Obadiah 1

Kituba (BIBILIYA NA KITUBA)

Jump to:

1Lumoni ya Abedyase. Mambu yina Mfumu Nzambi ke na kutuba samu na bantu ya Edome. Beto kuwaka nsangu yina katukaka na sika ya Yave mpe ba fidisaka ntumwa na sika ya bantu ya bayinsi samu na kuzabisa bawu mutindu yayi: «Beno telama, beno kwenda nwanisa bantu ya Edome!»

2«Na kati ya bayinsi nyonso, ni nge mu ke kulula ya kulutila, mu ke sala ti bantu kunyafuna nge.

3Ya kele ni lunangu ya bantima ya beno me vuna beno, beno yina ke zingaka na kati ya mabulu ya matadi, ke tungaka bayinzo na zulu ya myongo mpe ke na kutuba ti: “Nani ke bwisa beto tii na ntoto?”

4Ata ti beno dumuka mutindu mbemba mpe beno tula mazanza ya beno na kati-kati ya bambwetete, mu ke kulumuna beno tii na ntoto. Ni munu Yave me tuba yawu.

5Kana miyibi to bayina ke botolaka bima ya ngana ke kwiza na sika ya beno na mpimpa. Mutindu beno lenda sala dyaka kima ve, bawu ke baka ve nyonso yina ba ke na yawu nsatu? Kana bayina ke bukaka bambuma ya vinu, kukota na kati ya bilanga ya beno ya vinu, bawu ke bika ve kaka mwa bikanka ya bambuma?

6Aa ba me kotila bantu ya dikanda ya Esawu bisika nyonso! Bimvwama ya bawu yina vwandaka ya kubumbama me talana.

7Ba ke na kubingisa beno na ntoto ya beno, bayina nyonso vwandaka sadisa beno ke vuna beno, bawu ke dyata beno. Bayina nyonso vwandaka kudya kintwadi na beno, ke lebika beno mutambu. “Beno ke dyaka na mayela ve!”

8Ni na kilumbu yina ve mu ke manisa na kufwa bantu ya ndwenga ya yinsi ya Edome? Mu ke bika ata muntu ya mayela kuzinga na zulu ya myongo ya Esawu: Ni Munu Yave me tuba yawu.

9Mbanza Temane, bantu ya nge ya mvita yina ke na kibakala, ke tekita na boma samu ti ba ke manisa na kufwa bantu nyonso ya mongo ya Esawu.»

10«Bankwamusu yina beno salaka na bampangi ya beno ya dikanda ya Yakobi, me sala ti beno fuluka na nsoni mpe beno kufwa seko.

11Beno vwandaka tala ntangu bambeni nungaka binwani ya Yuda mpe vwandaka botola bambanza ya bawu. Ntangu banzenza vwandaka bula dzeke samu na kukabula bimvwama ya Yelusalemi, beno mpe salaka mutindu bawu.

12Nge Edome, ya vwandaka mbote ve samu na nge na kuyangalala ntangu bampangi ya nge ya Yuda vwandaka na kati ya mpasi. Ya vwandaka mbote ve samu na nge na kuyangalala kilumbu yina ba mwangisaka yinsi ya bawu. Ya vwandaka mbote ve na nge na kuvwanda na kyese to kufinga bawu ntangu bawu vwandaka na kyadi.

13Ya vwandaka mbote ve samu na nge, na kukota na mbanza ya bantu ya munu ntangu ba vwandaka botola bawu bima. Ya vwandaka mbote ve samu na nge na kuyangalala ntangu bawu vwandaka na mpasi. Ya tsyelika, ya vwandaka mbote ve samu na nge na kubaka bimvwama ya bawu ntangu ba vwandaka botola bawu bima.

14Ya vwandaka mbote ve samu na nge na kutelama na magambu ya banzila samu na kufwa bayina vwandaka kima lufwa. Ya vwandaka mbote ve samu na nge na kupesa bayina vuukaka na lufwa na maboko ya bambeni na kilumbu yina ya kyadi.

15Kilumbu ya Yave me kuma pene-pene, kilumbu yina yandi ke fundisa bayinsi nyonso. Na yina, ba ke sala nge mutindu nge salaka na bampangi. Yimbi yina nge salaka, ke vutukila nge.»

16«Mutindu beno talaka nkele ya munu na zulu ya mongo ya munu ya longo, ni mutindu yina mpe makanda nyonso ya nkaka ke tala yawu. Bawu ke tala yawu ya kulutila, yawu ke sala ti bawu kola mpe bawu ke vwanda mutindu bantu me zingaka ntete ve.

17Kasi bayina ke vuuka, ke kwenda zinga na zulu ya mongo ya Siyone, mongo yango ke kuma dyaka ya longo mpe bantu ya dikanda ya Yakobi ke baka dyaka yinsi mpe bima ya bawu nyonso.

18Bantu ya dikanda ya Yakobi ke kuma mutindu tiya mpe bantu ya dikanda ya Yosefi ke vwanda mutindu milaka ya tiya. Kasi bantu ya dikanda ya Esawu ke vwanda mutindu nyanga yina ba me yoka tiya mpe ata muntu ke vuuka. Ni munu Yave me tuba yawu.»

19Bantu ya dikanda ya Yuda ke botola mongo ya bantu ya Edome yina kele na sude. Bantu ya Sefela ke botola yinsi ya Ba-Filiseti mpe Samaliya, yinsi ya bantu ya dikanda ya Efalayime. Bantu ya dikanda ya Bezame ke botola yinsi ya Ngalaade.

20Bantu ya Isayeli bayina kwendaka zinga na bayinsi ya nkaka, ni bawu binwani yina ke bingisa bantu ya Kaana tii na Salepeta. Bayina katukaka na Yelusalemi samu na kukwenda zinga na bayinsi ya nkaka, bayina ke zingaka na Sefalade, ke botola bambanza ya Nengeve.

21Bantu ya munu yina ke nunga, ke yuluka na zulu ya mongo ya Siyone, bawu ke yala yinsi ya Edome mpe Yave ke vwanda ntinu!

Jump to: