Micah 7

Kituba (BIBILIYA NA KITUBA)

← Chapter 6 Jump to:

1Kyadi samu na munu! Mu kele mutindu kilokoti ya bambuma ya ntangu ya kisiwu, mutindu muntu me kwenda sosa bikanka ya bambuma ya vinu kana ba manisaka na kuyonzika yawu: Ya ke dyaka na ata kikanka ya bambuma ya kudya, ata mosi na bambuma ya fike ya ntete-ntete yina mu ke zolaka mingi.

2Muntu ya kukwikama kele dyaka ve na yinsi, Ya ke dyaka na ata muntu ya kusungama, bawu nyonso ke na kusosa na kukubama samu na kufwa muntu, konso muntu ke na kusadila mpangi ya yandi mutambu.

3Maboko ya bawu me mesanaka na kusala yimbi. Bamfumu kele na bandombolo, Bazuzi ke lombaka musendo. Bantu ya mfunu ke na kulakisa, na pwelele nyonso, luzolo ya bawu ya mbongo, mpe bawu ke wisanaka samu na kulungisa yawu.

4Muntu ya kulutila mbote na kati ya bawu kele mutindu matiti ya basende. Muntu ya kusungama me lutila yimbi na mankundya mingi. Yayi ni kilumbu yina zabisaka minkebi ya beno, mimbukudi. Yawu kele kilumbu ya kitumbu ya beno. Ntangu yayi bawu ke vwanda na nsoni.

5Kukwikila ve na mpangi ya nge. Kutula ve kivuvu na ndiku ya nge. Sala keba na mambu yina nge ke basisa na yinwa ya nge, ata na kento yina ke lalaka mfulu mosi na nge.

6Samu ti, mwana ya bakala ke na kusafula tata ya yandi. Mwana ya kento ke na kutedimina mama ya yandi. Mutindu mosi, kento ya makwela na bokilo ya yandi ya kento. Mbeni ya konso muntu, ni muntu ya dikanda ya yandi.

7Kasi samu na munu, mu ke tala kaka Yave. Mu ke vingila Nzambi ya mpulusu ya munu. Nzambi ya munu ke kuwa munu.

8Nge mbeni ya munu, kuyangalala ve samu na mpasi ya munu! Samu ti, kana mu me kubwa, mu ke telama, kana mu kele na kati ya kitombe, Yave kele nsemo ya munu.

9Mu me sala masumu na ntadisi ya yandi. Ni yawu yina, mu fwana kuvibidila nkele ya Yave, tii na ntangu yina yandi ke nwanina munu. Yandi ke vutula munu luve ya mambu nyonso ya munu. Yandi ke vutula munu na nsemo, mpe mu ke tala ludedomo ya yandi.

10Na ntangu bambeni ya munu ke tala mutindu yina, bawu ke fuluka na nsoni. Yandi yina vwandaka zabisa munu ti: «Wapi sika kele Yave, Nzambi ya nge?» Ba ke dyatikisa bawu mutindu poto-poto ya bala-bala mpe beto ke tala yawu.

11Kilumbu yina ba ke tunga dyaka bibaka ya nge, bandilu ya yawu ke kwenda ntama.

12Na kilumbu yina, bantu ke katuka na yinsi ya Asili mpe na bambanza ya Ngipiti, kubanda na Ngipiti tii na nzadi ya Efalate, kubanda na mubu mosi tii na mubu ya nkaka, mpe kubanda na mongo mosi tii na mongo ya nkaka.

13Ntoto ke kuma yinsi ya kuyuma samu na yimbi ya bantu yina ke zingaka kuna. Mpe samu na mavanga ya bawu ya kufwanakana ve.

14Na mukawa ya nge, twadisa bantu ya nge, mukangu yina kele mvwilu ya nge. Yandi ke na kuvwanda yandi mosi na kati ya mfinda, na kati-kati ya bayinti ya bambuma. Bika ti bawu kwenda kudya na Basane mpe na Ngalaade mutindu na ntangu ya ntama.

15Mu ke lakisa nge mambu ya ngitukulu, mutindu na bilumbu yina nge basikaka na Ngipiti.

16Bantu ya bayinsi ya nkaka ke tala yawu, ata ti bawu kele bantu ya bayinsi ya lulendo, bawu ke fuluka na nsoni. Bayinwa ya bawu ke kangama, mpe bawu ke zola dyaka ve na kuwa.

17Bawu ke kudya ntoto mutindu nyoka, mutindu mwa bibulu yina ke syelumukaka na ntoto. Bawu ke basika na biswamunu ya bawu na kutekita nyonso, samu na kwiza talana na ntadisi ya Yave, Nzambi ya beto. Boma ke kuzwa bawu mpe bawu ke banda na kuvwanda na boma ya nge.

18Wapi Nzambi yina kele mutindu nge? Yandi yina ke katulaka yimbi, ke lemvokilaka masumu ya bantu ya yandi yina bikanaka ya moyo. Nkele ya yandi ke zingilaka ve bantangu nyonso, samu ti yandi ke zolaka na kulakisa beto luzolo ya yandi ya kukwikama.

19Yandi ke tala dyaka beto kyadi, yandi ke dyata yimbi ya beto. Nge ke losa masumu nyonso ya beto na kati ya yisi ya mubu.

20Nge ke lakisa bumbote ya nge na bantu ya dikanda ya Yakobi, mpe luzolo ya kukwikama ya nge na dikanda ya Abalayami, mutindu na ntangu ya ntama, ntangu nge kudyaka ndefi na bankooko ya beto.

← Chapter 6 Jump to: