Ephesians 6

Kurukh (पुना गच्छरना NT (BSI))

← Chapter 5 Jump to:

1अना ख़द्दरो, नीम उर्बासी र'अना ती तम्है अयंग बंगर गे पॆस्र'आ, एन्‍देरगेका ईद ठौका कत्‍था हवे।

2निंगा दौ मना गे अरा नीन ख़ॆख़ेल नू बग्‍गे उल्ला गूटी उज्‍जा गे तंग्है अयंग अरा बंगन मईन ननके। ईदिम गच्छरना ही गने ता पहिल पॆसका हवे, एकदा दस पॆसका ती ओन्टा र'ई।

4अना बंगारो, निम्‍है ख़द्द-ख़र्रन अमा कैर'आ, लिकिन उर्बासी कॊड़ना अरा तिगाब'अना नू आरिन पर्द'आ।

5अना बिट्ठी ननू जॊंख़ारो, नीम मसीसिन पॆस्रना बेसे, ई ख़ॆख़ेल ता निम्‍है उर्बारिन मईन अरा इल्‍चनुम ती अरा मानी जिया गने पॆस्र'आ।

6आरिन पत्तारत'आ गे लेका आर ही ऎरना नू लेका अन्ने मल पॆस्र'अरकी, निम्है उर्मी जिया गने धर्मेसी चिताबुतन ननू मसीसी जॊंख़र लेक्‍खा पॆस्र'आ।

7नीम आलर गे सुसर'अना बेसे मला, उर्बा येसुस गे सुसर'अना बेसे उर्मी जिया ती सुसर'आ।

8एन्‍देरगेका नीम अख़दर का नेकईम बिट्ठी ननू जॊंख़ महले छछिन्द र'अस, तंग्है तंग्है नन्ना दौ नलख ही लेक्खा उर्बस ती इनामन ख़क्खोस।

9अना उर्बारो, नीम हूँ घुड़कानन अम्‍बरकी आर ही गने अन्नेम नना, एन्‍देरगेका नीम अख़दर का आर अरा नीम इरबर ही उर्बस मेर्ख़ा नू र'अदस, अरा आस नॆकन हूँ तीना मल ख़ाँड़दस।

10छेद्द नू ऎन एन्देर ब'अदन का उर्बस नू अरा आसी कोड़हे पया नू सवंगिय मना।

11नीम नाद ही फंदा गुट्ठी ही हुरभेटा नना गे धर्मेसी उर्मी कमहड़ आबोन अत्ता।

12एन्‍देरगेका नम्‍है ई अरबानख्रना ख़ॆंस अरा अहड़ा ती लेका मला। ईद मलदौ राजी ननुर गे, अरा मल ऎथरना सौंसे ही अदिया गुट्ठी गे, अरा ई ख़ॆख़ेल ही ऊख़ा ही कोड़हे सवंग गुट्ठी गे, अरा ताका ही राजी ता मलदौ बॊलता गुट्ठी गे बिड़दो नू र'ई।

13औंगे नीम मलदौ उल्ला नू इबड़ा ही बिड़दो नू हुरभेटा नना गे, अरा उर्मिन मुंजा ख़च्‍चना ती बड़ियर इज्‍ज'आ गे धर्मेसी उर्मी कमहड़ आबोन धर'आ।

14औंगे मानी ही कमरपटी ती कड़मन भिड़'आ ती, अरा उजगो ही झिलम आबोन अत्ता ती बड़ियर इज्जका र'आ।

15अरा सान्ति ही दौ कत्‍थन तेंगा गे सपड़ारका र'अना ही जुतन निम्है ख़ेड्डे नू अत्ता चि'आ।

16अरा अबड़ा गने पत्त'अना ही ढाल आबोन धर'आ, एकत्रु नीम नाद ही उर्मी लघरना चार गुट्ठिन तेभ'आ ओंगोर।

17अरा नाड़रना ही पन्ना ही टोपिन अत्तर की नेम्हा बॊलतासी तलवारन धर'आ, एकदा धर्मेसी कत्‍था हवे।

18उर्मी बारी उर्मी रकम ही गोहरारना अरा ने'अना ती नेम्हा बॊलतस नू गोहरार'आ। अरा इदन जिया नू उइय्यरकी एज्रका र'आ। अरा सगरो उर्मी नेम्‍हा आलर गे गोहरारनुम र'आ।

19अरा एंगा गे हूँ गोहरार'आ का ऎन एका एका बारी धर्मेसी कत्थन तेंगोन, आ बारी डिढ ती दौ कत्‍था ही गम आबोन तेंगा गे धर्मेस कत्था गुट्ठिन चि'अदस नेकअन।

20ई दौ कत्था ही चड्डेम ऎन धर्मेसी ओन्टा पैकन हिकदन अरा अक्कु जेहेल नू हॆंरका र'अदन। एंगा एकासे तेंगना र'ई अन्ने डिढ ती तेंगा गे गोहरार'आ।

21अक्कु एम्है चोन्हा भईस उर्बस नू पत्त'अना जॊगे जॊंख़स तुख़िखोस एंग्है पत्त नू उर्मिन निमा गे तेंगोस। होले नीम हूँ ऎन एकासे र'अदन अरा एन्देर ननालदन उर्मिन अख़'आ ओंगोर।

22आसिन ऎन निम्‍है गुसन इदगेम तइय्यालदन का नीम एम्‍है पत्त नू अख़'आ ओंगोर, अरा आस निमन जिया सालत'आ ओंगोस।

23धर्मे बंगस अरा उर्बस येसु मसीस तरती नीम उर्मी भइय्योर गे सान्‍ति अरा पत्त'अना गने ता चोन्‍हा ख़खख्र'अन नेकअन।

24नॆ नम्‍है उर्बस येसु मसीसिन मल मुंज्रना चोन्‍हा ती चोन्हा नन्नर, आर ओर्मर मइय्याँ धर्मेसी मया मनन नेकअन।

← Chapter 5 Jump to: