James 5

Lugbara (E’yo Siza Alatararu Munguniri BIBLIA)

← Chapter 4 Jump to:

1Emi eri curu’do, emi ’ba afa e’ini ’diyi, emi ma owu, emi ma lulu candi ngapi ecapi emi vu ’diyisi.

2Lonyi emini ma ra odudu mbe bongo suza emini ’bo

3Mele emini pi dahabu emini be yi oja yi urizaru ’bo; urizaniri nga e’yo eti nze emi dria, eri nga emi rua nya acile.

4Mi ndre, ’ba azi ngapi angu emini vopi ’diyi ma oya, emini gale feko yi dri lokirisiri eri oyu uru azini otreta ’ba anya lopi ’diyini Opi asikari ongulumuruniri ma bilia ’bo.

5Emi ovu ndra afa onyiru nyakuni ’diyi be tre tre, emi ’ye ndra e’yo dria ava emi ruaarini lelerile; emi fe emi asini trazu o’du afa lizurisi.

6Emi li ’ba kililiruri ma e’yo eri ndezu, emi fu eri ’bo; eri ogani emi ku.

7Awa’dini, adripi, emi ma ovu asi teza be kpere Opini ecaria. Mi ndre, ’ba nga ’yapiri adri efi kaza nyakuni aje ambosiri ma mile ga, eri tezu asi tezasi de ozoo ayini pi ozoo wadrini be ’dini nga drinia ku.

8Emi ma ovu asi teza be alu indi. Emi ’ba emi asi okporu, o’du Opini ecazurini ovule ogogorisi.

9Adripi, emi one emi agyi ma dria emi eselia ku, yi kazu e’yo emini lizu ku; mi ndre, ’Ba e’yo Lipiri so pa jotilea ’bo.

10Adripi, emi bi nabi e’yo ’yopi Opi ma rusi ’diyi ma e’yo ecetaru candi nyaza pi ma e’yo ecezu asi teza be.

11Mi ndre, ama adri ’ba candi nyapi asi tezasi ’diyi omve ’ba drilebaru. Emi eri asi teza Yobuni ma e’yo ra, emi ndre e’yo Opini ’yeleri ma asiza ’bo indi, kini Opini ovu asi ndriza be tre azini yiki be tu.

12Te agapi driari, adripi mani, emi ma so oyo ku, kani ’ba ma rusi kani nyaku ma rusi ku, kani oyo azini e’yo ndu ndu ’diyisi ku indi, te e’yo lemini awa’diniri ma adri awa’dini, ’dini yori ma adri ’dini yo; emi kazu ’dezu e’yo lizuri ma alia ku.

13’Ba azini emi eselia candi be ya? Eri ma zi Mungu. ’Ba azini ovu ayiko be ya? Eri ma ngo ongo inzitani,

14’Ba azini emi eselia azo be ya? Eri ma omve ’ba ’wara kanisani, yi ma zi Mungu eri dria, yini odu osuria eri ruaa Opi ma rusi;

15Mungu ziza a’itasiri nga ’ba azo beri pa ra, Opini nga eri enga ra; eri ka tro ndra e’yo eza ra ti, eri nga e’yo nderi wu ra.

16Awa’dini, emi e’da ezata emini emi eselia, azini emi ma zi Mungu emi alu alu dri, emi rua ma ovu atizaru beni. Zita ’ba kililiruni Mungu zizuri ovu okpo be tu e’yo ’yezu.

17Eliya eri ovu ndra ’ba ekile amale, te eri zi Mungu okposi kini ozoo ma ’di ku; ozoo ’dini ani nyakua ku trua eli na drinia mba azia,

18Vutinia eri zi Mungu dika; ’bu nga di ozoo fe, nyaku nga efi ini ka ani.

19Adripi mani, ’ba azini emi eseliari ka aba e’yo adaru kuzu, te ’ba izini ka eri omvi ra,

20emi ma ni cini ’ba ’ba onzi omvipi geri erini ibazuriari nga orindi ’bani pa dra ma ilia, eri nga ezata kakau ma dri i’bu ra.

← Chapter 4 Jump to: