3 John 1

Lugbara (E’yo Siza Alatararu Munguniri BIBLIA)

Jump to:

1Atalau, Gayo ovupi lezaru avasi, mani lele e’yo adaru ma aliari vu.

2’Ba mani leleri, ma zi Mungu tia ’dini e’yo mini dria ma ovu onyiru, azini mi rua ma ovu alaru, ekile mi orindini ovule onyirurile.

3Ma ovu ndra ayikosi tu, adripi ka eca e’yo mini adaruri ma eti nzezu, ekile mini acile e’yo adaru ma aliarile.

4Ma ovuni ayiko azini amboru ayiko ’diri agapi rari be ku, mani eriria kini anzi mani yi ad e’yo i adaruri ma alia.

5’Ba mani leleri, azi mini ’yele adripi vu, ka tro ’ba mini nile ku ’diyi tiri eri azi adaruri’i.

6’Ba nde ’diyi nze leta mini ma e’yo ma eti kanisa ma milia. Mi nga ’ye onyiru mi ka yi idri drile acita yini ma alia ekile dri fupi Mungu ma miliarile.

7A’disiku Ru nde ma e’yosi yi fu mu ra, afa aluni a’izu ’ba jururu dri ku.

8E’yo ’dirisi ama ma a’i ’ba ’dinile ’diyi ra, ’dini ama ma ovu ’ba azi ngapi yi be tualu e’yo adarusi ’diyi ani.

9Ma si e’yo azini kanisa vu ’bo; te Diotrefe, lepi i ’bapi ’ba ’diyi ma driliari, a’ini ama ku.

10E’yo ’dirisi, ma ka nga mu ra, ma nga azi erini ’yeleri ma e’yo ega, erini ama aji diria toko e’yo ’yoza onzikanyaru ’diyisi. Te e’yo ’diri funi dri eri dri a’dule ku, te eri ma ngulupi a’ini adripi ’diyi ku, eri vini ’ba lepi yi a’ipi ’diyi oga indi, yi odrozu kanisa ma aliasi amve.

11’Ba mani leleri, mi bi e’yo ovupi onziruri ma vuti ku, te e’yo onyiruri’i. ’Ba ’yepi onyiruri eri ’ba Munguni, te ’ba ’yepi onziri ndreni nga Mungu ku.

12’Ba dria nze Demeterio ma e’yo eti ’bo, e’yo adaru ma ngulupi ece vini e’yo erini; ama e’yo erini ma eti nze ama’i indi, azini mi ni ra e’yo eti nzeza amani ovu adaru.

13Ma ovu e’yo be kakau sizu mi vu, te ma leni yi sizu mi vu vino pisi kalamu be ku;

14te ma le avasi mi ndrezu mbele, azini ama nga e’yo ’yo milia milia.

15Asi anzuru ma ovu mi be. Mi agyi ’diyi zi mi ci ci. Mi ma zi ma agyi ’dayi ci ci rusi rusi.

Jump to: