है गुसन बर'ओस होले, नीम आसिन परघ'अके।

11अरा यूसतोस बारना येसुस हूँ निमा गे मोंजरा नन्दस। धर्मेसी राजी ही नलख नू एंग्‍है गने सुसर ननुर मझी नू ईर लेका यहूदीर हिकनर। ईर एंगा गे जिया सालना चि'अनर।

12अरा मसी येसुसी जॊंख़स एपाफ्रास हूँ निमा गे मोंजरा नन्दस, आस हूँ निम्है आलस हिकदस। आस सगर घड़ी निमा गे गोहरारना गुट्ठी नन्तेम र'अदस का नीम पखड़ मनोर ती ओर्मा असरा गने धर्मेसी उर्मी मने नू बड़ियर इज्‍जका र'ओर।

13आस निमा गे अरा लवोदिकेया अरा हिएरापोलिस नगरे गुट्ठी नू र'ऊ पत्त'उर गे कोड़हे नलख नंजस, इदही ऎन गोवाह हिकदन।

14एम्है दुलारु बइधस लूकस अरा दॆमस निमा गे मोंजरा नन्नर।

15लवोदिकेया नगरे ता पत्त'ऊ भईर गे अरा नुम्‍फा अरा अदही एड़पा नू ख़ॊंड़रना कलीसिया गे एंग्है मोंजरा।

16अरा ई चिठिन निम्‍है गुसन पढ़के, अरा अदही ख़ॊख़ा इदिन लवोदिकेया ता कलीसिया नू हूँ पढ़त'अके। अन्नेम लवोदिकेया ता कलीसिया गे एंग्हा लिखचका चिठिन हूँ नीम पढ़के।

17अरा नीम अर्ख़िप्पोसिन आनके का, “एका सुसर'अना उर्बस निंगा चिच्कादस, अदिन चिहुंक लगे पूरा ननके।”

18ऎन पौलुस एंग्है ख़ेक्खा ती ई मोंजरन लिखदन। सुरता नना का ऎन जेहेल नू हॆंरकादन। धर्मेसी मया निम्है नू र'अन नेकअन।

← Chapter 3 Jump to: