Haggai 1

Lugbara (E’yo Siza Alatararu Munguniri BIBLIA)

Jump to: Chapter 2 →

1Eli iriri opi Darioni suru nyazurisi, mba azia ma o’du okorisi, e’yo Yehovani nga eca geri nabi Hagai ma tiarisi Zerubabeli Sealitieli mvi, ambo ’ba dri cepi Yudaari mvu, eca indi Yosua Yehozadaki mvi, kuhani amboruri vu, kini,

2Yehova asikari ongulumuruniri ’yo ’dini kini; ’Ba nde ’diyi ’yo ra kini, O’du amani ngazu emuzu, o’du nde amani Yehova ma jo sizuri ecani nga ’yeke ku.

3’Di ma vutia e’yo Yehovani nga di eca geri nabi Hagai ma tiarisi, ’yozu kini,

4Te o’du ’diri ovu ’yeke emi ma ngulupini adrizu jo emini mileni bile uru ci ’diyi ma alia, de jo ’diri ovu toko sikokoru ya?

5E’yo ’disi curu’do Yehova asikari ongulumuruni ’yo ’dini: Emi dro asisile emini adriza emini ma dria.

6Emi ri ori amboru, te emi lo were; emi nya ra, te emi trani ku; emi mvu ra, te cani emi alia ku; emi bongo su ra, te rua emini drini aluni ku; ’ba oya a’ipiri eri oya a’i kiri suzu jurua eti lupi rari ma alia a’dule.

7Yehova asikari ongulumuruniri ’yo ’dini: Emi dro asisile emini adriza emini ma dria.

8Emi tu uru oni dria, emi ga pati jo nde sizu; e’yo ’diri nga ayiko fe ma dri, eri nga diza fe ma dri indi, Yehova ’yo ra.

9Emi ega ndra kini emi nga afa isu tu, te emi ndre eri efu were a’dule; emini eri ejiria emi vile akua ’bo, te ma vu drinia ra. A’disi ya? Yehova asikari ongulumuruni ’yo ’dini. A’disiku jo mani ovu pirini sikokoru, te emi’i, emi alu alu nzu emi vile joa.

10Ka’dini e’yo eminisi ma oga ’buni andrali feko si, ma oga nyakuni efi ’yako si indi.

11Ma omve vini etuka angu ezazu, oni pi ma dria, anya pie, patiefi ma su pie, odu pie, afa engapi nyakua ’diyi pie, ’ba pie, anyapa akua ’diyi pie, azi ’bani ngale yi drisiri pie dria.

12Zerubabeli Sealitieli mvi pi, Yosua Yehozadaki mvi kuhani amboruri pie, ’ba acepi jolokoru ’diyi be dria, yi nga di Yehova Mungu yiniri ma o’duko eri ra, e’yo nabi Hagaini ’yole ’diyi be, ekile Yehova Mungu yinirini eri ti pelerile, ’ba nde ’diyi nga di ovu urisi Yehova ma milia ani.

13Hagai ojio Yehovani nga di e’yo Yehovani olu ’ba nde ma tia, kini, Ma ovu emi be ra, Yehova ’yo ’dini.

14Te Yehova nga Zerubabeli Sealitieli mvi, ambo ’ba dri cepi Yudaari pi ma orindi enga, Yosua Yehozadaki mvi kuhani amboruri ma orindi pie, ’ba acepi jolokoru ’diyi ma orindi pie dria; yi emu azi ngazu Yehova asikari ongulumuruni, Mui ngu yiniri ma jo alia ra,

15mba azia ma o’du kali iri drini susi, eli iri ewu opi Darioni opi nyazurisi.

Jump to: Chapter 2 →