Galatians 2

Kurukh (पुना गच्छरना NT (BSI))

← Chapter 1 Jump to: Chapter 3 →

1इदही चौदा बछर ख़ॊख़ा अउरिम ऎन बरनबास गने येरुसलॆम केरकन, अरा तीतुसिन हूँ संगे होच्‍चकन।

2धर्मेस दहदर नंजकाचस का एंगा असन काना चाड़ र'ई, औंगे ऎन केरकन। ऎन कलीसिया ही मुध आलर गने सुनसान नू भेंटारकन अरा बाचकन का एका दौ कत्‍थन ऎन नन-यहूदीर मझी नू तेंगा लिक्‍कन। एन्‍देरगेका एंगा एल्‍चना रहचा का एंग्‍है दौ कत्‍था तेंगना नलख एकदन ऎन नंजकादन अरा ऎन अक्कुन ननालदन आद अनभनियाँ अम्‍बो मना।

3तीतुस एंग्‍है गने येरुसलॆम केरकाचस, आस नन-यहूदी आलस रहचस। अन्नु हूँ आर आसिन खतना नना गे बड़पेलहा मल नंजर।

4ऎम इबड़ा कत्‍थन इदगे तिंकम का जोक्को ठकवा पत्त'ऊ भईर कलेकसे नम्है मझी नू कोरचकाचर अरा आर मसी येसुस नू नमा ख़क्‍ख्रकी र'ई आ छछिन्‍द आबोन हो'आ गे अरा अत्रु ती नमन मूसासी नॆग ही जॊंख़ कम'आ गे अन्‍थन जॊहना लेक्‍खा बरचका रहचर।

5लिकिन ऎम गा दौ कत्‍था ही मानी आबो निम्‍है गने कम्रकी र'आ गे बिद्दकम। औंगे अबड़र ही मुन्‍दहारे ऎम एमन ओन घड़ी गे हूँ आर ही किइय्या मना मल चिच्‍कम।

6अरा कलीसिया ता मुद्धर एकार एका कोहाँ मुध होले हूँ आर एंग्हा तिंका दौ कत्‍था गने इन्द्रिइम मल जोड़चकर। आर कोहाँ मुध र'ओर महले सन्नी र'ओर, एंगा गे अदही नू एन्‍द्रा हूँ सोच मलकी। धर्मेस नॆख'आ हूँ मुहिन ऎररकी नेंव‍ई मल नन्‍दस।

7आर मनचर एकासे का धर्मेस यहूदीर ही मझी नू दौ कत्‍थन तेंगा गे पतरसिन तइय्काचस। अन्नेम एंगन हूँ नन-यहूदीर मझी नू दौ कत्‍थन तेंगा गे धर्मेस तइय्‍कादस।

8एन्‍देरगेका एका धर्मेस यहूदीर गे दौ कत्‍था मेन्‍त'आ गे पतरस गे त‍इरका नलख नना गे पैया चिच्‍चस। आ धर्मेसिम एंगा गे हूँ नन-यहूदीर गे दौ कत्‍था मेन्‍त'अना ही त‍इरका नलख नना गे पैया चिच्‍चस।

9आलर याकॊब अरा पतरस अरा यॊहनसिन कलीसिया ही कोहाँ मुद्धर लेक्‍खा सोचर। आर धर्मेस ती एंगा ख़क्‍ख्रका मया आबोन अक्‍खर। आर एंगन अरा बरनबासिन संगे नलख ननू लेक्‍खा इंझ्रर अरा रिझाबाचर का ऎम नन-यहूदीर गुसन क'ओम, अरा ताम यहूदीर गुसन क'ओर।

10आर ही ब'अना रहचा कीड़ा आलारिन सहाड़ा नना गे अमके मॊधर'आ ऎन हूँ एन्नेम नना बेद्दालिक्‍कन।

11पतरस अन्‍तियोख़ेया बरचस ख़ने ऎन आसी छम्‍हा छम्‍हें आस गने आनानख्रकन। एन्‍देरगेका आस नू गुन्‍हा रहचा।

12याकॊबस तरती जोक्‍क आलर बरचर, अदही ती मुन्‍द पतरस नन-यहूदीर गने ओक्‍करकी ओना मॊख़ा लगियस। लिकिन आर बरचर ख़ने आस खतना मंजका आलर ही इल्‍चिक'आ ती पछली मंजस केरस अरा तरकूटी मना हेलरस।

13नन्‍ना यहूदी भईर हूँ पतरस गने उतुरमाड़ना नलख नंजर। अन्‍ति बरनबास हूँ उतुरमाड़ना चड्डे बेहड़ारस केरस।

14ऎन ईरकन का आर ही उज्‍जना ओक्‍कना दौ कत्‍था ही मानिम ती बिड़दो र'ई। ख़ने ऎन ओर्मर ही मुन्‍दहारे पतरसिन बाचकन, “नीन यहूदीर नू कुन्‍द्रकादय, यहूदीर ही लेक्‍खा मला, लिकिन नन-यहूदीर ही लेक्‍खा उज्‍जदय। होले नीन नन-यहूदीरिन यहूदीर ही नॆग आबोन धर'आ गे एकासे ब'आ ओंग्दय?

15नाम गा कुन्‍द्रका यहूदी हिकदत, अरा पपहर नन-यहूदीर ती मलदत।

16अन्नु हूँ नाम अख़दत, आलर नॆग ही नलख ती मला, लिकिन येसु मसीसिन पत्त'ओर ती उजगो आल मनोर। इदगे नाम मसी येसुस नू पत्ताचकादत, एकत्रु नाम नॆग ही नलख ती मला, लिकिन येसु मसीस नू पत्त'अना ती उजगो आल मनोत, एन्‍देरगेका नॆग ही नलख ती नॆ हूँ उजगो मना पोल्‍लोर।”

17नाम मसीस नू असरा नन्ना ती उजगो आल मना गे बेद्ददत, जोक्को यहूदीर नमन पपहा ब'अनर, एन्‍देरगेका नाम ओर्मा यहूदी नॆगन मल पॆस्रदत। होले इदही मने एन्ने का येसुस नमन पाप नना गे चि'अदस? कहियों मला!

18ओर्तोस यहूदीर ही ओर्मा नॆग आबोन नन्ना ती उजगो मना ओंग्‍दस, ऎन इदन अम्‍बकन चिच्‍चकन। लिकिन अउरिम अदिन नना गे पॆस्रदन होले ऎन ऎनिम एंगन बदी टिड़दन।

19ऎन गा नॆग ती अरा नॆग ही ऎरना नू केच्‍च ख़च्‍चिकादन, एकन्ने का ऎन धर्मेस गे उज्‍जोन।

20ऎन मसीस गने क्रुस नू ठोकरकादन, अक्‍कु ऎन मल्‍ला उज्‍जना, लिकिन मसीस एंग्‍है नू उज्‍जा लगदस। अक्‍कु ऎन एंग्‍है कया नू उज्‍जा लगदन होले धर्मेसी तंग्‍दस येसु मसीस नू पत्त'अना ती उज्‍जा लगदन, एकास एंगन चोन्‍हा नंजस अरा एंगा गे तंग्‍है उज्‍जनन चिच्‍चस।

21ऎन धर्मेसी मया आबोन अयंध'आ ठेकाब'आ पोलदन। नॆग ती उजगो मन्‍ना मनी होले मसीसी खे'अना सिथिया मंजा।

← Chapter 1 Jump to: Chapter 3 →