Philippians 1

Lugbara (E’yo Siza Alatararu Munguniri BIBLIA)

Jump to: Chapter 2 →

1Paulo pi Timoteo be, ovupi ati’ba Kristo Yesuni ’diyi, ’Ba alatararu dria Kristo Yesu ma alia ovupi Filipia ’diyi pi vu, ’ba kanisa andripi ’diyi pie, ’ba kanisa ma aza kopi ’diyi pie:

2’Yeta anzutiri pi ma ovu emi vu asi anzuro be engazu Mungu Ata amani pi vu Opi Yesu Kristo be.

3Ma awa’difo ’yo Mungu mani vu paleko dria mani e’yo emini egaria,

4zita mani ma alia dria ma adri Mungu zi emi dria ma e’yosi etuzu ayiko be,

5emini ti ecile ma be e’yo barini kuzu engazu o’du ndra oko ’darisi ecazu kpere o’du curu’dorisi.

6Te ma a’i e’yo ’diri ma asia ada kini, Mungu azi onyiru e’dopi emi aliari nga fe azi ndeni i dezu dri fuzu kilili cazu kpere o’du Yesu Kristoniria.

7Mani emi dria ma e’yo egazu ’dinileri eri ’yeke, a’disiku e’yo eminirini ovule ma asiarisi, azini mani de ovuria ombezaru kani mani de agata garia e’yo bari ma e’yosi azini e’yo oluria okposi, emi dria ovu ti ecizu ma be ’yeta anzutirisi.

8Te Mungu ovu ’ba e’yo mani ma eti nipiri, eri ni kini ava emini dria va ma tu leta i avasi Kristo Yesuniri ma alia.

9Te ma zi Mungu ’dini, kini, leta avasi eminiri ma zo nga drile dika dika nita pi ma alia ondua e’yo eti vazuri be dria,

10emi ma ama ani e’yo agapi onyisi ra ’diyi yi a’izu beni, emi ma ovu ani asi alaru be azini onzi kokoru kpere cazu o’du Kristoniria,

11emi ma ga tre efi ’yaza e’yo kililiruni ovupi geri Yesu Kristonisiri be, diza pi fezu ani Mungu dri inzita be.

12Te ma le emi ma ni, ma adripi, e’yo ndra yi ’yepi ma ruaa ’diyi efu tuni e’yo barini kuzu,

13te geri ’disi asikari dria aku opini ma agei tepi ’diyi, ’ba azini pie dria, yi ni ra ma ovu ombezaru Kristo ma e’yosi;

14azini adripi Opi ma alia ’diyi ma esele tu tuni isu a’ita o’diru anziriku mani ma e’yosi, ovuzu ani asi tezasi e’yo Munguni oluzu uri kokoru aga ra.

15Adaru ’ba azini yi e’yo Kristoni olu ma’yalasi azini abalasi, te ’ba azini ’diyi olu asi onyirusi.

16’Ba nde ’diyi yi e’yo olu leta avasirisi yini nile Mungu ’ba ma ’doa e’yo bari ma eti nzezurisi;

17te ’ba azini ’dayi yi e’yo Kristoni olu awatasi, asi alarusi ku, yini egale candi erezu ma dri anziriku ma ombezuri ma driarisi.

18Te e’yo ngoni ya? Geri driasi, kani asi inzorusi, kani asi adarusi, yi Kristoni olu’i; e’yo ’dirisi ma ovu ayikosi, adaru ma nga ovu ani ayikosi ’dani.

19Te ma ni ra e’yo ’diri nga ofu ma dri pataru, zita eminisi azini Orindi Yesu Kristoni ovupi fezaru ma dririsi;

20te ma ovu asi tezasi azini ma ega asi driasi ma ngani ovu drinzasi e’yo alunisi ku, te curu’do ekile driorile, mani e’yo olule uri kokorurisi, Kristo ma ovu inzizaru rua maniri ma alia, kani idrisi, kani dratasi.

21Te mani ovuzu idriruri eri Kristo’i, te drazu rari eri orodriru.

22Te ka ovu mani ngazu ovuzu idriru ruasiri’i, ’diri nga ovu ma dri efi ’yaza azi mani ’yelerini. Ka’dini ma nini ku ma nga ngonileri pe ya.

23Asi mani le e’yo ’diyi iri tro. Ma le dri kozu muzu ovuzu Kristo be ra ’bo, ’di onyiru aga dria.

24Te agapi rari le ma ma ovu rua ma alia ’dani e’yo eminisi.

25Te mani e’yo a’iria ma asia ’dinile ma ni ra ma nga ovu ’dani, ma nga ovu emi be dria emini zozu ani drile a’ita ma alia ayikosi,

26emi ma enya emi tu aga ra Kristo Yesu ma alia e’yo manisi beni, mani ecale emi eselia dikarisi.,

27Te di, acita emini ma ovu ekile e’yo baru Kristonirini lelerile, ka’dinile ma ka eca emi vu emi ndrezu, kani ma ka eca ku, ma ma eri e’yo emini, kini, emi so pa okporu orindi alusi, azini emi ’di a’di tualu asi alusi a’ita e’yo barinirisi;

28emi ma ’ye urisi ari’ba emini ma e’yosi aluni ku. E’yo ’diri ovu yi dri ecetaru dri jaza yini ecezu, te eri vini ecetaru pata emini engapi Mungu rori ecezu indi.

29Te eri ovu fezaru emi dri Kristosi, kiri eri a’izu a’dule ku, te candi nyazu eri ma e’yosi indi,

30emini ovuria a’di be tro tro ekile emini ndrele ma vu, azini emini erile curu’do ovu ma vu ’indirile.

Jump to: Chapter 2 →