2 Thessalonians 1

Kikwango Bible (Le Nouveau Testament en Kikwango 1950)

Jump to: Chapter 2 →

1Paulu ye Silvano ye Timoteo fidisa mbote kwa dibundu ya bisi Tesalonika mu Nzambi, Tata ya beto ye Mfumu Yesu Klisto.

2Nlemvo kwa beno ye yenge ya katuka na Nzambi Tata ya beto ye Mfumu Yesu Klisto.

3Beto fwiti kupesa matondo kwa Nzambi ntangu yonso sambu na beno, bampangi, bonso yo ikele kulunga, kadi na lukwikilu ya beno ikele kukula mingi mingi, ye zola ya muntu na muntu nakati na beno yonso kwa ngana kwiza mingi.

4Sambu na yai, beto kibeni ikele kudiyana mu beno mu mabundu ya Nzambi, sambu na tatamana ya beno ye lukwikilu mu nzomono yonso ya beno, ye ntantu ya beno ikele kuvibidila.

5Ikele kidimbu ya monika ya mfundusu ya lunungu ya Nzambi, na beno tatangwa ya lunga ya kimfumu ya Nzambi, sambu na yo beno moniswaka mpasi mpe.

6Kana yo ikele mambu ya lunungu kwa Nzambi kuvutula mpasi kwa bau ya monisa beno mpasi;

7kwa beno ya moniswa mpasi, vunda sikamosi na beto mu nzaikusu ya Mfumu Yesu tuka zulu ye banjo ya ngolo ya yandi,

8mu nlemo ya tiya kuvutula ndinda kwa bau ya zaba Nzambi ve ye bau ya lemvuka ve nsamu mbote ya Mfumu ya beto Yesu.

9Bau tamoniswa mpasi, yo ikele lufwa ya mvu ya mvu tuka luse ya Mfumu ye nkembo ya ngolo ya yandi,

10bu yandi takwiza mu lumbu yina kukembiswa, ye kuyitukwa nakati na bau yonso ya kwikilaka mu lumbu yina, sambu na beno imene kukwikila kitemo ya beto kwa beno.

11Sambu na yai beto lomba ntangu yonso sambu na beno, na Nzambi ya beto tatanga beno ya lunga na mbokolo ya beno, ye kulungisa mu ngolo, lutondo yonso ya mbote, ye kisalu yonso ya lukwikilu,

12na nkumbu ya Mfumu ya beto Yesu lenda kukembiswa mu beno, ye beno mu yandi, bonso ikele nlemvo ya Nzambi ya beto ye Mfumu Yesu Klisto.

Jump to: Chapter 2 →