Obadiah 1

Lugbara (E’yo Siza Alatararu Munguniri BIBLIA)

Jump to:

1Ndreza Obadiani. Yehova ’yo ’dini Edomu e’yosi: Ama eri e’yo kuza ibizu Yehova vu, pe ojio ti suru ma eselia, kini: Emi enga! ama ma’di a’di eri be!

2Emi ne, ma ’ba mi were suru ma eselia, onzo mi tu.

3Afu mi asiari ici mini, mi ovupi oni guleari la! mi ovupi pari uru turia, ’yopi mi asia, A’dini nga ma osi vani ya?-ri.

4Mi ka tro sa uru ajile ti, jorovu mini ka tro ovu ’bazaru ’bi’bio eselia, ma nga mi osi engazu ’daarisi va, Yehova ’yo ra,

5Oguou ka te emu mi vu, ’ba afa opapi ’diyi ka te vini emu mi vu inisiCia mi dri ’doni ya!- yi ngani re kiri afa capi yisiri ogu ku ya? Vini dika ’ba zabibu efi tipi ’diyi ka te emu mi vu, yi ngani te zabibu vile ku ndazaru ci ku ya?

6’Ba Esauni ’diyi ovu ndazaru ’doni! Nda lonyi yini zizaru ’diyi ’doni!

7’Ba dria mini ti ecizu yi be ’diyi yi dro mi kpere lokiria ’bo; ’ba ndra ovupi mi be asi anzurusi ’diyi yi ici mi ra, yi aga mi ’bo; ’ba enya mini nyapi ’diyi onga ’ba mi tizute e’yo vaza eri ma aliani yo.

8O’du ’dasi, Yehova ’yo ra, ma ngani ’ba onduaru ’diyi dri ja Edomuasi leu ya? Ma ngani ’ba e’yo vapiri ma dri ja oni Esauniriasi ku ya?

9Temani la! ’ba ombaru mini a’dini ’diyi yi nga ovu asi otiza be, yi dria alu alu ma ovu ani dri jazaru dri jatasi oni Esauniasi beni.

10Mini adripi Yakoboni ’yele eganasirisi, drinzani nga mi fu ra, mi nga ovu dri jazaru ’dani ’dani.

11O’du mini pa sozu kalaa, o’du ’ba emuza ’diyini lonyi erini o’duzu, ’ba jururu ’diyini vini fizu eri ma jotilia odrisi ’bezu Yerusalemu driarisi, o’du nde ’dasi mi bani ndra yi ma aziru mi’i,

12Te mi ma ne o’du mi adripini ku, o’du erini e’yo ewaru isuzuri; nyona ma fu mi Yuda anziyisi o’du yini dri jazurisi ku indi; mi ma ’yo vini e’yo afuru ku o’du cocoani ’diria.

13Mi ma fi jotile suru ma vile ’diyinia o’du yini ocoko isuzurisi ku; ada, mi ma ne inzata yini ku o’du yini ocoko isuzurisi; kani vini mi ma ’ba mi dri lonyi yini ma dria o’du yini ocoko isuzurisi ku indi.

14Mi ma so pa geri aritia ’ba erini yi opapi ’diyi ofuzu ku; kani vini mi ma fe ’ba erini acepi ’diyi ari’ba dri ku o’du cocoani ’diria.

15Te o’du Yehovaniri ovu suru dria ma dria ogogo. Kile mini ’yele ’borile, mi bani nga ovu ’yezaru ’dini, ’yeta mini nga emvi be mi ngulupi ma dria.

16Emini ndra afa mvule oni alatararu mani ma driarile, ’dinile suru driani bani mvu ani zuzu; ada, yi nga mvu, yi nga oki, yi nga ovu kile yi ndra yorile.

17Te oni Zionia ’ba yi opapi ’diyi nga ovu indi, te eri nga ovu alatararu; suru Yakoboniri nga yi ma ma vu nyani.

18Azini suru Yakoboniri nga ovu acini, suru Yusufuniri nga ma andreni, suru Esau vileri nga a’wile; yi nga ti ko ve yi eselia yi ovezu dria, ’ba aluni ngani ace suru Esauni ma alia ku; Yehovani e’yo ’diyi ’yolenirisi.

19Te ’ba angu urulerua ’diyi yi nga oni Esauni nya’i, azini ’ba angu eleria ’diyi yi nga ’ba Filisitia ’diyi nya’i; yi vini nga angu Efiraimuni nya Samarianiri be, Benyaminini nga ini Gileadini nya’i.

20Asikari ongulumuru Israeli anziyini, ndra obile ati’baru, ovupi ’ba Kananini eselia ’diyi yi nga angu nya kpere Zarefetaa; ’ba Yerusalemuni ati’baru ovupi Sefaradia ’diyi yi nga aku ambo ambo angu uruleruria ’diyi nya’i.

21’Ba ’ba opapi ’diyi nga tu oni Zioniari ma dria oni Esauniri ma e’yo lizu; opi nyazani nga ovu Yehovani.

Jump to: