Genesis 49

Kituba (BIBILIYA NA KITUBA)

← Chapter 48 Jump to: Chapter 50 →

1Yakobi bokilaka bana ya yandi mpe yandi zabisaka bawu mutindu yayi: «Beno vukana kisika mosi mpe mu ke zabisa beno mambu yina ke kumina beno na bilumbu yina ke kwiza.

2Beno vukana kisika mosi mpe beno kuwa, beno bana ya Yakobi. Beno kuwa Isayeli, tata ya beno.

3Lubene, nge ni mwana ya munu ya ntete, mbuma ya ntete ya mabuta ya munu. Ntangu mu vwandaka ntete na ngolo ya munu nyonso. Nge me lutila bampangi ya nge nyonso Nge me lutila na buzitu mpe na ngolo.

4Nge kele mutindu maza ya mwila yina me luta ndilu, mpe nge ke lutila dyaka bampangi ya nge ve nge vukisaka mfulu na kento ya tata ya nge, na kusala mutindu yina, nge sumunaka mfulu ya munu.

5«Simewone na Levi ke bampangi, kiwisa ya bawu kele samu na kusala yimbi.

6Mu ke kota ve na mfundu ya bawu. Mu ke vukana ve na bawu. Na nkele ya bawu, bawu kufwaka bantu. Na kilengi ya bawu, bawu zengaka misisa ya makulu ya bangombe.

7Nkele ya bawu kuvwanda ya kusiingwa, yawu kele ya yimbi! Kudasuka ya bawu kuvwanda ya kusiingwa! Yawu ke na kyadi ve. Mu ke tula nkabwani na bana ya bawu na yinsi ya Yakobi, mu ke mwangisa bawu na yinsi ya Isayeli.

8«Yuda, bampangi ya nge ke kembila nge. Nge ke yala bambeni ya nge. Bampangi ya nge ke fukama na mantwala ya nge.

9Yuda kele mutindu nkosi ya ntwenya yina me katuka na kufwa bibulu. Yandi ke fukamaka mpe ke lalaka mutindu nkosi, mutindu nkosi ya kento: nani ke lenda na kutelemisa yandi?

10Mukawa ya kintinu ke katuka ve na dikanda ya Yuda. Yinti ya lutumu yina kele na kati-kati ya makulu yandi, ke katuka ve tii ntangu Silo ke kwiza, bantu nyonso ke tumama na yandi.

11Yandi ke kanga mbuluku ya yandi na yinti ya vinu, yandi ke kanga mwana ya mbuluku ya yandi na yinti ya mbote ya vinu. Yandi ke sukula binkuti ya yandi na vinu, kiyunga ya yandi na maza ya bambuma ya vinu.

12Meso ya yandi ke kuma mbwaki samu na vinu, meno ya yandi ke kuma mpembe samu na miliki.

13«Zabulone ke zinga na kumu ya mubu. Yandi ke vwanda na kisika yina babwatu ya nene ke telamaka. Yinsi ya yandi ke yalumuka tii na mbanza Sidone.

14«Isakale kele mbuluku yina kele na ngolo, yina ke lalaka na kati-kati ya bampaka.

15Yandi talaka ti, kisika ya kupema vwandaka mbote yinsi yina vwandaka kitoko. Yandi betamaka samu na kutula bizitu na digembo. Yandi kotaka na kisalu ya bundongo.

16«Dane ke fundisa bantu ya yandi mutindu kifumba mosi ya Isayeli.

17Bika ti Dane kuvwanda nyoka yina kele na nzila, yandi kuvwanda mutindu mpidi yina ke tatikaka bikodya ya mpunda samu na kubwisa kinati ya yawu na manima.

18«Mu me sala kivuvu ya munu na mpulusu ya Yave.

19«Ngade, nkonga ya binwani ke na kunwanisa yandi, kasi ni yandi me baluka na kunwanisa mpe kulanda bawu.

20Asele, ntoto ya yandi ke buta madya mingi. Yandi ke pesa madya yina me lunga na ntinu.

21«Nefetali kele nkabi yina ke na kimpwanza. Yawu ke na kubuta bana ya kitoko.

22«Yosefi kele mutwikila ya yinti yina ke butaka bambuma, mutwikila ya yinti yina ke butaka pene-pene ya yinto. Bintala ya yawu ke lutila bibaka ya lupangu na yinda.

23Ba me sombola yandi, ba me losila yandi madyonga, bambeni ya yandi, bikubudi-madyonga.

24Kasi, yandi me simba mbote munani ya yandi ya mvita, maboko ya yandi ke kaka ngolo, na lulendo ya Nzambi ya Yakobi, Mvungi, Ditadi ya Isayeli.

25Na nkumbu ya Nzambi ya tata ya nge, bika ti yandi kusadisa nge! Na nkumbu ya Nzambi-Mpungu, bika ti yandi kusakumuna nge, na balusakumunu ya mvula yina ke katukaka na zulu, na balusakumunu ya maza yina ke katukaka na yisi ya ntoto, na balusakumunu ya kubuta mingi ya bakento na bibulu.

26Balusakumunu yina tata ya nge ke na kupesa, yawu me lutila balusakumunu ya myongo yina kele katuka ntama, yawu me lutila bimvwama ya myongo ya fyoti yina kele katuka ntama. Bika ti yawu kulumuka na zulu ya yintu ya Yosefi, na mbunzu ya muntu yina ba me byeka na kati ya bampangi ya yandi!

27«Bezame kele yimbwa ya mfinda yina ke pasulaka musuni. Na suka, yandi ke kudyaka kibulu yina yandi me kufwa. Na nkokila, yandi ke kabulaka bibulu yina yandi me kuzwa.»

28Yina ni bifumba kumi na zole ya Isayeli. Ni mambu yina tata ya bawu zonzaka na bawu samu na kusakumuna bawu. Yandi pesaka na konso muntu lusakumunu yina fwanakanaka na yandi.

29Yakobi pesaka bana ya yandi ntumunu yayi: «Ntangu mu ke kwenda vukana na bankooko ya munu yina kufwaka, beno ke tula munu na ndyamu, kisika mosi na batata ya munu, na ntadi yina kele na bilanga ya Efelone, mu-Iti.

30Ni ntadi yina kele na kati ya bilanga ya Makepela, na kisika yina ke talasanaka na Mamele, kuna na yinsi ya Kaana. Abalayami sumbaka bilanga yina na sika ya Efelone, mu-Iti, samu na kutulaka bantu ya yandi kuna.

31Ni kuna ba tulaka Abalayami na kento ya yandi Saala. Ni kuna ba tulaka Isaaki na kento ya yandi Lebeka. Munu mpe, ni kuna mu tulaka Leya.

32Ba sumbaka bilanga na ntadi yina kele na kati ya yawu na sika ya bana ya Ete.»

33Ntangu Yakobi manisaka na kupesa bantumunu na bana ya yandi, yandi lalaka dyaka, mpe yandi vutulaka mwela. Yandi kwendaka vukana na bankooko ya yandi yina kufwaka.

← Chapter 48 Jump to: Chapter 50 →