Nahum 1

Lugbara (E’yo Siza Alatararu Munguniri BIBLIA)

Jump to: Chapter 2 →

1E’yo ngapi ecapi Nineve ma driari’i. Buku e’yo Nahumi ’ba Elikosiarini ndreleri ecepiri’i,

2Yehova ovu Mungu a’yaru, onzi arioti ofepiri’i,Yehovani arioti ofe ra, eri ga tre adrasi; Yehovani arioti ofe ’ba a’di ’dipi i be ’diyi ma ruaa, eri mba adra ma ta ari’ba ini ’diyi dri.

3Yehovani ’bani adra mbele ku, eri okpo be tu, eri ngani vini ’ba azi onzi ’yepi ’diyi leu pirini ku. Geri Yehovani ovu akuluku pi ma alia oliriko be, azini iriti yi ovu irifura eri ma pa agelearile.

4Eri ega miri dria, fe yini nzu ra, eri anga yi ara dria; Basani pi Karimeli be, yi ma okpo de ra, Lebanoni ma fu onyu ra.

5Oni ’wara ’diyi dria yi ya ya eri drilia, azini oni nyiri yi aka menemeneru; te nyaku api i eri ma milia ra, adaru, angu wudrikuruni afa ovupi alenia ’diyi pie dria.

6A’di eco pa sozaru aoko erini ma miliani ya? A’di eco ovozaru adra aciru erini ma aliani ya? Adra eriniri osu i ekile acile, te eri asi kata asi asi.

7Yehova ovu onyiru, pari okporu ’bani i ta mbazu ani o’du candinisiri’i; eri ni ’ba nzupi i vu yi ta mbazu ’diyi ra.

8Te eri nga pari erini ’de yi tiza amborusi teketeke, eri nga vini ari’ba ini ma vuti dro kpere angu biza ma alia.

9Emi a’di e’yo ega ’yezu Yehova vu ya? Eri nga e’yo de teketeke; inzata ngani enga pale iri ku.

10Yi ka tro ovu oci ekilazale ti, azini yi ka tra afa mvuzasi ekile ewasirile ti, yi nga dri ja ra ekile ase ’wipi teketekerile.

11’Ba azini efu mi alia e’yo onzi egazu Yehova ma ruaa; eri ’ba imba e’yo onzi ’yezu.

12Yehova ’yo ’dini, Yi ka tro ovu okpo be dria tre, ka ovu vini karakarau ti, yi nga yi oli va, eri nga aga mu ra. Ma ka tro fe ndra inzata mi dri ti, ma ngani mi inza dika ku.

13Curu’do ma nga di pati kulumburu onyo mi ombeleasi ra, azini ma nga anziriku mini oce kpi kpi indi.

14Yehova azi vini azita e’yo minisi ’bo, kini: ’Ba ma asi mi ma ru oji dika ku; ma nga wura mini edele patisi, azini aya akapi acisirisi ’diyi oli va jo adrou mini ’diyi inzizu-riarisi Ma nga ’bile mi avu sazuri ga, mini ovule onzikanyarurisi.

15Mi lu, ’ba e’yo bari ejipiri ma pa ovu oni dria, ’ba asi anzuru ekupiri! Mi mba omu mini ma ta, Yuda la, emi ’ye emini oyo solerile, a’disiku ’ba onzi ’yepiri ngani aga trei mi eseliarisi dika ku; eri ja dri dria ra.

Jump to: Chapter 2 →