Lamentations 5

Kituba (BIBILIYA NA KITUBA)

← Chapter 4 Jump to:

1Yave, bambuka moyo na bampasi yina kuminaka beto. Tala mpe tala mbote wapi mutindu ba ke na kufingaka beto.

2Mvwilu ya beto kwendaka na bantu ya nkaka mpe bayinzo ya beto na banzenza.

3Beto me kuma bansaana, bana yina ke dyaka ve na batata. Bamama ya beto me kuma mutindu mifwidi.

4Maza ya mabulu yina beto ke kunwaka me kuma ya kusumba na mbongo. Bankuni ya beto ya kulambila, me kuma ya kusumba.

5Bayina ke kwamisaka beto, me kanga beto bizitu na laka. Beto me lemba, beto kele ve na kisika ya kupema.

6Samu na kudya mbote, beto ke na kulomba madya na bantu ya Ngipiti mpe na bantu ya Asili.

7Bankooko ya beto salaka yimbi, bawu ke dyaka ve, kasi ni beto ke na kunata bizitu ya masumu ya bawu.

8Bandongo ni bawu bamfumu ya beto mpe ata muntu ke na kukuula beto na maboko ya bawu.

9Luzingu ya beto ke na kwama na kwendaka sosa madya, samu na bantu yina ke na bambele ya mvita kuna na yinsi ya kuyuma.

10Mpusu ya banzutu ya beto me kuma tiya mutindu bantu me katuka na kati ya fule ya mampa samu ti nsatu me lutila.

11Bawu ke na kubakaka bakento ya Siyone na ngolo. Bawu ke na kubakaka bandumba na ngolo na kati ya bambanza ya Yuda.

12Ba ledikaka bamfumu, ba ke na kuzitisa dyaka ve biboba.

13Ba ke na kukwika bantwenya na kunika bambuma na ditadi yina ba ke nikaka bambuma. Bana ya babakala ke na kwendaka kubwa na dema ya bakuni.

14Bakuluntu me bika na kuyonzamaka. Bantwenya me bika na kusika bansambi ya bawu.

15Bantima ya beto ke dyaka ve na kilengi. Mabina ya beto ya kyese me kuma banzimbu ya mafwa.

16Nkembo ya beto me manisa. Kyadi na beto samu ti beto me sumuka!

17Beto ke na kutala mpasi na bantima. Meso ya beto ke na kutala dyaka mbote ve samu na mansangasa.

18Samu ti mongo ya Siyone me mwangana. Samu ti mongo ya Siyone me kuma bwala ya mibaku.

19Kasi nge Yave, nge kele ntinu ya seko. Nge ke yalaka bambandu na bambandu.

20Samu na yinki nge me zimbana beto bantangu nyonso? Samu na yinki nge me bika beto na luzingu nyonso ya beto?

21Yave, vutula beto na sika ya nge mpe beto ke vutuka. Vutula luzingu ya beto mutindu yawu vwandaka ntete.

22Nge me losa kwandi beto mbala mosi? Nge me dasukila beto mingi mutindu yayi?

← Chapter 4 Jump to: