Jude 1

Lugbara (E’yo Siza Alatararu Munguniri BIBLIA)

Jump to:

1Yuda, ati’bo Yesu Kristoni, Yakobo ma adriruri, si waraga ’Ba ovupi omvezaru, ovupi lezaru Mungu Ata ma alia, ovupi ta mbazaru Yesu Kristosi ’diyi vu:

2Yiki pi, asi anzuru pie, leta pie ma ga emi alia tre.

3’Ba mani lele ’diyi, mani leria asi driasi e’yo sizu emi vu pata ama driani ma e’yosi, e’yo mi ma asi mani e’yo sizu ani emi vu matu ’bazu emi vu emi ma ’ba omba asi driasi a’ita nde ovupi fezaru ’ba alatararu ’diyi dri pale aluri ma e’yosi.

4A’disiku ’ba azini efi ndindiru, yi ’ba ndra e’yoni sile drio yi ma isu ani e’yo liza ’diri ’diyi, yi ’ba Mungu inzipi ku, ’yeta anzutiri Mungu amanirini ojapi e’yo drinzaru, Ambo amani alu Opi Yesu Kristoni gapi si ’diyi.

5Te di, ma le emi ma ega, emi ka tro e’yo dria ni ndra ’bo ti, kini Opi ka okorisi ’ba opa angu Misiriniasi ’bo, vilerisi eri ja ’ba a’ipi ku ’diyi ma dri ra.

6Azini malaika pari yini opiruri ma ta mbapi ku, angu adaru yini ovuzuri kupi ra ’diyi, ku yi anziriku ’dani ’dani ’diyisi ini ma alia, e’yo liza o’du amboruni tezu,

7’Dinile Sodoma pi Gomora be, aku yi ma ageia ’diyi pie, yini yi ngulupi fele e’yo awuru ’yezu ’ba ’diyile tro trorisi, azini yini fule li ’bazu rua ndu ndu ma driarisi, yi isu ani e’yo liza aci ’dani ’danirini yi ma ruaa, yi ovu ani ecetaru.

8’Dinile ’ba ’diyi, orobini yi obiria, yi yi rua eza onzivuru, yi e’yo opini ’ba toko, yi ’ba ’ba drilia ’diyi o’da o’da.

9Te Mikaeli malaika ma dri cepiri’i ti, eri ka omba ’ba Satani be, erini agata garia avu Musani ma e’yosi, eri ovuni asi i mbazasi e’yo lizu eri ma dria o’dataru ’ku, te ’yo lu kini, Opi ma ega mi driani.

10Te ’ba ’diyi yi e’yo yini nile ku ’diyi o’da, azini yi vini yi eza saaru e’yo yini vale ceni ondua yini yi osizu eri berisi ekile anyapa egata kokoru ’diyile ’diyi ma alia indi.

11Eyawaye, ’ba ’diyi ye yini acile geri Kainini ma aliarisi yo! yini nzule badakaru ezata Balamuni ma vuti bizu oya ndazurisi yo! yini dri jale agata gaza Koraniri ma aliarisi yo!

12’Ba ’diyi yini omu nyaria emi be, ovu kumu zizaru omu emini letani ’diyi ma alia, yi fe yi ma ngulupini trazu uri kokoru; yi iriti ozoo kokoru, olini odrole ’diyi; yi pati bi lupi elisi efi ’yakokoru, drapi pale iri, onzele ola be pi pi ’diyi;

13yi yi mirini ombupi ombu ombaru, drinza yini ma kafuto emipi ’diyi; ’bi ’bio acipi saaru ’diyi, ede yi dri ini iniciciruri kpere ’dani ’dani.

14Azini Enoka indi, a’bimva aziriru e’dozu Adamusiri, olu ndra e’yo yini kini, Mi lu, Opi eca ’ba erini alatararu alifu mudri ’diyi be,

15’ba dria ma e’yo lizu, azini egazu ’ba Mungu inzipi ku ’diyi ma dria dria azi onzi yini ’yele Mungu inzikokoru ’diyisi, azini e’yo okporu ’ba e’yo onzi ’yepi Mungu inzipi ku ’diyini ’yole eri o’dazu ’diyisi.

16’Ba ’diyi yi ’ba onopi, ’ba amata amapi tu ’diyi, acizu li yini ma vutisi, yi ma tileni e’yo ’yo afusi tu, yi adri ’ba inzi inzosi yini yi ma orodri ndazu.

17Te emi’i, ’ba mani lele ’diyi, emi ma ega e’yo ’yoza ’ba ti opele Opi amani Yesu Kristoni ’diyini ’yole okori;

18emi ma ega kini yi ’yo emi tia kini, Ewu vileri ma alia ’ba o’data o’dapi ’diyi nga ovu indi, acizu li yi ma ngulupini Mungu inzikokoruri ma alia.

19’Ba’diyi yi ’ba esele coza fepi ’diyi, yi ’ba ruani, Orindi kokoru.

20Te emi’i, ’ba mani lele ’diyi, emi ezo emi ngulupi uru a’ita emini alatararu turi ma alia, Mungu zizu Orindi Alatararurisi;

21emi ma mba emi ngulupi ma ta ale Mungunisi, emini yiki Opi amani Yesu Kristoni teria kpere idri ’dani ’dani vu.

22Emi ma ovu yikisi ’ba azini pa sopi a’ita ma alia kililiru ku ’diyi vu;

23emi opa ’ba azini ’diyi, emini yi osezu aci ma aliarisi; emi ma ovu yikisi ’ba azini ’diyi vu pi uri be; emi ma ngu bongo ondi ruanini i otizu ruania ciri ngu ngu.

24Curu’do eri’i ecopi emi agei tepi emini ani e’dezu ku, azini fepi emini pa sozu diza erini ma milia asu suza kokoru ayiko amboru ma alia,

25Mungu alu a’dule ’Ba ama Papiri, diza ma ovu indi, Yesu Kristo Opi amanisi, ambo pie, dri ceza pie, okpo pie dria, engazu ndra okokele, curu’do, azini kpere ’dani ’dani. Amena.

Jump to: