James 3

Kurukh (पुना गच्छरना NT (BSI))

← Chapter 2 Jump to: Chapter 4 →

1अना एंग्‍है भईरो, नीम अख़दर का ऎम सिख़ाब'ऊ आलम बग्‍गे सकत ती नेंवई नन्‍तार'ओम, औंगे निम्‍है ती बग्‍गे आलर कलीसिया नू सिखाब'ऊ मना गे अमके बेद्दा।

2नाम ओर्मर बग्गे रकम नू झुकुरदत। नॆ तंग्है ब'अना नू इकला हूँ मल झुकुरदस, आसिम पखड़ मंजका आलस हिकदस। ई लेक्खा आलस दिम तंग्है गोट्टा मॆदन सम्ड़'आ उंगू आलस हिकदस।

3नाम घोड़ोन नमा गे पॆस्रत'आ गे अदही बई नू लगाम लगाब'अदत, होले नाम अदही गोट्टा मॆद नू आकुस नना ओंग्दत।

4ऎरा, कोहाँ डोंगा हूँ ऎरना नू गा कोहाँ र'ई, अरा आद कोहाँ धुका ती तुकुर'ई। अन्नु हूँ चलाब'उस कोहाँ डोंगा एसन काना ही मने नन्दस आ दिसा ही तरा सन्नीम चटुवा ती किन्‍दरारकी कुद्दी।

5अन्नेम ततख़ा हूँ मॆद ही सन्नी गुना ओन्टा अंग र'ई, लिकिन कोहाँ कोहाँ फुलई मन्ना ही कत्था गुट्ठिन कछनख्र'ई। ऎरा, सन्नी गुना चिच्‍ची ही फुलंगी एका कोहाँ जंगल आबोन चिच्ची दग'ई चि'ई।

6अरा ततख़ा हूँ चिच्‍ची लेक्खा र'ई। ईद नम्‍है मॆद नू मलदौ ही ओन्टा लोक हवे। आद ओर्तोसिन गोट्टा मॆदन दगहा ननी चि'ई, अरा आसी गोट्टा उज्‍जनन ऒलत'ई चि'ई। अरा ई चिच्ची नरक ती बर'ई।

7उर्मी रकम ही मेक्‍खो गुट्ठी, अरा ऒड़ा गुट्ठी, अरा ख़ॆख़ेल नू ऎकना आलॊ गुट्ठी, अरा अम्मु नू र'अना आलॊ गुट्ठी गा आलर ही आकुस ही किइय्या मनी काली। अरा अन्नेम किइय्या मंजकी हूँ किरकी र'ई।

8लिकिन आलर नॆ हूँ ततख़न तम्‍है आकुस नू पोलनर उइय्या। ईद सगर घड़ी मलदौ ननी। अरा ईद खे'अनन ओन्द्रना महुरा ती निंदकी र'ई।

9इत्रुम नाम उर्बस नम्है धर्मे बंगासिन ओहमा नन्दत, अरा इत्रुम नाम धर्मेस तंग्है लेक्खा गढ़चका आलारिन भखदत।

10ओहमा अरा भखना ओन्टा बई तिम उरखी। अना एंग्‍हा भईरो, ईद दौ मल्ली।

11ओन्टे गुना पझरा ती एम्बा अरा बॆक अम्मु उरखा उंगी का?

12अना एंग्है भईरो, एन्‍देर अंजीर ही मन्न नू जैतून खंज'ई का, मलता अंगुर ही नाड़ा नू अंजीर ख़ंज'ई का? अन्नेम बॆक अम्मु पझरा ती एम्‍बा अम्मु मल उरखी।

13निम्है मझी नू नॆ लूरगर अरा बुझुर'ऊ र'अदस? आस तंग्है दौ उज्जना ओक्कना ती अदन ऎद्ददस नेकअन। अरा अदन लूर ती बरना लुदऊ मन्ना ती तंग्है दौ नलख गुट्ठिन नन्दस ऎद्ददस नेकअन।

14लिकिन नीम निम्‍है जिया नू करतअंग इस्‍गहा, अरा लोभिया उइय्दर होले, नीम अदही पत्त नू फुलई अमा मना, अरा मानिम ही बिड़दो नू अमके ठक'आ।

15एन्ने लेक्खा लूर धर्मेस ती मल बर'ई, लिकिन ईद सौंसार ता लूर हवे, अरा ईद मॆद ही सुबहा ता हवे, अरा ईद नाद ती बर'ई।

16एन्देरगेका एसन एसन इस्‍गहा अरा लोभिया र'ई, असन असन छितिर-बितिर अरा उर्मी मदहे मलदौ मनी।

17लिकिन एका लूर धर्मेस गुस्ते बर'ई, आद मुन्द गा नेम्हा र'ई। फेन आद सान्ति आबोन बेद्दू, अरा लुदऊ मनू, तबे नू र'ऊ, अरा सोग्‍गे अरा दौ ख़ंजपा ती निंदका, अरा तीना मल ख़ाँड़ू, मानिम गने र'ऊ र'ई।

18एकार ओर्त ओर्त गने सान्ति गने र'अरकी सान्ति गे नलख नन्नर, आर सान्ति ही बिहनी आबोन चाँख़रकी उजगो ही ख़ंजपन ख़क्खनर।

← Chapter 2 Jump to: Chapter 4 →