Philemon 1

Luganda (BIBU1) (BIBULIYA ENTUKUVU)

Jump to:

1Pawulo, omusibe wa Kristu Yezu, ne muganda waffe Timotewo. Ya mukozi munnaffe Filemoni omwagalwa,

2ne mwannyinaffe Affiya, mutabaazi munnaffe Arikippo, n'Ekleziya asisinkana mu nnyumba yo.

3Enneema ebeere nammwe, n'eddembe lya Katonda Kitaffe n'Omukama Yezu Kristu.

4Bulijjo neebaza Katonda buli lwe nkujjukira mu ssaala zange,

5kubanga mpulira ku kwagala kw'oyagalamu abatuukirivu bonna, n'okukkiriza kw'okkirizaamu Omukama Yezu.

6Nsaba nti okussa ekimu kw'olina mu kukkiriza kukole mu ggwe, omanye na buli kirungi kye tulina mu Kristu.

7Okwagala kwo kwansanyula bya kitalo era ne kunkubagiza, kubanga olw'okubeera ggwe, emitima gy'abatuukirivu giweweddeko.

8Newandibadde mu Kristu nandigumye okukulagira ky'osaanye okukola,

9naye olw'okubeera okwagala, nkuwanjagira buwanjagizi; nze Pawulo, omukadde ate kati omusibe wa Kristu Yezu,

10nkuwanjagira olw'omwana wange gwe nazaala nga ndi mu njegere zino, ntegeeza Onesimo.

11Mu kusooka yali takugasa, naye kati atugasa ffembi, nze naawe.

12Mmukusindikidde akomewo, oyo kyenkana omutima gwange gwennyini.

13Nandyagadde mmusigaze, ggwe w'otoli annyambe nga ndi mu njegere olw'Evangili,

14naye saayagala kukola kantu nga ggwe tokkirizza, ky'okola ekirungi kireme kubeera ng'eky'etteeka, wabula kibeere ekivudde mu kwetuma.

15Ndowooza yakuggyibwako akaseera, alyoke akuddizibwe nkomeredde,

16nga takyali muddu, wabula ng'asinga n'omuddu, owooluganda omwagalwa, omuganzi gye ndi, ate asingawo n'obuganzi gy'oli ng'omuntu ate ne mu Mukama.

17Kale nno bw'oba ng'ontwala nga munno, mwanirize nga bwe wandyanirizza nze.

18Bw'aba ng'aliko kye yakusobyamu, oba ng'oliko ky'omubanja, kibalire ku nze.

19Nze Pawulo, kino nkiwandiise n'omukono gwange gwennyini nti ndikisasula, ne bwe siiyogere ku bbanja ggwe ly'onninako.

20Kale nno, owooluganda, njagala ombeerere wa mugaso mu Mukama, omutima gwange oguwe guweweereko mu Kristu.

21Nkuwandiikidde nga neesize obuwulize bwo, nga mmanyi nti ojja kukola ate osinzeewo ne ku kye nsaba.

22Ate mu kaseera ke kamu, ntegekeraawo ekisenge, kubanga nsuubira nti olw'essaala zammwe nnyinza okubaddizibwa.

23Epafura, musibe munnange mu Kristu Yezu, akutumidde;

24era ne bannange bwe tukola: Mariko, Aristariko, Dema ne Luka.

25Eneema ya Mukama waffe Yezu Kristu ebeere n'omwoyo gwammwe.

Jump to: