Habakkuk 2

Lugbara (E’yo Siza Alatararu Munguniri BIBLIA)

← Chapter 1 Jump to: Chapter 3 →

1Ma nga pa so amuti mani angu tezuri ma alia, ma nga ma ’ba jo izururi ma dria, ma nga lu e’yo erini ngale ’yole ma beri ndrezu, azini omvita mani nga ovu ngoni wuta mani ma e’yosi.

2Yehova omvi di e’yo ma tia kini: Mi si e’yo mini ndreleri; mi si eri oni dria kililiru, ’ba lapiri ma nzu mbeleru beni.

3A’disiku e’yo ndrezaru ’dori ma ewu azileri nga kiri indi, eri ’ye i de de mbele-te eri ngani ovu inzoru ku. Eri ka tro nga ece ra ti, mi ma te eri’dani; a’disiku eri nga eca ra adaru, ngani dri ici ’dasi ku.

4Mi ndre, orindi erini ipi i afusi ra, orindi erini ovuni kililiru eri alia ku, te ’ba kililiruri nga ovu idriru a’ita erinisi.

5Azini indi, patiefi suni eri ’ba lokiriruri, eri ’ba ambo beri, teni aku inia ku. Eri li ini ere pari ’ba drazanirile; eri ovu drale, econi trazaru ku. Te eri oku i vu suruti ndu ndu dria, eri otra ’ba dria ngulu ngulu i vu indi.

6’Ba ’diyi dria ngani e’yo o’beza o’be eri ruaa ko ya? ngani e’yo o’beza ajidimararuri o’be eri ruaa ’dini ku ya? kini, Candi ’ba afa ovupi iniru kuri erepiri driovuzu ewu ngopi ya?- ’ba afa toboru o’bapi i ruaa terileri!

7Yi ngani enga mi dria rugbu mi cizu ku ya? Azini ’ba ngapi mi inzapi ’diyi nga enga o’duarisi; mi ngani ovu yi dri kile afa ’bani opale ombaarile ku?

8A’disiko mi epa suru kakau ma afa ra, e’yo ’disi suruti ndu ndu ma joloko acepi ’diyi dria nga mi afa opa ra, a’disiku ari ’bani ma e’yosi, mini angu nderi pi ’yele eganasi aku amboruri pie, ’ba ovupi alenia ’diyi pie driarisi.

9Candi eri dri, ’ba orodri e’yo onziniri ejipi jo ini driri, i ma ’ba jorovu ini pari ururia ani, i ma ovu ani pazaru e’yo onzi ma dria beni.

10Mi otu drinza ejizu jo mini ma dria ’bo, mini suru kakau ofulerisi; mi ’ye onzi orindi mini dri ’bo.

11A’disiku oni ovupi abi aliari nga wu wu, azini bau pati eseliari nga e’yo nderi omvini.

12Candi eri dri, ’ba aku sipi arisiri, azini aku amboru ’bapi okporu e’yo onzisiri.

13Mi lu e’yo ’bani azi ngazu aci veza dri azini suruni yi ngulupi inzazu tokori ovuni e’yo Yehova asikari ongulumurunirinisi ku ya?

14A’disiku wudrikuruni nga ga tre nita diza Yehovanirinisi ekile yini miri opilerile.

15Candi eri dri, ’ba afa mvuza fepi agyi ini driri, aoko osuzu eri dri, eri fezu atizu ani indi, mi ma ndre yi rua pililiruri beni.

16Mi ga tre drinzasi diza ma paria. Mi mvu, mi e’da mi ’ba agele liza kokorurile! Okelea ovupi Yehova ma dri ndiari nga i oja mi vu, azini drinza onzikanyaruni nga ovu diza mini dria!

17A’disiku e’yo onzi mini ’yele eganasi Lebanoni vuri nga mi a’bu ra; dri jaza anyapa dri jazuri nga uri fe mi dri, a’disiku ari ’bani ma e’yosi, mini angu nderi pi ’yele eganasi, aku amboruri pie, ’ba ovupi alenia ’diyi pie driarisi.

18Wura inzile inzi ’bani opaleri ma orodri ngoni ’ba edepirini ndra eri edezu aniri ya? Wura edele aya akapi acisirisiri, imbapi inzoruri’i, orodrini ngoni, ’ba azi nde edepirini a’ita ’bazu eri ma alia, wura inzile inzi e’yo ’yopi ku ’dinile ’diyi edezuni ya?

19Candi ’ba ’yopi pati tia, Mi oru mi-ri dri; ’yopi oni e’yo ’yopi kuri ma tia kini, Ma enga-ri! Ma ’diri eco imbazaru ya-? Mi ndre nga, a’bu ruani mele pisi dahabu be, te ava ’yaza alenia aluni yo.

20Te Yehova adri hekalu ini alatararori ma alia; wudrikuru dria ma adri ciri eri ma drilia.

← Chapter 1 Jump to: Chapter 3 →