Hosea 11

Kituba (BIBILIYA NA KITUBA)

← Chapter 10 Jump to: Chapter 12 →

1«Ntangu Isayeli vwandaka ntwenya, mu zolaka yandi. Mu bokilaka yandi, yandi mwana ya munu, na kubasika na yinsi ya Ngipiti.»

2Ba vwandaka bokila bawu kasi bawu vwandaka lutila na kuvwanda ntama na bayina vwandaka bokila bawu. Bantu ya munu pesaka minkayulu ya bibulu banzambi ya Baale. Mpe bawu yokilaka biteki maaka ya nsunga ya mbote.

3«Na kutala mbote ni munu lakisaka bantu ya Efalayime na kutambula. Ata ti mu vwandaka simba bawu na maboko, bawu bakulaka ve ti, mu vwandaka nyakisa bawu.

4Mu twadisaka bawu na lembami nyonso, mpe mu lakisaka bawu luzolo. Samu na bawu, mu vwandaka mutindu muntu yina vwandaka katula bawu na mpasi. Mu vwandaka pesa bawu madya.

5«Bawu ke vutuka dyaka ve na yinsi ya Ngipiti. Kasi bawu ke vwanda na lutumu ya ntinu ya yinsi ya Asili samu ti, bawu me manga na kuvutuka na munu.

6Mvita ke kota na bambanza ya bawu, yawu ke mwangisa bikangulu ya myelo mpe lufwa ke kota samu na mabanza ya bawu ya yimbi na yina me tadila yinsi ya bawu.

7Bantu ya munu me bika na kusala kiminu na munu. Ba ke na kubokila bawu na kuvutuka na Nzambi ya mazulu, kasi ata mosi na bawu ke na kutelama.

8«Efalayime, yinki mu ke sala nge? Isayeli, nge zola ti mu yekula nge? Nge ke na kusosa ti mu sala nge mutindu mu salaka na Adema? Nge zola ti mu sala nge mutindu mu salaka Seboyime? Ntima ya munu ke na kusala mpasi mpe mu me fuluka na kyadi mingi.

9Mu ke sadila ve nkele ya munu ya kulutila samu na kusemba beno. Mu ke mwangisa dyaka ve Efalayime. Samu ti mu kele Nzambi, kasi mu kele ve muntu. Mu kele Nzambi ya longo na kati-kati ya nge. Mu ke lakisa dyaka ve nkele ya munu ya kulutila.»

10Bawu ke landa Yave samu ti yandi ke duma mutindu nkosi. Ntangu Yave ke duma mutindu nkosi, bana ya yandi ke katuka na wesete, bawu ke kwiza na kutekita nyonso.

11Bawu ke katuka na Ngipiti, bawu ke kwiza na kutekita nyonso mutindu bandeke. Bawu ke katuka na yinsi ya Asili mpe bawu ke kwiza mutindu mabembe. «Mu ke sala ti bawu kuzinga na bayinzo ya bawu mosi.» Ni munu Yave me tuba yawu.

← Chapter 10 Jump to: Chapter 12 →