Galatians 2

Lugbara (E’yo Siza Alatararu Munguniri BIBLIA)

← Chapter 1 Jump to: Chapter 3 →

1Vilerisi eli mudri drini su ma vutia ma nga tu Yerusalemua dika Baranaba be, Titoni ’duzu jizu ma be indi.

2Te ma tu Munguni e’yoni ecele ma dririsi; ma e’da e’yo bari mani olule ’ba Jururu ma eseliari yi dri (te ndindiru, ’ba e’daza ma milia), kani nzuta mani curu’dori pi andrari be yi toko yani.

3Te Tito; ovupi ma berini tro ovuzu Girikiouniri ti, yi omini eri okposi agele liza a’izu aluni ku.

4Te eri ovu ’dini adripi inzoru ofile ndindiru, efipi: ecapi ndindiru truta amani amani ovuzu eri be Yesu Kristo ma aliari ma e’yo mbazu, yi ma oja ama ati’baru beni, ’diyi ma e’yosi-

5te i ama ’bani ama yi ma palaa yi inzizu kani etu alu ’dipi ra ’dinini ku, e’yo bari ma ada ma ta mbazu emi dri ’dani ani.

6Te ’ba e’daza inzile inzi ’diyi vu-yi ka tro ndra ovu ’ba ngoniru yani ti, eri ma dri e’yo amboruni yo; Mungu openi ’ba ku -ada, ’ba e’daza ’diyi imbani ma e’yo o’di azinisi ku;

7te drinisi yi ka ndre a’i e’yo bari kuzu ma dri oluzu ’ba agele lile ku ’diyi dri ra ekile kule Petero dri oluzu ’ba agele lile ra ’diyi dririle,

8(a’disiku ’ba ’yepi okposi Petero vu eri ’bazu ’ba tini peleriru ’ba agele lile ra ’diyi vuri ’ye ma vu okposi indi ’ba jururu ’diyi vu),

9yini ’yeta anzutiri fele ma driri niria, Yakobo pi Kefa pie Yohana be, yi ’ba e’daza agoferu ’diyi, yi fe ndra ama dri Baranaba be dri ndi ti ecitaniri, ama ma mu ’ba jururu ’diyi vu, te yi’iruni ’ba agele lile ra ’diyi vu;

10te e’yo alu, yi le ama ma ega ’ba alioru ’diyi ma e’yo, ’di bani e’yo mani lele ’yele avasiri’i ku, ka’dini mi ’ba jururu ’diyi omi okposi adrizu ’ba Yahudiniru ngoni ngoni ya?

11Te Kefani ndra ecaria Antiokiaa ama aru ama dri eri be milia milia, e’yoni eri ndele rarisi,

12A’disiku de nga ’ba azini engapi Yakobo vu ’diyi ecani ku, eri adri nyaka nya ’ba jururu be tualu ra; te yi ka eca ’bo, eri nga i nze vile, nga i esele co yi be, erini ’ba agele lile ra ’diyi rulerisi.

13’Ba Yahudini acepi ’diyi nga ’ye lokirisi indi eri be i tualu, ’dini lokiri yini se vini Baranabani indi.

14Te ma ka ndre yi acini kililiru e’yo ada e’yo barinile ku, ma ’yo Kefa tia yi milia dria, Mi ovupi ’ba Yahudiniruri ka adri ’ba jurururile, te ekile ’ba Yahudinirile

15Ama ka tro ovu ’ba Yahudini ma efi, ’ba jururu e’yo onzi ’yepi ’diyiru ku ti,

16te amani niria kini ’ba ovuni lazaru kililiru ’bani ’yeta azitani ’diyi ’yelerisi ku te ’bani Yesu Kristoni a’ilerisi, ama’i ama a’i Kristo Yesuni ra, ama ma ovu di lazaru ani kililiru amani Kristo a’ilerisi, amani ’yeta azitani ’diyi ’yelerisi ku, a’disiku ’ba rua ari beri aluni ngani ovu lazaru kililiru ’yeta azitani ’diyisi ku.

17Te amani o’biria ovuria lazaru kililiru Kristosi, de isu ama ngulupi ovu ’ba onzi ’yepi ’diyi, ka’dini Kristoni azi nga onzi aza kozu ya? ’Dini aluni yo!

18Te ma ka afa mani anzule ’diyi si dika, ma ece ma ’ba azita ezapiriru.

19Te azita ndesi ma dra azita vu, ma ma ovu ani idriru Mungu vu.

20Yi di ma pati ruaa Kristo be ’bo; ma ovuni di idriru curu’do ma’i ku, te Kristo ovu idriru ma aliani; te e’yo mani curu’do ovuzu idriru ruasiri, ma ovu idriru a’ita mani Mvi Munguni ma lepi avasi, i ma ngulupi fepi ma pariari a’izurisi.

21Ma ’bani ’yeta anzutiri Mungunirini ovuzu toko ku; te e’yo ’ba lazu kililiruri ka ovu azitasi, de di Kristo dra oye.

← Chapter 1 Jump to: Chapter 3 →